نسخة الفيديو النصية
ما الطول الموجي لزلزال تردده تسعة هرتز، وقطع مسافة اتنين وتمانين كيلومتر خلال عشرين
ثانية؟
ففيه زلزال تردده تسعة هرتز. الزلزال ده قطع مسافة اتنين وتمانين كيلومتر خلال عشرين ثانية. والمطلوب منّنا إن إحنا نعرف الطول الموجي للزلزال ده.
فممكن نجيب الطول الموجي عن طريق القانون اللي بيقول إن سرعة الموجة بتساوي الطول الموجي
للموجة في تردد الموجة. وإحنا مُعطى عندنا التردد. أما السرعة فممكن نجيبها من قانون السرعة، واللي بيقول إن السرعة بتساوي المسافة على
الزمن. وكده نستنتج إن المسافة على الزمن بتساوي الطول الموجي مضروبة في التردد.
وعشان نجيب الطول الموجي، هنقسم طرفين المعادلة على التردد. وده هيدّينا إن الطول الموجي بيساوي المسافة على الزمن، في التردد. ونقدر دلوقتي نعوّض بالقيم المعطاة. وهنلاقي إن الطول الموجي بيساوي المسافة اللي بتساوي اتنين وتمانين كيلومتر، مقسوم على
الزمن واللي بيساوي عشرين ثانية، مضروب في التردد اللي هو تسعة هرتز.
وممكن نحوّل الهرتز لواحد على ثانية. فده هيخلينا نعرف نختصر الثانية مع الثانية، ونطلّع إن الطول الموجي بيساوي ربعمية ستة
وخمسين من الألف كيلومتر. وممكن نحوّل الطول الموجي للمتر، فهنلاقيه بيساوي ربعمية ستة وخمسين متر. وبكده يبقى طلّعنا الطول الموجي للزلزال بمعرفة تردده وسرعته.
