تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تطبيقات على خاصية التوزيع

أحمد مدحت

يوضح الفيديو خاصية التوزيع، وتطبيقات عليها.

٠٤:٦٠

‏نسخة الفيديو النصية

هنتكلم عن تطبيقات على خاصية التوزيع. في الفيديو ده في الأول هنوضح خاصية التوزيع، بعد كده هنشوف تطبيقات عليها.

بالنسبة لخاصية التوزيع فهي بتِجمع بين عملية الجمع وعملية الضرب، وبتوضح إن إحنا علشان نضرب مجموع، سواء إن كان مجموع عددين أو أكتر في عددٍ ما، فإحنا هنضرب كل عدد مضاف في العدد اللي موجود خارج الأقواس. فمثلًا اتنين في، سبعة زائد أربعة، عبارة عن عدد مضروب في مجموع عددين، فهنستخدم خاصية التوزيع، فهنضرب الاتنين في السبعة، وكمان هنضرب الاتنين في الأربعة؛ بالتالي هيبقى اتنين في، سبعة زائد أربعة، يساوي اتنين في سبعة زائد اتنين في أربعة.

بنفس الطريقة نقدر نستخدم خاصية التوزيع مع المقادير الجبرية، زي مثلًا المقدار الجبري أ في، ب زائد ﺟ، لما هنستخدم خاصية التوزيع فإحنا هنضرب الـ أ في الـ ب، وكمان هنضرب الـ أ في الـ ﺟ؛ وبالتالي المقدار الجبري أ في، ب زائد ﺟ، يساوي أ ب زائد أ ﺟ.

بكده إحنا عرفنا خاصية التوزيع، بعد كده هنشوف تطبيق عليها. عندنا إن مي زرعت أربع صفوف من الزهور في حديقة منزلها، وكان في كل صف خمس زهور بيضاء، وتلات زهور حمراء، فعايزين نعرف كم زهرة زرعت مي.

علشان نعرف عدد الزهور اللي زرعتها مي، فإحنا هنضرب عدد الزهور في الصف الواحد في أربعة؛ وده لأن إحنا عندنا أربع صفوف. فمن خلال المعطيات، هنلاقي إن الصف فيه خمس زهور بيضاء، وتلات زهور حمراء؛ يعني عدد الزهور في الصف الواحد يساوي خمسة زائد تلاتة. وبما إن مي زرعت أربعة صفوف من الزهور، فهيبقى عدد الزهور اللي زرعتها مي يساوي أربعة في، خمسة زائد تلاتة. وعلشان نِوجد قيمة أربعة في، خمسة زائد تلاتة، فإحنا عندنا طريقتين؛ الطريقة الأولى هنضرب، بعد كده نجمع؛ والطريقة التانية هنجمع، بعد كده نضرب.

هنبدأ بالطريقة الأولى واللي هنضرب فيها بعد كده نجمع، فبالنسبة لأربعة في، خمسة زائد تلاتة، إحنا هنضرب عدد في مجموع، فهنستخدم خاصية التوزيع؛ وبالتالي هنضرب الأربعة في خمسة، وكمان هنضرب الأربعة في تلاتة؛ معنى كده إن أربعة في، خمسة زائد تلاتة، يساوي أربعة في خمسة زائد أربعة في تلاتة. فلما هنضرب هنلاقي أربعة في، خمسة زائد تلاتة، يساوي عشرين زائد اتناشر. ولما هنجمع عشرين زائد اتناشر، هنلاقي إن المقدار أربعة في، خمسة زائد تلاتة، يساوي اتنين وتلاتين. بكده يبقى عدد الزهور اللي زرعتها مي هو اتنين وتلاتين زهرة.

بعد كده هنشوف الطريقة التانية، واللي هنجمع فيها الأول بعد كده نضرب. فإحنا عندنا أربعة في، خمسة زائد تلاتة، هنجمع الأول خمسة زائد تلاتة، فخمسة زائد تلاتة بيساوي تمنية؛ معنى كده إن أربعة في، خمسة زائد تلاتة، يساوي أربعة في تمنية. بعد كده هنضرب أربعة في تمنية، فهيبقى أربعة في، خمسة زائد تلاتة، يساوي اتنين وتلاتين. بكده بعد ما استخدمنا الطريقتين، نقدر نقول إن عدد الزهور اللي زرعتها مي هو اتنين وتلاتين زهرة.

بعد كده هنشوف تطبيق تاني. عندنا في المثال إن عمر كل يوم بيرفع أثقال لمدة عشر دقايق، وبيجري لمدة خمسة وعشرين دقيقة، وعايزين نستخدم خاصية التوزيع علشان نِوجد العدد الكلي للدقايق لو تدرب عمر سبعة أيام.

أول حاجة هنِوجد عدد دقايق التدريب بتاع عمر يوميًّا، ومن خلال المعطيات هنلاقي إن عمر بيرفع أثقال لمدة عشر دقايق وبيجري لمدة خمسة وعشرين دقيقة؛ معنى كده إن هيبقى عدد دقايق تدريب عمر يوميًّا يساوي عشرة زائد خمسة وعشرين. بعد كده علشان نِوجد العدد الكلي للدقايق لو تدرب عمر سبعة أيام، فإحنا هنضرب سبعة في عدد دقايق تدريب عمر يوميًّا؛ يعني العدد الكلي للدقايق إذا تدرب عمر سبعة أيام يساوي سبعة في، عشرة زائد خمسة وعشرين. هنلاحظ إن إحنا هنضرب عدد في مجموع عددين؛ بالتالي هنستخدم خاصية التوزيع؛ يعني هنضرب سبعة في عشرة، وكمان هنضرب سبعة في خمسة وعشرين، يعني العدد الكلي للدقايق يساوي سبعة في عشرة زائد سبعة في خمسة وعشرين. بكده إحنا استخدمنا خاصية التوزيع.

بعد كده لما هنضرب هنلاقي العدد الكلي للدقايق يساوي سبعين زائد مية خمسة وسبعين، بعد كده هنجمع سبعين زائد مية خمسة وسبعين، فهنلاقي العدد الكلي للدقايق يساوي ميتين خمسة وأربعين. بكده نقدر نقول إن العدد الكلي للدقايق إذا تدرب عمر سبعة أيام هو ميتين خمسة وأربعين دقيقة.

بكده يبقى إحنا في الفيديو ده عرفنا خاصية التوزيع، وكمان شُفنا تطبيقات عليها.