نسخة الفيديو النصية
في الفيديو ده، هنتكلّم عن تقريب الأعداد العشرية لأقرب عدد صحيح.
هنعرف إزّاي نقرّب العدد العشري باستخدام خطّ الأعداد. وكمان باستخدام قواعد التقريب. العدد واحد وتلاتة وتلاتين من مية ده عدد عشري، بيبقى فيه فصلة بتحدّد العلامة العشرية. وهنا عدد صحيح، وبعدين أرقام بعد العلامة العشرية. تقريبه لعدد صحيح بإن إحنا بنلغي الجزء اللي بعد العلامة العشرية. فبيبقى العدد يا إمّا هيتقرّب لواحد، أو للعدد اللي بعده، اللي هو اتنين. للعدد الأصغر اللي هو الواحد، أو الأكبر اللي هو الاتنين.
هنتكلّم في الفيديو ده إزّاي نحدّد إذا كان هيتقرّب للواحد ولّا للاتنين. فيه طريقتين للتقريب؛ استخدام خطّ الأعداد، أو استخدام قواعد التقريب. خطّ الأعداد ده بنحدّد عليه أماكن النقاط. يعني لو عندنا النقطة واحد، أو واحد وواحد من عشرة، بتتحطّ هنا عند الواحد وواحد من عشرة أو الواحد. والمسافات في التدريج بتبقى متساوية. طول فترة التدريج دي بتبقى متساوية. هنا واحد من عشرة. يعني الفرق ما بين الواحد وواحد من عشرة والواحد هو طول فترة التدريج.
لمّا بنمثّل العدد واحد وتلاتة وتلاتين من مية، فبنيجي بعد الواحد وتلاتة من عشرة، ونحطّ الواحد وتلاتة وتلاتين من مية. بتبقى أقرب للواحد وتلاتة من عشرة أكتر من ما تكون أقرب من الواحد والأربعة من عشرة. لتقريب العدد واحد وتلاتة وتلاتين من مية لأقرب عدد صحيح، فبنشوف على خطّ الأعداد هو أقرب للواحد ولّا للاتنين. يبقى تقريب الواحد وتلاتة وتلاتين من مية إلى أقرب عدد صحيح، هيبقى هو الواحد.
نستخدم الطريقة التانية، اللي هي باستخدام قواعد التقريب. نحطّ خطّ تحت الرقم المراد التقريب إليه، اللي هو هنا الآحاد. وبعدين نشوف الرقم الواقع على يمين الرقم ده. يعني اللي هو هنا التلاتة. ونشوف، من قواعد التقريب لو الرقم ده أقلّ من خمسة، فإن الرقم الذي تحته خطّ يبقى كما هو. وهنا التلاتة أقلّ من الخمسة، يبقى الواحد يبقى كما هو. إذن تقرّب الواحد وتلاتة وتلاتين من مية إلى الواحد. وهي دي نفس الإجابة اللي حصلنا عليها باستخدام خطّ الأعداد.
ناخد أمثلة كمان. ما قيمة تقريب الأربعتاشر وستة من عشرة لأقرب عدد صحيح؟
على خطّ الأعداد، الأربعتاشر وستة من عشرة أقرب للخمستاشر من الأربعتاشر؛ لأن هي معدّية نصّ المسافة ما بينهم بشويّة. يبقى قيمة تقريب الأربعتاشر وستة من عشرة لأقرب عدد صحيح هو الخمستاشر. ده باستخدام خطّ الأعداد. باستخدام قواعد التقريب، نحطّ خطّ تحت الرقم اللي عايزين نقرّب له، اللي هو الآحاد. وهنا قيمته أربعة. ونشوف اللي على يمينه، هنلاقي ستة؛ أكبر من الخمسة. يبقى في الحالة دي، الأربعة هتبقى خمسة؛ هتزيد واحد. يبقى التقريب لأقرب عدد صحيح هو خمستاشر.
قرّب تمنية وأربعين وأربعة وسبعين من مية إلى أقرب عدد صحيح.
هنستخدم قواعد التقريب. نحطّ خطّ تحت الآحاد اللي عايزين نقرّب له. ونشوف اللي على يمين الآحاد؛ لو كان أقلّ من الخمسة، يبقى التمنية دي تبقى كما هي. لو كان أكتر من الخمسة أو يساوي الخمسة، فبنزوّد التمنية واحد. يبقى هنا التقريب هيبقى تسعة وأربعين؛ لأن السبعة أكبر من الخمسة. وهي دي قيمة التقريب لأقرب عدد صحيح.
متوسّط ارتفاع جمل عربي واحد وخمسة وتسعين من مية متر. قرّب هذا الارتفاع لأقرب متر.
لأقرب متر، يعني لأقرب عدد صحيح. نحطّ واحد تحت خانة الآحاد، ونشوف اللي على يمينه، اللي هو تسعة. أكبر من الخمسة، يبقى الواحد هتزيد، هتبقى اتنين. يبقى التقريب هيبقى اتنين متر تقريبًا.
اتكلّمنا في الفيديو ده عن تقريب الأعداد العشرية بطريقتين؛ يا إمَّا باستخدام خطّ الأعداد، أو باستخدام قواعد التقريب. باستخدام خطّ الأعداد، بنشوف العدد أقرب للعدد اللي عَ اليمين ولّا لِلّي على اليسار. لو أقرب للعدد الصحيح اللي على اليمين، يبقى هيكبر. يبقى مثلًا لو كانت واحد وقيمة معيَّنة، هتبقى أقرب للاتنين. لكن لو كان أقرب لِلّي في اليسار، يبقى هيصغر. يبقى هيفضل واحد زيّ ما هو، هيبقى أقرب للواحد.
الطريقة التانية باستخدام قواعد التقريب. بنحطّ خطّ تحت الرقم اللي في الآحاد. وبعدين نشوف على يمينه الرقم اللي جاي بعده مباشرةً أصغر من الخمسة ولّا لأ. لو كان أصغر من الخمسة، يبقى الرقم اللي في الآحاد بيفضل زيّ ما هو. لكن لو كان خمسة فيما فوق، يبقى الرقم اللي في الآحاد هيزيد واحد.
