فيديو: تقريب عدد عشري مُعطًى لأقرب جزء من عشرة

في إحدى المدارس الإعدادية، كان الزمن الذي يستغرقه فريق عدْو ١٠٠ متر موضَّحًا في هذا الجدول: ما الزمن الذي استغرقه كلُّ عدَّاء لأقرب جزء من عشرة؟

٠٣:٤٤

‏نسخة الفيديو النصية

في إحدى المدارس الإعدادية كان الزمن الذي يستغرقه فريق عدْو المية متر موضَّحًا في هذا الجدول، ما الزمن الذي استغرقه كل عدَّاء لأقرب جزء من عشرة؟

هنبدأ بالزمن اللي قطعه أو استغرقه أول واحد فيهم اللي هو حداشر واتنين وتسعين من مية ثانية، مطلوب مننا نقرب الزمن لأقرب جزء من عشرة، هنحط خط تحت الخانة المكانية بتاعة الأجزاء من عشرة بالشكل ده، وبعدين هنبص عَ الرقم اللي على يمين الخانة المكانية دي، لو كان الرقم ده أقل من خمسة يبقى الرقم اللي تحته خط اللي عندنا ده هيفضل زي ما هو، وهنحذف أي رقم موجود على يمينه، فهيبقى كده الزمن اللي استغرقه العَدَّاء الأول اللي هو خيري بعد التقريب هيبقى بيساوي تقريبًا حداشر وتسعة من عشرة ثانية.

دلوقتي هنشوف الزمن اللي استغرقه العَدَّاء التاني اللي هو حداشر وستة وتسعين من مية ثانية، برضو عايزين نقرّبه لأقرب جزء من عشرة، فهنحط خط تحت الرقم اللي موجود في الخانة المكانية المراد التقريب ليها، اللي هي خانة الأجزاء من عشرة بالشكل ده، هنبص على الرقم اللي على يمين الخانة دي، لو كان الرقم ده أقل من خمسة فالرقم اللي تحته خط اللي عندنا بيفضل زي ما هو، وبنحذف أي رقم على يمينه، أما لو كان أكبر من خمسة فمعناها إننا هنزود عَ الرقم اللي تحته خط واحد، ونحذف الرقم اللي على يمينه. يبقى هنحط حداشر زي ما هي والتسعة من عشرة لما نزودها واحد هتبقى عشرة من عشرة، عشر أجزاء من عشرة هي بتمثل واحد صحيح، الرقم اللي موجود في خانة الأجزاء من عشرة اللي هو التسعة ده لما نزود عليه واحد هيصبح عشرة، عشرة في خانة الأجزاء من عشرة بتكافئ واحد صحيح، يبقى معناها إن إحنا هنزود واحد عَ العدد الصحيح اللي عندنا اللي هو حداشر، فيبقى كده النتيجة اللي عندنا دي هتساوي تقريبًا اتناشر ثانية، هو ده الزمن التقريبي اللي استغرقه سالم في عدْو المية متر.

دلوقتي هنشوف الزمن اللي استغرقه حازم، هو استغرق حداشر وأربعة وتمانين من مية ثانية، عايزين نقرّب لأقرب جزء من عشرة، هنحط خط تحت الرقم اللي في خانة الأجزاء من عشرة، هنبص على يمين الرقم ده لو كان الرقم ده أقل من خمسة فبنحذف الرقم، والرقم اللي تحته خط بيفضل زي ما هو بدون أي تغيير، زي الحالة اللي عندنا دي، الرقم اللي على يمينه أربعة يعني أقل من خمسة فبنحذفه وبيفضل الرقم اللي تحته خط زي ما هو بالظبط، فيبقى تقريبًا الزمن هيبقى حداشر وتمنية من عشرة ثانية.

دلوقتي هنشوف الزمن اللي استغرقه أحمد في عَدْو المية متر حداشر وسبعة وتمانين من مية، وعايزين نقرّبه لأقرب جزء من عشرة، برضو هنحط خط تحت الرقم اللي في الخانة المكانية المراد التقريب ليها، هنبص على يمين الرقم اللي تحته الخط، لو كان الرقم ده أقل من خمسة فبنحذفه من غير ما نغيّر الرقم اللي تحته خط، أما لو كان خمسة أو أكتر فبنحذفه بس بنزود الرقم اللي تحته الخط بواحد، في الحالة اللي عندنا دي هو سبعة فهو أكبر من خمسة؛ يبقى هنحذفه ونزود الرقم اللي تحته الخط بواحد، فيبقى هيبقى الزمن التقريبي هو حداشر وتسعة من عشرة ثانية.

يبقى كده قدرنا نحسب الأزمنة التقريبية لكل عدَّاء من العدائين في فريق المية متر عَدْو، بعد ما قرَّبناها لأقرب جزء من عشرة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.