فيديو: إيجاد ميل الخط المستقيم

ما قيمة ﺹ التي تجعل النقاط ﺃ(−٩، ٦)، ﺏ(٣، −٣)، ﺟ(−١، ﺹ) على استقامة واحدة؟

٠٢:٥٣

‏نسخة الفيديو النصية

ما قيمة ص التي تجعل النقاط: أ سالب تسعة وستة. ب تلاتة وسالب تلاتة. ج سالب واحد وَ ص. على استقامة واحدة.

لو عندنا أي تلات نقط أ وَ ب وَ ج على استقامة واحدة، هيبقى ميل القطعة المستقيمة أ ب، بيساوي ميل القطعة المستقيمة ب ج؛ لأنهم على استقامة واحدة على خط مستقيم واحد. الميل يساوي التغير في الإحداثي الصادي، مقسوم على التغير في الإحداثي السيني. ولأننا نعرف الإحداثيات بتاعة النقطة أ والنقطة ب. هنجيب في الأول ميل القطعة المستقيمة أ ب. اللي هيساوي التغير في الإحداثي الصادي. الإحداثي الصادي للنقطة ب هو سالب تلاتة. ناقص الإحداثي الصادي للنقطة أ ستة. مقسوم على التغير في الإحداثي السيني. الإحداثي السيني للنقطة ب تلاتة. ناقص الإحداثي السيني للنقطة أ سالب تسعة. وده بيساوي سالب تلاتة ناقص ستة بيساوي سالب تسعة. تلاتة ناقص سالب تسعة يعني تلاتة زائد تسعة، وده هيساوي اتناشر.

يبقى ميل القطعة المستقيمة أ ب يساوي سالب تسعة على اتناشر. ولأن النقط التلاتة أ ب وَ ج بتقع على استقامة واحدة. يبقى ميل القطعة المستقيمة أ ب بيساوي ميل القطعة المستقيمة ب ج. ميل القطعة المستقيمة ب ج هيساوي الإحداثي الصادي للنقطة ج، اللي هو مجهول واللي هو ص. ناقص الإحداثي الصادي للنقطة ب، اللي هو سالب تلاتة. مقسوم على الإحداثي السيني للنقطة ج سالب واحد. ناقص الإحداثي السيني للنقطة ب، اللي هو تلاتة. وده بيساوي … ص ناقص سالب تلاتة، هتساوي ص زائد تلاتة. وسالب واحد ناقص تلاتة، هيساوي سالب أربعة. وده هيساوي سالب تسعة على اتناشر، اللي هو ميل ب ج القطعة المستقيمة.

يبقى عندنا ص زائد تلاتة مقسومة على سالب أربعة. بيساوي سالب تسعة على اتناشر. هنضرب الطرفين في سالب أربعة. هيبقى شكل المعادلة ص زائد تلاتة، بيساوي سالب تسعة مضروبة في سالب أربعة، على اتناشر. سالب تسعة مضروبة في سالب أربعة، هتدينا ستة وتلاتين. ستة وتلاتين على اتناشر، ده بيساوي تلاتة. ص زائد تلاتة هيساوي تلاتة. ومن هنا ص هتساوي صفر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.