فيديو: استخدام خواص عملية الجمع لجمع الأعداد الصحيحة

يوضح الفيديو كيفية جمع الأعداد الصحيحة باستخدام خواص عملية الجمع؛ وهي الإبدال والدمج والمحايد الجمعي مع تمثيلها في صور وأشكال تعليمية ممتعة.

٠٧:٠٩

‏نسخة الفيديو النصية

جمع الأعداد الصحيحة باستخدام خواص عملية الجمع. في الفيديو ده هنعرف شوية خواص بتساعدنا في تسهيل جمع الأعداد الصحيحة، إيه هي الخواص دي؟ خاصية الإبدال، وخاصية المحايد الجمعي، وخاصية الدمج.

أول حاجة خاصية الإبدال، خاصية الإبدال في عملية الجمع بتقولنا إن ترتيب الأعداد لو اتغير وإحنا بنجمعهم، مش بيقصر في حاجة، ونتيجة الجمع بتفضل زي ما هي. يعني مثلًا لو عندنا بالونتين لونهم أحمر، وجمعنا عليهم تلات بالونات لونهم أصفر، هيكون الناتج بيساوي خمس بالونات من اللونين الأحمر والأصفر. طيب لو بدلنا، يعني خلينا البالونات الصفرا هي اللي في الأول وجمعنا عليهم البالونتين اللي باللون الأحمر، هيكون الناتج برضو خمس بالونات من اللون الأحمر والأصفر. ولو جينا نمثل ده بالأرقام هنقول إن اتنين زائد تلاتة هتساوي تلاتة زائد اتنين.

وبكده نكون استخدمنا خاصية الإبدال، يعني بدلنا عدد مكان عدد، جبنا عدد الاتنين مكان عدد التلاتة، والاتنين إدونا نفس الناتج اللي هو خمسة، ويبقى ده شكل الأعداد لما يتطبّق عليها خاصية الإبدال. وكمان زيها ممكن نقول أربعة زائد واحد يساوي واحد زائد أربعة. وبكده نكون فهمنا إيه هي خاصية الإبدال.

ودلوقتي هناخد الخاصية رقم اتنين خاصية المحايد الجمعي لو عندنا شجرة فيها تلات تفاحات، وشجرة تانية ما فيهاش ولا تفاحة، وجمعناهم مع بعض، هيكون الناتج تلات تفاحات، يبقى الناتج هنا تلات تفاحات. ولو مثلنا ده بالأعداد هنقول إن الشجرة الأولى فيها تلات تفاحات، زائد الشجرة التانية مفيهاش ولا تفاحة، يعني صفر، فهيكون الناتج النهائي بيساوي تلاتة، وفي الحالة دي الصفر بيكون اسمه محايد جمعي؛ لأننا لما جمعنا عليه عدد زي التلاتة كان الناتج نفس العدد، وهو التلاتة. زيها بالظبط لما نقول تسعة زائد صفر يساوي تسعة، أو لما نقول صفر زائد تمنية يساوي تمنية.

تالت وآخر خاصية هنعرفها هي خاصية الدمج؛ كريم كان بيصطاد سمك، واصطاد تلات سمكات لونهم أزرق، وسمكتين لونهم أصفر، وأربع أسماك لونهم أحمر، فعاوزين نجمعهم ونعرف عدد السمك الكلي اللي اصطاده كريم. فهنجمع اتنين زائد تلاتة زائد أربعة. لما بنيجي نستخدم خاصية الدمج بندمج أو بنجمع عددين مع بعض، والناتج بتاعهم نجمع عليه العدد التالت، يعني إيه، في المثال ده هندمج الاتنين مع التلاتة ونجمعهم، حطيناهم في قوس، ونقول اتنين زائد تلاتة يساوي خمسة، يبقى إحنا هنشيل الاتنين زائد تلاتة، ونكتب مكانها خمسة، بقت خمسة زائد أربعة يساوي تسعة. وبكده نكون جبنا الناتج النهائي عن طريق دمج عددين وجمعهم على التالت. ويبقى اللي عملناه باختصار إننا دمجنا الاتنين مع التلاتة وجمعناهم، وطلع الناتج بتاعهم يساوي خمسة، بعدين جمعنا الخمسة مع الأربعة فكان الناتج يساوي تسعة.

ممكن نحل نفس المثال ده باستخدام خاصية الدمج، ولكن المرة دي هندمج التلاتة مع الأربعة، فهنحط التلاتة والأربعة في قوس ونجمعهم، تلاتة زائد أربعة يساوي سبعة، ونجمع على السبعة الاتنين، فهنقول اتنين زائد سبعة يساوي تسعة. وبكده نكون عرفنا إيه هي خاصية الدمج، واللي معناها دمج عددين وجمعهم على العدد التالت. أيًّا كان العددين اللي بندمجهم في الآخر هتكون النتيجة واحدة، ومش هيغير في ناتج الجمع.

هناخد آخر مثال كممارسة وتطبيق على الخواص دي، اتنقل لحديقة حيوان أربع أفيال، وزرافتين، وست قرود، عاوزين نعرف عدد الحيوانات الكلي اللي دخل الحديقة، يعني هنجمعهم كلهم، فهنقول أربعة زائد اتنين زائد ستة يساوي … أول خاصية هنستخدمها هي خاصية الإبدال، وهنبدّل الاتنين مكان الستة، فهتكون أربعة زائد ستة زائد اتنين، ما بين قوسين خاصية الإبدال. تاني خاصية هنستخدمها هي خاصية الدمج، وهندمج الأربعة مع الستة، حطينا الأربعة والستة في قوسين ونكتب خاصية الدمج، أربعة زائد ستة يساوي عشرة، ونجمع على العشرة الاتنين، فهنقول عشرة زائد اتنين يساوي اتناشر، يبقى الناتج النهائي، أو عدد الحيوانات الكلي اللي داخل حديقة الحيوان، هو اتناشر. وبكده نكون عرفنا إزاي نجمع عددين أو أكتر باستخدام خواص عملية الجمع؛ زي خاصية الإبدال، وخاصية المحايد الجمعي، وأخيرًا خاصية الدمج.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.