فيديو: إيجاد إحداثيات رءوس مثلث بعد الانتقال بمعلومية إحداثيات نقطة الأصل

أوجد صورة △ أ ب ﺟ؛ حيث إحداثيات أ، ب، ﺟ هي (−٧، −٧)، (٤، −٧)، (٢، ١) على الترتيب، بالانتقال (٣، ٢).

٠٤:٢٠

‏نسخة الفيديو النصية

أوجد صورة المثلث أ ب ﺟ؛ حيث إحداثيات أ، وَ ب، وَ ﺟ هي: الزوج المرتب سالب سبعة، وسالب سبعة. والزوج المرتب أربعة، وسالب سبعة. والزوج المرتب اتنين، وواحد. على الترتيب. بالانتقال الزوج المرتب تلاتة واتنين.

يعني معطى عندنا إحداثيات النقاط أ، وَ ب، وَ ﺟ. واللي هي عبارة عن رؤوس زوايا المثلث أ ب ﺟ. والمطلوب إننا نوجد صورة المثلث أ ب ﺟ، عن طريق الانتقال بمقدار تلاتة واتنين. والزوج المرتب تلاتة واتنين، معناها انتقال تلات وحدات في الاتجاه الموازي لمحور السينات، ووحدتين في الاتجاه الموازي لمحور الصادات.

وفي الأول خلينا نفتكر لو عندنا نقطة ما، وإحداثياتها س وَ ص، وعايزين نعمل انتقال للنقطة دي بمقدار أ وَ ب. فلو فرضنا مثلًا إن النقطة دي اسمها النقطة ع، فبالتالي هتبقى صورة النقطة بعد الانتقال هي الزوج المرتب س زائد أ، وَ ص زائد ب. يعني مشينا بمقدار أ في الاتجاه الموازي لمحور السينات، ومشينا بمقدار ب في الاتجاه الموازي لمحور الصادات. فبالتالي هتبقى هي دي إحداثيات النقطة. وبنقدر نسميها ع شرطة. فمعنى كده إن ع شرطة هي صورة النقطة ع، بعد ما حدث لها انتقال بمقدار أ وَ ب.

فبنفس الطريقة لمّا نيجي نشوف السؤال اللي عندنا، هنعمل انتقال للنقاط أ، وَ ب، وَ ﺟ بمقدار تلاتة واتنين. فمعنى كده إننا هنيجي عند الإحداثي السيني لكل نقطة، وهنجمع عليه تلاتة. وبنفس الطريقة هنيجي عند الإحداثي ص لكل نقطة، وهنجمع عليها اتنين.

فبالتالي لمّا نيجي عند النقطة أ اللي هي إحداثياتها سالب سبعة، وسالب سبعة. فعشان نعمل ليها انتقال بمقدار تلاتة واتنين، فهنعمل انتقال لنقطة أ بمقدار تلاتة واتنين. فمعنى كده إننا عشان نوجد صورة النقطة، يبقى هنجمع سالب سبعة زائد تلاتة، وهنكتبه في الإحداثي س لصورة النقطة. وصورة النقطة اللي هي أ شرطة. فيبقى الإحداثي س ليها بيساوي سالب سبعة زائد تلاتة، واللي هتساوي سالب أربعة. وبنفس الطريقة هنجمع سالب سبعة زائد اتنين، وهنكتبه في الإحداثي ص لصورة النقطة. وسالب سبعة زائد اتنين بتساوي سالب خمسة، فهنكتب هنا سالب خمسة. وبالتالي هتبقى إحداثيات النقطة أ شرطة، هي: سالب أربعة، وسالب خمسة.

وبنفس الطريقة هنيجي عند النقطة ب. واللي هي إحداثياتها أربعة، وسالب سبعة. فلمّا نعمل للنقطة ب انتقال، يبقى هنجمع أربعة زائد تلاتة هنا، وهنكتبها في الإحداثي س لصورة النقطة. وبالتالي هنحسب أربعة زائد تلاتة، واللي هتساوي سبعة. وبنفس الطريقة هنجمع سالب سبعة زائد اتنين، وهنكتبه في الإحداثي ص. وسالب سبعة زائد اتنين، بتساوي سالب خمسة. وبالتالي هتبقى صورة النقطة ب، اللي هي ب شرطة، إحداثياتها: سبعة، وسالب خمسة.

وبنفس الطريقة للنقطة ﺟ. واللي معطى عندنا إحداثياتها اتنين، وواحد. فبنفس الطريقة هنجمع اتنين زائد تلاتة، واللي هتساوي خمسة. فبالتالي هيبقى الإحداثي س لصورة النقطة، اللي هي ﺟ شرطة، هيبقى اتنين زائد تلاتة بخمسة. وبنفس الطريقة هنجمع واحد زائد اتنين، واللي هتساوي تلاتة. فبالتالي هتبقى إحداثيات النقطة ﺟ شرطة، هي: خمسة، وتلاتة.

وبكده يبقى إحنا أوجدنا إحداثيات التلات نقاط: أ شرطة، ب شرطة، وَ ﺟ شرطة. وبالتالي هتبقى صورة المثلث أ ب ﺟ بالانتقال تلاتة واتنين، هي: أ شرطة، واللي ليها الإحداثيات سالب أربعة، وسالب خمسة. وَ ب شرطة، واللي إحداثياتها سبعة، وسالب خمسة. وَ ﺟ شرطة، واللي إحداثياتها خمسة، وتلاتة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.