فيديو: التحويل بين الأرطال والأواقي

أكمل ما يلي بأقصى عدد من الأرطال وعبِّر عن الباقي بالأواقي: ٧٩٥ أوقية = _ رطل ‎_ أوقية.

٠٦:٢٠

‏نسخة الفيديو النصية

أكمل ما يلي بأقصى عدد من الأرطال، وعبِّر عن الباقي بالأواقي: سبعمية خمسة وتسعين أوقية تساوي نقط رطل، ونقط أوقية.

عاوزين نكمّل السؤال بتاعنا، ونشوف السبعمية خمسة وتسعين أوقية هي كام رطل وكام أوقية. الواحد رطل أو الرطل يساوي ستاشر أوقية. علشان نعرف نحلّ السؤال ده، محتاجين نقسم سبعمية خمسة وتسعين، اللي هي عدد الأواقي اللي عندنا، على ستاشر، اللي هو عدد الأواقي في الرطل الواحد.

تعالوا نعملها بالقسمة المطوَّلة. فهنعمل علامة القسمة المطوَّلة. وهنا سبعمية خمسة وتسعين المقسوم، والمقسوم عليه ستاشر. ونبدأ أول حاجة، نحاول نقسم السبعة على الستاشر. هل ينفع نقسم السبعة على الستاشر؟ أكيد لأ؛ لأن السبعة أصغر من الستاشر. فكده إحنا مش هنعرف نقسم المئات لوحدها. فبناخد مع السبعة التسعة، اللي هي العشرات. فتبقى تسعة وسبعين على الستاشر.

ونفكر: تسعة وسبعين على الستاشر هتساوي كام؟ لو جرَّبنا نضرب ستاشر في أربعة هتساوي أربعة وستين. ولو ضربنا ستاشر في خمسة هتساوي تمنين. وإحنا عندنا التسعة وسبعين محصورة ما بين الأربعة وستين والتمنين. ما ينفعش ناخد التمانين؛ لأنها أكبر من التسعة وسبعين. فناخد الإيه؟ الأربعة وستين. طيب هي ستاشر في كام بأربعة وستين؟ ستاشر في أربعة. يبقى معنى كده إن ناتج قسمة تسعة وسبعين على الستاشر هتبقى بإيه؟ بأربعة.

بعدين نضرب أربعة في ستاشر. هي أربعة في ستاشر إحنا قلنا بكام؟ بأربعة وستين. نكتبها هنا تحت الستة وسبعين [التسعة وسبعين]. بعدين نطرح. تسعة وسبعين ناقص أربعة وستين هتساوي خمستاشر.

طيب هل إحنا ينفع نقسم خمستاشر على الستاشر؟ أكيد لأ؛ لأن الخمستاشر أصغر من الستاشر. فننزّل الخمسة دي جنب الخمستاشر. وهتبقى مية خمسة وخمسين. دلوقتي نقدر نقسم مية خمسة وخمسين على الستاشر.

علشان نعرف ناتج قسمة مية خمسة وخمسين على الستاشر. هنخمّن إيه العدد اللي لمّا نضربه في ستاشر ناتج الضرب هيكون قريّب من المية خمسة وخمسين. فمثلًا لو جينا قلنا: ستاشر في تسعة. ستاشر في تسعة بتساوي مية أربعة وأربعين. طيب وستاشر في عشرة؟ هتساوي مية وستين. وإحنا عندنا مية خمسة وخمسين محصورة ما بين المية أربعة وأربعين والمية وستين. ولكن مية وستين أكبر منها، فمش بناخدها. بناخد الأصغر، اللي هو مية أربعة وأربعين. طيب هي ستاشر في كام بمية أربعة وأربعين؟ ستاشر في تسعة. فده معناه إن الناتج اللي هنكتبه هيكون تسعة.

ونقول بعد كده: تسعة في ستاشر بتساوي مية أربعة وأربعين. نكتبها هنا كده بالشكل ده. بعدين نطرح. مية خمسة وخمسين ناقص مية أربعة وأربعين هتساوي حداشر.

طيب هل إحنا ينفع نقسم حداشر على الستاشر؟ لأ ما ينفعش؛ لأن الحداشر أصغر من الستاشر. طيب هل فيه حاجة ممكن ننزّلها جنب الحداشر نكبّر بيها العدد؟ لأ، ما فيش. فده معناه إيه؟ ده معناه إننا وصلنا لآخر عملية القسمة. وعرفنا إن سبعمية خمسة وتسعين على الستاشر هتساوي تسعة وأربعين. تسعة وأربعين مش بس، تسعة وأربعين وباقي حداشر. يعني إيه الكلام ده؟ يعني السبعمية خمسة وتسعين أوقية بتساوي تسعة وأربعين رطل، وباقي الحداشر دول؛ حداشر أوقية.

طيب لو عايزين طريقة تانية نحلّ بيها السؤال ده؟ ممكن نستخدم الآلة الحاسبة، ونقسم عليها على طول سبعمية خمسة وتسعين على الستاشر. هيطلع لنا الناتج بالشكل ده. هيكون ناتج القسمة بيساوي تسعة وأربعين وستة آلاف تمنمية خمسة وسبعين من عشرة آلاف.

يعني إيه بقى ناتج القسمة ده؟ ناتج القسمة فيه جزء صحيح، اللي هو التسعة وأربعين. وجزء عشري، اللي هو ستة آلاف تمنمية خمسة وسبعين من عشرة آلاف. وإحنا علشان بنحوّل من الأواقي للرطل قَسَمنا على الستاشر. فده معناه إن الجزء الصحيح ده هو اللي بيمثّل لنا عدد الأرطل، اللي هو تسعة وأربعين رطل. طيب والجزء العشري ده؟ هو عدد الأواقي اللي اتبقّت.

طيب عدد الرطل مفهوم؛ تسعة وأربعين. عدد الأواقي ده نحسبه إزاي؟ مش إحنا خلاص عرفنا إن ناتج القسمة هو تسعة وأربعين صحيح، ومعاه جزء عشري؟ طيب بالنسبة بقى للتسعة وأربعين الصحيح ده، هنضربه في ستاشر. يعني هنقول تسعة وأربعين في ستاشر. تسعة وأربعين في ستاشر بتساوي سبعمية أربعة وتمانين. طيب لو خدنا السبعمية أربعة وتمانين دول، وطرحناهم من سبعمية خمسة وتسعين، هيتبقَّى لنا إيه؟ يعني هنقول: سبعمية خمسة وتسعين ناقص سبعمية أربعة وتمانين. هيتبقَّى لنا حداشر. يبقى الحداشر ده هو الباقي أو عدد الأوقيات.

عرفنا إزاي نحلّ السؤال؟ وبكده نكون وصلنا لإجابته. وهو تسعة وأربعين رطل وحداشر أوقية. فتبقى الإجابة هي إيه؟ تسعة وأربعين، وحداشر. هي دي الإجابة الصحّ.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.