فيديو: حل المسائل التي تتضمن زوايا متتامة

في الشكل الموضّح، أ ب خط مستقيم. أجب على الأسئلة التالية. [أ] اكتب معادلة تُتيح حساب قيمة س. [ب] أوجد قيمة س.

٠٣:٠٦

‏نسخة الفيديو النصية

في الشكل الموضّح أ ب خط مستقيم. أجب على الأسئلة التالية.

السؤال ده فيه أكتر من مطلوب، والمطلوب الأول عندنا: اكتب معادلة تُتيح حساب قيمة س.

ومُعطى عندنا الشكل اللي قدامنا، ومُعطى في السؤال إن أ ب خط مستقيم. وبما إن أ ب خط مستقيم؛ فبالتالي هتبقى الزاوية دي زاوية مستقيمة، يعني زاوية قياسها مية وتمانين درجة. وفي الأول خلينا نفرض إن النقطة دي اسمها ج، والنقطة هنا اسمها د؛ فمن الشكل هنلاحظ إن الزاويتين أ ج د وَ ب ج د هما زاويتين متكاملتين؛ لأن هم الاتنين بيكوّنوا الزاوية المستقيمة اللي على الخط المستقيم أ ب. وخلينا نفتكر إن الزاويتين المتكاملتين هما الزاويتين اللي مجموع قياسهم مية وتمانين درجة؛ وبالتالي هيبقى قياس الزاوية أ ج د زائد قياس الزاوية ب ج د بيساوي مية وتمانين درجة. ومُعطى عندنا في السؤال إن قياس الزاوية أ ج د مية واتناشر درجة، فهنعوّض عنها في المعادلة. وأما الزاوية ب ج د فمُعطى إن قيمتها ستة س زائد أربعتاشر، فهتبقى المعادلة مية واتناشر زائد ستة س زائد أربعتاشر بتساوي مية وتمانين. بعد كده هنجمع مية واتناشر زائد أربعتاشر، فلمّا نجمعها هتبقى بتساوي مية ستة وعشرين؛ فبالتالي هتبقى المعادلة اللي بنقدر منها نوجد منها قيمة س هي: ستة س زائد مية ستة وعشرين بتساوي مية وتمانين، فهنكتب المعادلة على جنب، جنب المطلوب الأول، وبعد كده هنشوف المطلوب التاني في السؤال.

والمطلوب التاني في السؤال: أوجد قيمة س.

فهنستخدم المعادلة اللي أوجدناها في المطلوب الأول علشان نوجد قيمة س، فهتبقى المعادلة هي ستة س زائد مية ستة وعشرين بتساوي مية وتمانين، وعشان نخلّي ستة س في طرف لوحدها من المعادلة، يبقى هنطرح مية ستة وعشرين من طرفَي المعادلة، فهيبقى الطرف الأيمن للمعادلة ستة س زائد مية ستة وعشرين ناقص مية ستة وعشرين بتساوي ستة س، وأما الطرف الأيمن للمعادلة هيبقى مية وتمانين ناقص مية ستة وعشرين واللي بتساوي أربعة وخمسين. بعد كده عشان نوجد قيمة س يبقى هنقسم طرفَي المعادلة على ستة، فهيبقى الطرف الأيمن للمعادلة ستة س على ستة، فنختصر ستة مع ستة فهيبقى س، وأما الطرف الأيسر للمعادلة فهنقسم أربعة وخمسين على ستة، فلمّا نحسبها هتبقى بتساوي تسعة؛ وبالتالي هيبقى قيمة س هي تسعة، وهي دي إجابة المطلوب التاني. وبكده يبقى جاوبنا على كل مطاليب السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.