تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: ترتيب الأعداد حتى ١٠٠

نهال عصمت

يتناول الفيديو كيفية ترتيب الأعداد حتى ١٠٠ باستخدام خط الأعداد، والكلمات المستخدمة للتعبير عن ذلك.

٠٥:٢٥

‏نسخة الفيديو النصية

ترتيب الأعداد حتى مية.

هنتعلم نرتّب الأعداد حتى مية، باستخدام خط الأعداد. وفيه كلمات بنستخدمها للتعبير عن ترتيب الأعداد، وهي: قبل، وبين، وبعد.

بمعنى لو عندنا خط الأعداد مكتوب عليه الأعداد من تمانين لتسعين، بالشكل ده. هنلاحظ إن الأعداد مكتوبة على خط الأعداد بالترتيب. بمعنى لو جينا بصّينا على العددين خمسة وتمانين، وستة وتمانين. هنلاقي إن العدد خمسة وتمانين يأتي قبل العدد ستة وتمانين. يبقى نقدر نقول إن خمسة وتمانين تأتي قبل ستة وتمانين.

ولو جينا بصينا على العددين ستة وتمانين، وسبعة وتمانين. هنلاقي إن العدد سبعة وتمانين يأتي بعد العدد ستة وتمانين. يبقى نقدر نقول إن سبعة وتمانين تأتي بعد ستة وتمانين.

لو جينا بصّينا على التلات أعداد مع بعض. خمسة وتمانين، ستة وتمانين، سبعة وتمانين. هنلاقي إن العدد ستة وتمانين يأتي أو يقع بين العددين خمسة وتمانين، وسبعة وتمانين. يبقى نقدر نقول إن ستة وتمانين تقع بين خمسة وتمانين، وسبعة وتمانين. عشان لمّا بنيجي نعدّ، بنقول: خمسة وتمانين، ستة وتمانين، سبعة وتمانين.

يبقى كده لو جينا نقارن بالنسبة لستة وتمانين، هنلاقي إن خمسة وتمانين بتأتي قبل ستة وتمانين. وإن سبعة وتمانين بتأتي بعد ستة وتمانين. معنى كده إن ستة وتمانين تقع بين خمسة وتمانين، وسبعة وتمانين.

هنبدأ نجيب صفحة جديدة، ونشوف مثال تاني. معطى خط الأعداد التالي، مكتوب عليه الأعداد من عشرين لتلاتين بالترتيب. والمطلوب هو العدد الذي يسبق مباشرةً العدد تمنية وعشرين، والعدد خمسة وعشرين. ومطلوب كمان العدد الذي يلي مباشرةً العدد عشرين، والعدد ستة وعشرين. ومطلوب كمان العدد الواقع بين العددين واحد وعشرين وتلاتة وعشرين، وتمنية وعشرين وتلاتين.

أول حاجة هنبدأ نوجد العدد الذي يسبق مباشرةً. معنى كلمة «يسبق مباشرةً»، يعني العدد الذي يأتي قبل. عايزين نكتب العدد الذي قبل تمنية وعشرين. هنبصّ على خط الأعداد. عندنا العدد تمنية وعشرين. العدد الذي يأتي قبله هو سبعة وعشرين. يبقى هنكتب سبعة وعشرين. بعد كده عايزين العدد الذي يسبق مباشرةً خمسة وعشرين. يعني هنيجي عند خمسة وعشرين. العدد اللي بيأتي قبل خمسة وعشرين، هو أربعة وعشرين. يبقى هنكتب مكان النقط، أربعة وعشرين.

بعد كده عايزين العدد الذي يلي مباشرةً. معنى كلمة «يلي مباشرةً»، يعني الذي يأتي بعد. عايزين العدد اللي بعد عشرين. يبقى هنقف عند عشرين. العدد اللي بعده هو واحد وعشرين. يبقى هنكتب مكان النقط، واحد وعشرين. عايزين كمان العدد الذي يلي مباشرةً ستة وعشرين، يعني العدد اللي بعد ستة وعشرين. هنيجي عند ستة وعشرين. العدد اللي بعد ستة وعشرين، هو سبعة وعشرين. يبقى هنكتب مكان النقط، سبعة وعشرين.

آخر حاجة عايزين العدد الواقع بين العددين واحد وعشرين، وتلاتة وعشرين. يبقى هنيجي عند واحد وعشرين، وتلاتة وعشرين. هنلاقي إن العدد الذي يقع بينهم هو اتنين وعشرين. يبقى هنيجي نكتب في النقط، اتنين وعشرين. بعد كده عندنا العددين تمنية وعشرين، وتلاتين. عايزين العدد الواقع بين العددين تمنية وعشرين، وتلاتين. هنلاقي العدد هو تسعة وعشرين. يبقى هنكتب مكان النقط، تسعة وعشرين.

يبقى كده اتعلّمنا نرتّب الأعداد حتى مية، باستخدام خط الأعداد. واستخدمنا كلمات للتعبير عن ترتيب الأعداد، وهي: قبل، وبين، وبعد.