فيديو: حل المسائل بفك الأعداد من ١١ إلى ١٩‎

يعد رامي البسكوت. ملأ صندوقه ذي العشر خانات بعشر بسكوتات ولكن تبقى معه ٦. أين يمكن وضع البسكوت المتبقي لعده بسهولة؟ [أ] يجب عليه إزالته وعدم عدّه. [ب] يجب عليه عدّه بوضعه في نفس الصندوق ذي العشر خانات، وعدّه جميعه. [ج] يجب عليه عدّه بوضعه في صندوق جديد.

٠٣:٣٥

‏نسخة الفيديو النصية

يَعُدُّ رامي البسكوت. ملأ صندوقه ذي العشرة خانات بعشر بسكوتات. ولكن تبقَّى معه ستة. أين يمكن وضع البسكوت المتبقّي لِعَدّه بسهولة؟ أ: يجب عليه إزالته وعدم عدّه. ب: يجب عليه عدّه بوضعه في نفس الصندوق ذي العشر خانات، وعدّه جميعه. ج: يجب عليه عدّه بوضعه في صندوق جديد.

يعني إيه السؤال ده؟ السؤال بيقول لنا إن فيه ولد اسمه رامي، معاه مجموعة البسكوت دي، وكان بيعدّهم. فعلشان يعدّهم عمل إيه؟ جاب الصندوق ده. ده صندوق اسمه ذي العشر خانات؛ علشان فيه عشر خانات. وبدأ يعبّي فيه البسكوت. فلمّا عبّاه، اتبقّى معاه شوية بسكوت. يعني هو ملا الصندوق ده على آخره، حطّ في كل خانة هنا بسكوتة. وبعد ما عمل كده، اتبقّى معاه شوية بسكوت، يعمل فيهم إيه؟

هل يجب عليه إزالته، وعدم عدّه؟ يرميهم ما يعدّهمش؟ لأ طبعًا إحنا عاوزين نعدّ البسكوت كله، مش جزء منه. فده معناه إن الحل ده مش صح. طيب هل يجب عليه عدّه بوضعه في نفس الصندوق؟ طب ما هو الصندوق اتملا على آخره، نحطّ فيه تاني؟ إزاي؟ ده هو ما فيهوش مكان. يبقى برضو الإجابة دي مش صح؛ لأن الصندوق اتملا على آخره. طيب يعمل إيه؟ يجب عليه عدّه بوضعه في صندوق جديد. يجيب كمان صندوق، ويحطّ فيه البسكوت اللي اتبقّى معاه. يبقى هي دي الإجابة الصح؛ يجب عليه عدّه بوضعه في صندوق جديد.

طيب دلوقتي إحنا جاوبنا على أول جزء من السؤال. وإن هو يجب على رامي إنه يجيب صندوق جديد، علشان يحطّ فيه البسكوت اللي اتبقّى. وهو ده اللي واضح عندنا في الصورة. ده الصندوق القديم، وده الصندوق الجديد. الصندوق القديم العشر خانات مليانين على آخرهم. والصندوق الجديد فيه الباقي، أو باقي البسكوت اللي فاض مع رامي. السؤال بقى بعد كده بيقول لنا إيه؟ كم عدد البسكوت مع رامي؟

دلوقتي رامي معاه صندوقين من البسكوت. صندوق فيه عشرة اللي هو الصندوق ده، والصندوق التاني ده. طب الصندوق التاني ده، فيه كام بسكوتة؟ واحد، اتنين، تلاتة، أربعة، خمسة، ستة. الصندوق التاني فيه ستة. يبقى كده رامي معاه عشرة زائد ستة. عشرة زائد ستة تساوي إيه؟ ستاشر. يبقى ده معناه إن رامي معاه ستاشر بسكوتة. عشرة في الصندوق الأول، وستة باقيين في الصندوق التاني.

وبكده نكون جاوبنا على جزئين السؤال. أول جزء إجابته اللي هو يجب على رامي إنه يعدّ باقي البسكوت بإنه يعمل صندوق جديد. يجب عليه عدّه بوضعه في صندوق جديد. وتاني جزء من السؤال اللي بيسألنا عن عدد البسكوت، طلع عدد البسكوت كله ستاشر بسكوتة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.