تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد معادلة خط مستقيم مُمثَّل بيانيًّا

أحمد لطفي

أوجد على الصورة ﺹ = ﻡﺱ + ﺟ معادلة الخط المستقيم الذي يمثله الرسم البياني التالي.

٠٢:٤٩

‏نسخة الفيديو النصية

اوجد على الصورة، ص بتساوي م س زائد ج، معادلة الخط المستقيم الذي يمثله الرسم البياني التالي.

في البداية بالنسبة للمعادلة ص بتساوي م س زائد ج، هنلاحظ إن م بتمثل ميل الخط المستقيم، و ج بتمثل الإحداثي الصادي لنقطة التقاطع للخط المستقيم مع محور الصادات؛ وبالتالي عشان نقدر نوجد معادلة الخط المستقيم، محتاجين الأول نوجد ميل الخط المستقيم.

والعلاقة المستخدمة لإيجاد ميل الخط المستقيم هتكون على الصورة: لو عندنا نقطتين؛ أول نقطة هي س واحد و ص واحد، وتاني نقطة هي س اتنين و ص اتنين؛ فالميل بنقدر نوجده عن طريق إننا بنقول الميل بيساوي ص اتنين ناقص ص واحد مقسوم على س اتنين ناقص س واحد.

وبالنسبة للخط المستقيم المعطى، هنلاحظ إن الخط المستقيم بيمر بالنقطتين واحد وسالب واحد، وسالب اتنين وسبعة؛ وبالتالي عشان نوجد الميل هنعوض بالنقطتين … ممكن نرمز للنقطة الأولى اللي هي واحد وسالب واحد بـ س واحد ص واحد، ممكن نرمز للنقطة التانية اللي هي سالب اتنين وسبعة بـ س اتنين و ص اتنين؛ وبالتالي الميل هيساوي ص اتنين اللي هي سبعة، ناقص ص واحد اللي هي سالب واحد، الكل مقسوم على س اتنين اللي هي سالب اتنين ناقص س واحد، اللي هي بواحد. يعني الميل هيساوي سالب تمنية على تلاتة. وبكده نكون قدرنا نوجد ميل الخط المستقيم؛ وبالتالي بالتعويض في معادلة الخط المستقيم، هيكون عندنا ص بيساوي سالب تمنية على تلاتة س زائد ج.

عشان نوجد قيمة ج ممكن نستخدم أي نقطة معطاة ونعوض بيها في معادلة الخط المستقيم، وبالتالي نقدر نوجد ج. هنستخدم النقطة سالب اتنين وسبعة، يعني هنعوض عن س بسالب اتنين، وعن ص بسبعة؛ وبالتالي هيكون عندنا سبعة هتساوي سالب تمنية على تلاتة في سالب اتنين زائد ج؛ يعني ج هتساوي خمسة على تلاتة. يبقى كده قدرنا نوجد قيمة م وقيمة ج؛ وبالتالي في التعويض في معادلة الخط المستقيم هيكون عندنا ص بتساوي سالب تمنية على تلاتة س زائد خمسة على تلاتة.