تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد محيط المربع

سوزان فائق

يوضح الفيديو مفهوم المحيط، وكيفية إيجاد قيمة محيط المربع، وإيجاد طول ضلع المربع بمعلومية محيطه.

٠٣:٠٤

‏نسخة الفيديو النصية

في الفيديو ده هنتكلم على إيجاد محيط المربع، هنعرف يعني إيه محيط المربع، وإزاي نِوجد قيمته.

طول الخط حول شكل مغلق بيسمى المحيط. يعني لو عندنا مربع بالشكل ده، وأخدنا طول الخط اللي بيحيط بالمربع، اللي هو لونه بنفسجي ده، ده هنسميه المحيط. وعلشان نِوجد محيط المربع، بنجمع أطوال أضلاعه كلها؛ يعني بنجمع طول الضلع ده، زائد طول الضلع ده، زائد طول الضلع ده، زائد طول الضلع ده. وبما أن أطوال أضلاعه متساوية، فإن محيط المربع هيساوي حاصل ضرب طول ضلعه في أربعة، يبقى محيط المربع هيساوي حاصل ضرب طول ضلعه في أربعة، اللي هو هيساوي أربعة في طول ضلعه.

ناخذ مثال إزاي هنِوجد محيط المربع. أوجد محيط المربع في الشكل المجاور. المربع اللي في الشكل طول ضلعه تلتاشر سنتيمتر، يبقى محيط المربع هيساوي أربعة في طول ضلعه، طول الضلع تلتاشر، يبقى محيط المربع هيساوي أربعة في تلتاشر، يعني هيساوي اتنين وخمسين سنتيمتر. وتمييز المحيط بيبقى بالسنتيمتر أو المتر أو الكيلومتر، على حسب المسألة؛ لأن المحيط بيعتبر طول.

هناخد مثال كمان. أوجد محيط المربع الذي طول ضلعه تسعتاشر سنتيمتر. يبقى بالتعويض في القانون محيط المربع هيساوي أربعة في طول ضلعه، هيساوي أربعة في تسعتاشر، هيساوي ستة وسبعين سنتيمتر، وهو ده محيط المربع المطلوب.

هناخد مثال كمان. احسب طول ضلع المربع الذي محيطه أربعة وعشرين متر. كده عندنا قيمة محيط المربع، ومجهول عندنا طول الضلع، هنعوّض بقيمة المحيط، اللي هي أربعة وعشرين متر، هتساوي أربعة في طول ضلعه. بقسمة الطرفين على أربعة عشان نِوجد طول الضلع، لو قسمنا هنا على الأربعة، وهنا عَ الأربعة، يبقى طول ضلع المربع هيساوي أربعة وعشرين على أربعة، يعني هيساوي ستة متر. وهي دي قيمة طول ضلع المربع اللي محيطه أربعة وعشرين متر.

اتكلمنا في الفيديو ده عن إيجاد محيط المربع، يعني إيه محيط، وإزاي هنِوجد قيمته للمربع.