فيديو: المقارنة بين مُعدَّلات الإنتاج بمعلومية الكميات والزمن المُستغرَق

تُنتِج الماكينة أ ١٢٩ مترًا من القماش في ٣ ساعات. تُنتِج الماكينة ب ١٢١ مترًا من القماش في ٥ ساعات ونصف. أيُّ الماكينتين أسرع إنتاجًا؟

٠٢:٤٨

‏نسخة الفيديو النصية

تنتج الماكينة أ مية تسعة وعشرين مترًا من القماش في تلات ساعات. تنتج الماكينة ب مية واحد وعشرين مترًا من القماش في خمس ساعات ونصف. أي الماكينتين أسرع إنتاجًا؟

يعني مُعطى عندنا الماكينة أ والماكينة ب. ومُعطى عندنا إن الماكينة أ بتنتج مية تسعة وعشرين متر في تلات ساعات. وأما بالنسبة للماكينة ب فمُعطى عندنا إن هي بتنتج مية واحد وعشرين متر من القماش في خمس ساعات ونص. وخمس ساعات ونص نقدر نكتبها في صورة عدد عشري، يعني هنكتبها خمسة وخمسة من عشرة ساعة.

والمطلوب في السؤال إننا نحدد أي الماكينتين أسرع إنتاجًا. يعني عايزين نحدد أنهي ماكينة بتنتج أكبر عدد من أمتار القماش في أقل عدد من الساعات. بما إن مُعطى عندنا معدل إنتاج كل ماكينة، فمعنى كده إننا علشان نقارن بينهم يبقى عايزين نوجد معدل الوحدة لكل ماكينة فيهم. ومعدل الوحدة يعني عايزين نشوف كل ماكينة بتنتج كام متر من القماش في الساعة الواحدة.

فهنيجي عند الماكينة أ، اللي هي معدل إنتاجها مية تسعة وعشرين متر في تلات ساعات. فعشان نخلّي التلات ساعات ساعة واحدة، يعني التلاتة اللي في المقام عايزين نخليها واحد، يبقى هنقسم البسط والمقام على تلاتة. فلمّا نقسم في البسط مية تسعة وعشرين على تلاتة، هتبقى بتساوي تلاتة وأربعين. وأما في المقام فهنقسم تلاتة على تلاتة واللي هتساوي واحد. فبالتالي هيبقى هو ده معدل الوحدة. يعني معنى كده إن الماكينة بتنتج تلاتة وأربعين متر من القماش في الساعة الواحدة.

وبنفس الطريقة هنيجي عند الماكينة ب، وهنوجد معدل الوحدة. فهنلاحظ إن معدل إنتاج الماكينة ب هو مية واحد وعشرين متر في خمس ساعات ونص. فمعنى كده إننا علشان نوجد معدل الوحدة يبقى هنخلي الخمسة وخمسة من عشرة دي واحد. فعشان نعمل كده يبقى هنقسم البسط والمقام على خمسة وخمسة من عشرة. فهنيجي عند البسط اللي هو مية واحد وعشرين وهنقسمه على خمسة وخمسة من عشرة. فلمّا نحسبها هتبقى بتساوي اتنين وعشرين. وأما في المقام فهنقسم خمسة وخمسة من عشرة على خمسة وخمسة من عشرة، واللي هتساوي واحد. فمعنى كده إن هيبقى معدل إنتاج الماكينة ب في الساعة الواحدة هو اتنين وعشرين متر. يعني الماكينة بتنتج اتنين وعشرين متر في كل ساعة.

فكده يبقى إحنا قدرنا نوجد معدل الوحدة لكل ماكينة. فهنلاحظ هنا إن الماكينة أ بتنتج تلاتة وأربعين متر في كل ساعة. وأما الماكينة ب بتنتج اتنين وعشرين متر في كل ساعة. وبما إن تلاتة وأربعين أكبر من اتنين وعشرين، فبالتالي هيبقى إجابة السؤال: «أي الماكينتين أسرع إنتاجًا؟» هي الماكينة أ؛ لأن الماكينة أ بتنتج عدد أمتار من القماش في الساعة الواحدة أكبر من عدد الأمتار التي بتنتجها الماكينة ب في الساعة الواحدة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.