تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: مقارنة الجزء المقطوع من محور الصادات لدالتين خطيتين بمعلومية التمثيل البياني لإحداهما وجدول الدالة للأخرى

أحمد مدحت

أيُّ الدالتين لها أكبر جزء مقطوع من محور الصادات؟ [أ] شكل أ [ب] شكل ب

٠٢:٥٩

‏نسخة الفيديو النصية

عندنا في المثال دالتين، الدالة أ ممثلة بيانيًّا، والدالة ب عندنا جدول الدالة بتاعها، وعايزين نعرف أنهي دالة فيهم ليها أكبر جزء مقطوع من محور الصادات.

أول حاجة هنوجد المقطع الصادي أو الجزء المقطوع من محور الصادات للدالة الممثلة بيانيًّا، واللي هي الدالة أ، فهنلاحظ من خلال التمثيل البياني للدالة أ إن المستقيم اللي بيمثل الدالة بيقطع محور الصادات في النقطة دي، اللي الإحداثي السيني بتاعها هو صفر، أما الإحداثي الصادي فهو اتنين، يعني النقطة دي هي النقطة صفر واتنين؛ معنى كده إن هيبقى المقطع الصادي أو الجزء المقطوع من محور الصادات للدالة أ هو اتنين.

بعد كده هنوجد الجزء المقطوع من الصادات للدالة ب، فبالنسبة للدالة ب هنلاقي عندنا جدول الدالة، فهنستخدمه علشان نكتب معادلة المستقيم اللي بيمثل الدالة ب باستخدام صيغة الميل والمقطع، وصيغة الميل والمقطع هي ص تساوي م س زائد ب؛ بحيث إن م هتمثل ميل المستقيم، أما ب هتمثل المقطع الصادي. فأول حاجة هنوجد ميل المستقيم، يعني هنوجد م.

فصيغة ميل المستقيم المار بالنقطتين س واحد و ص واحد و س اتنين و ص اتنين، هي م يساوي ص اتنين ناقص ص واحد على س اتنين ناقص س واحد، فهنستخدم أي نقطتين من الجدول بتاع الدالة اللي عندنا، فهنفرض إن النقطة س واحد و ص واحد هي النقطة سالب اتنين وسالب سبعة، والنقطة س اتنين و ص اتنين هي النقطة سالب واحد وسالب تلاتة، بعد كده هنعوّض بيهم في صيغة ميل المستقيم؛ فهيبقى عندنا م، واللي هي ميل المستقيم، يساوي سالب تلاتة ناقص سالب سبعة على سالب واحد ناقص سالب اتنين، يعني م تساوي أربعة على واحد؛ يعني م تساوي أربعة. بكده إحنا وصلنا إن ميل المستقيم اللي بنرمز له بالرمز م هو أربعة.

بعد كده علشان نوجد المقطع الصادي للمستقيم هنستخدم أي نقطة من الجدول، فمثلًا هنستخدم النقطة واحد وخمسة، فهنستخدم صيغة الميل والمقطع وهي ص تساوي م س زائد ب، فهنعوّض فيها عن م بأربعة، وعن س بواحد، وعن ص بخمسة. فلما هنعوّض هيبقى عندنا خمسة يساوي أربعة في واحد زائد ب؛ حيث ب هي المقطع الصادي أو الجزء المقطوع من محور الصادات؛ معنى كده إن هيبقى خمسة تساوي أربعة زائد ب. ولما هنطرح من طرفَي المعادلة اللي عندنا أربعة، هيبقى عندنا ب بتساوي واحد. وبما إن ب بتمثل المقطع الصادي أو الجزء المقطوع من محور الصادات، بالتالي هيبقى الجزء المقطوع من محور الصادات للدالة ب هو واحد؛ بكده هيبقى الجزء المقطوع من محور الصادات للدالة أ أكبر من الجزء المقطوع من محور الصادات للدالة ب.