فيديو: إيجاد شدة التيار المار عَبْر ملف حلقي

ملف حلقي مستطيلي الشكل يحتوي على 2000 لفة حول قلبه الذي يبلغ ارتفاعه 0.10m. هناك حثٌّ ذاتي مقداره 0.040H في الملف الحلقي. ما مقدار التيار الكهربي خلال الملف الحلقي عندما تكون الطاقة في المجال المغناطيسي ‎2.0 × 10^−6J؟

٠٢:٠٩

‏نسخة الفيديو النصية

ملفّ حلقي مستطيل الشكل، يحتوي على ألفين لفّة حول قلبه، الذي يبلغ ارتفاعه عشرة من المية متر. هناك حثّ ذاتي مقداره أربعين من الألف هنري، في الملف الحلقي. ما مقدار التيار الكهربي خلال الملف الحلقي، عندما تكون الطاقة في المجال المغناطيسي اتنين في عشرة أُس سالب ستة جول؟

فإحنا عندنا ملف حلقي مستطيل الشكل. ومعنى إنه مستطيل الشكل، إن إحنا لو قطعنا من هنا كده، وبصّينا على قلبه من جوّه، هنلاقي قلبه على شكل مستطيل. ولكن الملفّ الحلقي نفسه، لمّا هنبصّ له من فوق، هنلاقيه على شكل دايرة. مش إن شكله من فوق على شكل مستطيل.

فالملفّ الحلقي ده، لو مَشينا فيه تيار، هنلاقي إن التيار ده بيعمل مجال مغناطيسي جوّه قلب الملفّ الحلقي. وكل ما بنزوّد التيار اللي ماشي في الملفّ الحلقي، هنلاقي المجال المغناطيسي جوّه الملفّ الحلقي زاد.

والمجال المغناطيسي اللي جوّه الملفّ الحلقي ده، بيخزّن طاقة. الطاقة دي، واللي هنسمّيها الطاقة المغناطيسية، بتساوي نص في معامل الحثّ في التيار الكهربي تربيع. ويظهر من القانون ده، إن كل ما التيار هيزيد، الطاقة المخزَّنة في المجال المغناطيسي هتزيد. وكل ما معامل الحثّ هيزيد، برضو الطاقة المغناطيسية هتزيد.

فإحنا مطلوب منّنا إن إحنا نعرف التيار الكهربي، اللي هيخلّي الطاقة اللي في المجال المغناطيسي في الملفّ، بتساوي اتنين في عشرة أُس سالب ستة جول. فعلشان نجيب التيار، هنضرب طرفين المعادلة في اتنين على 𝐿. وبعدين ناخد الجذر التربيعي للطرفين. فهنلاقي التيار الكهربي بيساوي اتنين في الطاقة اللي في المجال المغناطيسي، مقسومين على معامل الحثّ بتاع الملفّ.

فلمّا نعوّض بالقيم، هنلاقي إن التيار بيساوي الجذر التربيعي لاتنين في اتنين في عشرة أُس سالب ستة جول، مقسومين على أربعة من المية هنري. والهنري وحدته بتساوي جول على أمبير تربيع. فعلشان نعرف نختصر الوحدات، هنعوّض مكانه بجول على أمبير تربيع. فهنقدر كده نختصر الجول مع الجول. وهيطلع لنا إن التيار بيساوي واحد من المية أمبير.

وبكده نبقى عرفنا نجيب التيار اللي ماشي في ملفّ حلقي، بمعرفة الطاقة اللي متخزّنة في المجال المغناطيسي فيه.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.