فيديو: كتابة النسب والكسور في صورة نسبة مئوية والعكس

أحمد لطفي

يوضح الفيديو تعريف النسب المئوية، وكيفية كتابة النسب والكسور في صورة نسبة مئوية والعكس.

٠٨:٠٧

‏نسخة الفيديو النصية

هنتكلّم عن كتابة النسب والكسور في صورة نسبة مئوية والعكس.

وهنعرف إيه هي النسبة المئوية. وهنشوف الطريقة المستخدمة؛ عشان نقدر نكتب النسب والكسور في صورة نسبة مئوية، والعكس. في البداية، تعريف النسبة المئوية هي النسبة اللي بتقارن أيّ عدد بالعدد مية. يعني لو عندنا نسبة مثلًا سبعة وعشرين من مية، هقدر أكتبها على صورة كسر. وهتكون سبعة وعشرين على مية. وأقدر أكتبها في صورة نسبة مئوية. وهتكون سبعة وعشرين في المية. وممكن أستخدم الرموز، مثلًا هنرمز للعدد بالرمز س. فعندنا س من مية، النسبة بتاعتنا. لو عايزين نكتبها في صورة كسر، فهتكون س على مية. ولو عايزين نكتبها في صورة نسبة مئوية، فهتكون س في المية.

لو عايزين نشوف إزّاي هنقدر نكتب النسب في صورة نسب مئوية. مطلوب نكتب النسب في صورة نسب مئوية. في آخر تعداد سكاني في محافظة ما، كان ستة وعشرين من كل مية شخص عمرهم أقلّ من تمنتاشر سنة.

عندنا النسبة هي ستة وعشرين من كل مائة شخص. عشان نقدر نكتبها في صورة نسبة مئوية، فهتكون بتساوي ستة وعشرين في المية. وده باستخدام تعريف النسبة المئوية.

لو عندنا مثال آخر بالشكل ده. مطلوب نكتب النسب في صورة نسب مئوية. في بداية المرحلة الإعدادية، مية وأربعين طالب اختاروا اللغة الإسبانية كلغة تانية من كل مية طالب اختاروا اللغة الفرنسية.

النسبة عندنا هتكون مية وأربعين من كل مية طالب. لو عايزين نكتبها في صورة نسبة مئوية، هتكون بتساوي مية وأربعين في المية، باستخدام تعريف النسبة المئوية. هنلاحظ في النسبة المئوية مية وأربعين في المية، إنها كانت أكبر من مية في المية. وبما إن النسبة المئوية بتعني مقارنة العدد بالنسبة للعدد مية، فلمّا يكون عندنا مية وأربعين في المية معناها مية وأربعين لكل مية. وبكده نكون عرفنا إزّاي نقدر نكتب النسب في صورة نسب مئوية.

لو عايزين نشوف إزّاي هنقدر نكتب الكسور في صورة نسب مئوية. مطلوب نكتب الكسور في صورة نسب مئوية. حوالي واحد لكل عشر أشخاص يستخدمون الإنترنت لشراء تذاكر السفر. في البداية، النسبة واحد لكل عشر أشخاص هنكبتها في صورة كسر. وهتكون واحد على عشرة. عشان نقدر نحوّل الكسر إلى نسبة مئوية، محتاجين نوجد كسر مكافئ ليه، ويكون مقامه بيساوي مية. يعني محتاجين نشوف واحد على عشرة هتساوي س على مية. ومحتاجين نوجد قيمة س.

هنجد إننا عشان من عشرة في المقام نوصل لمية في المقام، احتجنا نضرب في عشرة. وبالتالي لازم نضرب البسط في نفس العدد. يعني واحد في عشرة هيساوي عشرة. وبالتالي س هتساوي عشرة. يعني هيكون عندنا واحد على عشرة هتساوي عشرة على مية. ويبقى نقدر نقول: إن واحد لكل عشر أشخاص هتساوي عشرة في المية.

ممكن نوجد الكسر المكافئ للكسر واحد على عشرة، اللي بيكون مقامه مية، باستخدام طريقة الرسومات. يعني لو عندنا مستطيل وقسّمناه لعشر أعمدة متساوية. وهنظّلل عمود؛ عشان نعبّر عن الكسر واحد على عشرة. لو قسّمنا نفس الشكل ده إلى مية جزء، يعني لو خلّيناه بالشكل ده، هنلاحظ الجزء المظلّل عندنا بقى عشر أجزاء من مية جزء. وبالتالي الكسر واحد على عشرة بيكافئ الكسر عشرة على مية. وبكده نكون قدرنا نوجد الكسر المكافئ للكسر واحد على عشرة باستخدام الرسومات.

لو عندنا مثال آخر بالشكل ده. في مصنع ما لإنتاج لعب أطفال حوالي واحد على ميتين من اللعب كانوا تالفين.

عندنا الكسر واحد على ميتين. عايزين نشوف كسر مكافئ ليه، ويكون مقامه بيساوي مية. يعني عايزين نشوف الكسر واحد على ميتين هيساوي س على مية، وعايزين نوجد قيمة س. هنلاحظ إن المقام كان عندنا ميتين. عشان نقدر نوصّله لمية، يعني قسمنا على اتنين. وبالتالي محتاجين نقسم البسط على نفس العدد. يبقى محتاجين نقسم البسط على اتنين. يبقى واحد على اتنين هيساوي نصّ. وبالتالي الكسر واحد على ميتين هيساوي خمسة من عشرة على مية. ويبقى نقدر نقول: إن واحد لكل ميتين هتساوي خمسة من عشرة في المية.

ولو كنا عايزين نوجد الكسر المكافئ للكسر واحد على ميتين باستخدام الرسومات، فمثلًا لو عندنا مستطيل بالشكل ده، متقسّم لميتين جزء بالتساوي. هنظلّل جزء واحد فيهم؛ عشان نعبّر عن الكسر واحد على ميتين. لو كان الشكل متقسّم إلى مية جزء بالتساوي. الشكل مقسَّم إلى مية جزء بالتساوي. وهنلاحظ إن الجزء المظلّل هيمثّل نصّ جزء من المية جزء. يعني خمسة من عشرة على مية. وبالتالي الكسر واحد على ميتين هيكافئ الكسر خمسة من عشرة على مية.

هنلاحظ في المثال ده إن النسبة المئوية كانت خمسة من عشرة في المية. ودي تُعتَبَر نسبة أقلّ من واحد في المية. وممكن نجد أيّ نسب مئوية أقلّ من واحد في المية. زي مثلًا النسبة المئوية واحد من ألف في المية، اللي بتمثّل الكسر واحد على مية ألف. وبكده نكون عرفنا إزّاي نقدر نكتب الكسور في صورة نسب مئوية.

لو عايزين نشوف إزّاي نقدر نكتب النسب المئوية في صورة كسور. معطى نسب مئوية بتوضّح تفضيل مجموعة من الطلاب للألوان. يعني تمنية وتلاتين في المية بيفضّلوا اللون الأزرق. وتمنية وعشرين في المية بيفضّلوا اللون البرتقاني. وعشرين في المية بيفضّلوا اللون الأخضر. وسبعة في المية بيفضّلوا اللون الأحمر. وسبعة في المية بيفضّلوا اللون الأسود. ومطلوب نكتب النسبة المئوية للأزرق في صورة كسر في أبسط صورة.

هنلاحظ إن نسبة اللون الأزرق هي تمنية وتلاتين في المية. وبنكتب النسبة المئوية في صورة كسر عن طريق إننا بنكتب العدد في البسط، والمقام بنكتب مية. يعني تمنية وتلاتين في المية هتساوي … هنكتب تمنية وتلاتين في البسط، على … المقام هنكتب مية. وبالتالي تمنية وتلاتين في المية هتساوي تمنية وتلاتين على مية.

مطلوب نوجد أبسط صورة للكسر، فهنلاحظ إن فيه عامل مشترك بين البسط والمقام. ممكن نقسم البسط والمقام على اتنين. تمنية وتلاتين على اتنين هيساوي تسعتاشر. ومية على اتنين هيساوي خمسين. وبالتالي تمنية وتلاتين في المية هتساوي تمنية وتلاتين على مية. أو بتساوي تسعتاشر على خمسين. يبقى كده قدرنا نكتب النسبة المئوية في صورة كسر في أبسط صورة.

في النهاية، نكون عرفنا إيه هي النسبة المئوية. وعرفنا إزّاي نقدر نكتب النسب والكسور في صورة نسبة مئوية، والعكس.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.