فيديو: إيجاد طول ضلع شكل رباعي بمعلومية طول الضلع المُناظِر في شكل رباعي مُشابِه

إذا كان ﻙﺭﻝﻡ ∼ ﺹﻥﻉو، فأوجد قيمة ﺱ.

٠٢:٥٩

‏نسخة الفيديو النصية

إذا كان ك ر ل م يشابه ص ن ع و، فأوجد قيمة س.

يعني معطى عندنا إن الشكلين الرباعيين اللي في الشكل متشابهين. وخلينا نفتكر إن لمّا يكون عندنا شكلين متشابهين، فبيبقى أضلاعهم المتناظرة متناسبة، وفي نفس الوقت زواياهم المتناظرة متطابقة. فمعنى كده إن في الشكلين الرباعين اللي عندنا، هيبقى كل ضلعين متناظرين، ليهم نفس النسبة.

فيبقى عندنا الضلع ص و، الضلع المناظر ليه في الشكل التاني هو الضلع ك م. فبالتالي هتبقى النسبة بين الضلعين، اللي هي ص و على ك م، بتساوي النسبة بين أيّ ضلعين متناظرين في الشكلين اللي عندنا. فمن الشكل برضو هنلاحظ إن الضلع ع و، الضلع اللي بيناظره هو الضلع ل م. فمعنى كده إن النسبة بينهم هتبقى نفس النسبة بين الضلعين ص و، وَ ك م. فبالتالي هيبقى عندنا ص و على ك م يساوي ع و على ل م.

بعد كده هنعوّض عن طول كل ضلع بالقيمة المعطاة عندنا في الشكل. فهنلاحظ من الشكل إن ص و بيساوي تلتاشر. وَ ك م يساوي ستة س ناقص ستاشر. فبالتالي هيبقى تلتاشر على، ستة س ناقص ستاشر يساوي … وهنلاحظ من الشكل إن معطى عندنا ع و يساوي خمستاشر، وَ ل م يساوي تسعة س ناقص تلاتة وتلاتين. فبالتالي هتبقى المعادلة عندنا هي تلتاشر على، ستة س ناقص ستاشر يساوي خمستاشر على، تسعة س ناقص تلاتة وتلاتين.

بعد كده عشان نوجد قيمة س، أول حاجة هنعملها إننا هنعمل ضرب تبادلي. فهتبقى المعادلة عندنا بالشكل ده. بعد كده هنضرب تلتاشر؛ مرة في تسعة س، ومرة في تلاتة وتلاتين. فبالتالي هيبقى الطرف الأيمن للمعادلة هو مية وسبعتاشر س ناقص ربعمية تسعة وعشرين. بعد كده هنيجي عند الطرف الأيسر للمعادلة، وهنضرب خمستاشر؛ مرة في ستة س، ومرة في ستاشر. فهيبقى الطرف الأيسر للمعادلة بيساوي تسعين س ناقص ميتين وأربعين.

بعد كده علشان نخلّي س في طرف لوحدها من طرفَي المعادلة، يبقى هنطرح تسعين س من طرفَي المعادلة. فهتبقى المعادلة هي سبعة وعشرين س ناقص ربعمية تسعة وعشرين يساوي سالب ميتين وأربعين. بعد كده هنجمع ربعمية تسعة وعشرين على طرفَي المعادلة. فهتبقى المعادلة هي سبعة وعشرين س يساوي مية تسعة وتمانين.

بعد كده عشان نوجد قيمة س، يبقى هنقسم طرفَي المعادلة على سبعة وعشرين. فهيبقى الطرف الأيمن للمعادلة سبعة وعشرين س على سبعة وعشرين. ونقدر نختصر سبعة وعشرين مع سبعة وعشرين، فهيتبقّى س. وأمّا الطرف الأيسر، فهنقسم مية تسعة وتمانين على سبعة وعشرين. فلمّا نحسبها هتبقى بتساوي سبعة. وبالتالي هتبقى س تساوي سبعة. وهي دي قيمة س المطلوب إيجادها.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.