تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: الأنماط

نهال عصمت

يتناول الفيديو كيفية تحديد الأنماط، ووصفها، ويوضح ذلك بالأمثلة.

٠٣:٣٥

‏نسخة الفيديو النصية

الأنماط.

هنتكلم عن الأنماط، ووصْفها. وهنعرف إزاي نحدّد الأنماط. ممكن الأنماط تكون بتزيد، وممكن تكون بتقلّ. بمعنى لو عندنا نمط بالشكل ده، هنلاحظ إن عندنا النمط هو أول حاجة مربعين. بعد كده عندنا أربع مربعات. بعد كده ست مربعات. هنلاحظ إن في كل مرة النمط بيزيد بمقدار اتنين.

يعني أول حاجة مربعين، زوّدنا عليهم اتنين بقوا أربع مربعات. والأربعة لمّا زوّدنا عليها اتنين بقوا ست مربعات. يبقى معنى كده إن النمط اللي موجود قدامنا ده، هو نمط بيزيد بمقدار اتنين. يعني لو حبينا نكمل النمط، هنبدأ نزوّد كمان مربعين، هيبقى النمط عبارة عن تمن مربعات بالشكل ده. يبقى كده النمط عندنا بقى عبارة عن: اتنين، أربعة، ستة، تمنية. في كل مرة النمط بيزيد بمقدار اتنين.

هنبدأ نيجب صفحة جديدة، ونشوف أمثلة أخرى. المطلوب أكمل النمط الآتي.

عايزين نكمّل النمط اللي موجود قدامنا. هنلاحظ إن النمط عبارة عن نجمة واحدة. بعد كده نجمتين. بعد كده تلات نجمات. بعد كده أربعة نجمات. معنى كده إن النمط في كل مرة بيزيد بمقدار واحد. يبقى عشان نقدر نكمّل النمط، هنزوّد على أربعة، واحد. هيبقى عندنا خمس نجمات بالشكل ده. يبقى كده قدرنا نكمّل النمط، وهو: واحد، اتنين، تلاتة، أربعة، خمسة. يبقى آخر حاجة خمس نجوم.

هنجيب صفحة جديدة ونشوف نمط تاني عايزين نكمّله. في البداية هنبدأ نبصّ على النمط اللي قدامنا، عشان نعرف نكمّله. هنلاحظ إن النمط في البداية عبارة عن ستاشر مثلث. بعد كده النمط بقى عبارة عن اتناشر مثلث. وبعديها النمط بقى عبارة عن تمن مثلثات. يبقى هنلاحظ إن في كل مرة النمط بيقلّ بمقدار أربعة. يبقى ستاشر لمّا شِلنا منها أربعة، بقى عندنا اتناشر مثلث. والاتناشر لمّا شِلنا منهم أربعة، بقى عندنا تمن مثلثات. يبقى لو عايزين نكمّل النمط، هنشيل من التمنية أربعة. هيبقى عندنا أربع مثلثات بالشكل ده. يبقى كده النمط بقى عبارة عن: ستاشر، اتناشر، تمنية، أربعة. يبقى كده عندنا النمط بيقلّ.

يبقى كده اتكلمنا عن الأنماط. وعرفنا إزاي نحدّد النمط. وعرفنا شكل النمط لمّا بيزيد، وشكل النمط لمّا يكون بيقلّ.