نسخة الفيديو النصية
ما العدد الذي إذا قُسم على خمسين كان خارج القسمة مية وحداشر، والباقي أربعين؟
السؤال هنا بيسألنا عن عدد إحنا مش عارفينه. هنفترض إن العدد ده بِـ س. العدد س ده لو قسمناه على خمسين خارج القسمة، يعني ناتج القسمة، هيكون بمية وحداشر. وباعتبار إن هنا فيه خطوات لعملية القسمة، معطى عندنا إن باقي القسمة أربعين.
كده إحنا عرفنا إن س بتمثّل العدد المقسوم. والعدد خمسين بيمثّل المقسوم عليه. والعدد مية وحداشر بيمثّل خارج القسمة. والعدد أربعين بيمثّل باقي القسمة. ولإيجاد قيمة المقسوم في عملية القسمة المطوّلة؛ نقدر نقول إن المقسوم بيساوي خارج
القسمة في المقسوم عليه، زائد باقي القسمة.
باقي القسمة ليها حالتين. الحالة الأولى: لو القسمة منتهية. وساعتها هيكون باقي القسمة بيساوي صفر. والحالة التانية: لو القسمة غير منتهية. وفي الحالة دي هيكون باقي القسمة بيساوي أيّ عدد ما عدا الصفر.
السؤال هنا بيمثّل الحالة التانية؛ لأن باقي القسمة بيساوي أربعين، يعني عدد لا يساوي
الصفر. وده معناه إن القسمة دي قسمة غير منتهية. وبكده يبقى المقسوم، اللي إحنا فرضنا قيمته بِـ س، هيساوي … خارج القسمة؛ معطى عندنا
خارج القسمة قيمتها بمية وحداشر، في … المقسوم عليه قيمته بخمسين، زائد … باقي القسمة
معطى عندنا قيمتها بأربعين.
وهنبدأ الأول بتنفيذ عملية الضرب؛ زيّ ما موجود في ترتيب أولويات العمليات الحسابية. مية وحداشر في خمسين بخمسة آلاف خمسمية وخمسين. وبعد كده هنجمع الأربعين على الخمسة آلاف خمسمية وخمسين. يبقى قيمة س هتساوي خمسة آلاف خمسمية وخمسين زائد أربعين؛ يعني هتساوي خمسة آلاف خمسمية
وتسعين.
وبكده العدد الذي إذا قُسم على خمسين كان خارج القسمة مية وحداشر والباقي أربعين، هيكون:
خمسة آلاف خمسمية وتسعين.
