فيديو: كتابة معادلات الجمع والطرح وحلها

أحمد مدحت

يوضح الفيديو كيفية كتابة معادلات الجمع والطرح، وحلها عقليًّا، مع أمثلة توضيحية.

٠٨:١٩

‏نسخة الفيديو النصية

هنتكلّم عن كتابة معادلات الجمع والطرح وحلها. هدفنا من الفيديو ده، إن إحنا نعرف نكتب معادلات الجمع والطرح. بعد كده هنحل المعادلات دي عقليًّا. يعني من غير استخدام الآلة الحاسبة. وده هنعرفه من خلال أمثلة. فهنبدأ بالمثال الأول. في المثال الأول، ميّ عندها تسع ألعاب. ووالدتها أهدتها ألعاب تانية. فبقى عندها اتناشر لعبة. عايزين نعرف كم لعبة والدتها أهدتها لها.

علشان نعرف كام لعبة والدة ميّ أهدتها لها، محتاجين إن إحنا نكتب المعادلة المناسبة. وعلشان نكتب المعادلة، هنركز في الجمل المعطاة. فهنلاقي إن ميّ عندها تسع ألعاب. ووالدتها أهدتها ألعاب تانية. يعني الألعاب بتاعة ميّ زادت. معنى كده إن ميّ بقى معاها تسع ألعاب، بالإضافة إلى الألعاب التانية، اللي والدتها أهدتها لها. وبكده بقى مع ميّ اتناشر لعبة.

بكده التسع ألعاب اللي كانوا مع ميّ في الأول، بالإضافة إلى الألعاب التانية، اللي والدتها أهدتها لها. هيساووا كلهم اتناشر لعبة. كده إحنا قدرنا نفسّر الجمل المعطاة.

بعد كده علشان نكتب المعادلة، محتاجين نحدّد المتغيّر اللي موجود في المعادلة. فإحنا هنلاقي إن إحنا عايزين نوجد الألعاب الأخرى، اللي والدة ميّ أهدتها لها. يعني الألعاب الأخرى دي هي المجهولة. فهنبدأ نديها رمز معيّن، ولْيكُن س. بكده س هتمثّل عدد الألعاب الأخرى. بعد كده هنبدأ نكتب المعادلة.

ففي الأول ميّ كان معاها تسع ألعاب، فهنكتب تسعة. بعد كده هنضيف عَ التسع ألعاب دول، الألعاب الأخرى، فهنكتب زائد. والألعاب الأخرى دي بنمثّلها بالمتغير س، فهنكتب س. بعد كده هنلاقي إن التسع ألعاب، بالإضافة إلى ألعاب أخرى، بيساوي اتناشر. فهنكتب يساوي اتناشر. بكده بقت المعادلة هي تسعة زائد س يساوي اتناشر.

بعد كده عايزين نحل المعادلة دي، علشان نوجد قيمة س. واللي بتمثّل عدد الألعاب اللي أهدتها والدة ميّ ليها. فهنحل المعادلة دي عقليًّا، من غير استخدام الآلة الحاسبة. فإحنا عايزين نوجد قيمة س. فهنفكر إيه هو العدد اللي نضيفه للتسعة، يكون الناتج اتناشر. فلمّا هنفكر، هنلاقي إن العدد ده هو تلاتة. وده لأن تسعة زائد تلاتة، يساوي اتناشر.

معنى كده إن س تساوي تلاتة. وبما إن س تساوي تلاتة. وَ س بتمثّل عدد الألعاب التانية، اللي أهدتها والدة ميّ ليها. فهيبقى عدد الألعاب اللي أهدتها والدة ميّ ليها، هي تلات ألعاب. بكده إحنا خلّصنا المثال الأول. بعد كده هنشوف المثال التاني.

في المثال التاني عندنا عمر في النص الأول من مباراة كرة السلة، أحرز أربعتاشر نقطة. وفي نهاية المباراة، كان مجموع النقط اللي أحرزها، هي ستة وتلاتين نقطة. عايزين نكتب معادلة، علشان نوجد عدد النقط اللي أحرزها عمر في النص التاني من المباراة. بعد كده هنحل المعادلة دي.

أول حاجة هنعملها، إن إحنا هنركز في الجمل المعطاة عندنا. وإحنا عندنا إن في النص الأول، من مباراة كرة سلة، عمر أحرز أربعتاشر نقطة. وفي نهاية المباراة، مجموع النقط اللي أحرزها عمر، ستة وتلاتين نقطة. معنى كده إن هيبقى الأربعتاشر نقطة اللي أحرزهم عمر في النص الأول من المباراة. زائد عدد النقط اللي أحرزها في النص التاني من المباراة. يساوي ستة وتلاتين نقطة.

بكده بعد ما فسرنا الجمل المعطاة، هنبدأ نحدّد المتغيّر اللي هيكون عندنا في المعادلة. فهنلاقي إن إحنا عايزين نوجد عدد النقط اللي أحرزها عمر في النص التاني من المباراة. فبالتالي هتبقى هي المجهول. فهنبدأ ندّيها رمز معيّن، ولْيكُن ص. بكده ص هتمثّل عدد النقط اللي أحرزها عمر في النص التاني من المباراة.

فهنبدأ نكتب المعادلة. عندنا في الأول أربعتاشر نقطة، فهنكتب أربعتاشر. وهنزوّد عَ الأربعتاشر عدد النقط اللي أحرزها عمر في النص التاني من المباراة، يعني هتبقى أربعتاشر زائد ص. والأربعتاشر نقطة، زائد عدد النقط اللي أحرزها عمر في النص التاني من المباراة، بيساوي ستة وتلاتين نقطة. يعني هتبقى أربعتاشر زائد ص يساوي ستة وتلاتين. بكده المعادلة هي: أربعتاشر زائد ص يساوي ستة وتلاتين.

بعد كده هنحل المعادلة دي عقليًّا. يعني هنوجد قيمة ص. فهنفكر إيه هو العدد، اللي لمّا نضيفه لأربعتاشر، يكون الناتج هو ستة وتلاتين. هنلاقي العدد ده هو اتنين وعشرين. وده لأن أربعتاشر زائد اتنين وعشرين، يساوي ستة وتلاتين. معنى كده ص تساوي اتنين وعشرين. وَ ص دي بتمثّل عدد النقط اللي أحرزها عمر في النص التاني من المباراة. معنى كده إن عمر أحرز في النص التاني من المباراة، اتنين وعشرين نقطة.

بعد كده هنشوف المثال التالت. عندنا في المثال التالت فيه حافلة عدد الركاب فيها هو أربعتاشر راكب. وفي إحدى المحطات، نزل عدد منهم. فاتبقّى في الحافلة تمن ركاب. عايزين نعرف كام راكب نزل مِ الحافلة في تلك المحطة.

علشان نوجد عدد الركاب، اللي نزلوا من الحافلة في المحطة، هنحتاج إن إحنا نكتب معادلة. فهنبدأ نفسّر الجمل المعطاة عندنا. فلمّا هنرجع للجمل المعطاة، هنلاقي إن عدد الركاب اللي كانوا في الحافلة، هو أربعتاشر راكب. وفي محطة معينة، نزل عدد من الركاب. فاتبقّى في الحافلة تمن ركاب. معنى كده إن عدد الركاب اللي في الحافلة، واللي هو أربعتاشر راكب. لمّا هنطرح منه عدد الركاب اللي نزلوا في المحطة. هيساوي عدد الركاب اللي اتبقّوا في الحافلة، واللي هو تمن ركاب.

كده إحنا قدرنا نفسّر الجمل اللي عندنا. بعد كده هنحدّد المتغيّر اللي هيكون في المعادلة. فإحنا عايزين نوجد عدد الركاب اللي نزلوا من الحافلة في المحطة. معنى كده إن عدد الركاب اللي نزلوا في المحطة، هو المجهول. فهنبدأ ندّيله رمز معيّن، ولْيكُن ر. معنى كده إن ر هتمثّل عدد الركاب اللي نزلوا من الحافلة في المحطة. كده إحنا حدّدنا المتغيّر. بعد كده هنكتب المعادلة.

فإحنا عندنا أربعتاشر راكب، فهنكتب أربعتاشر. وهنطرح من الأربعتاشر عدد الركاب اللي نزلوا، يعني هتبقى أربعتاشر ناقص ر. وبما إن الأربعتاشر راكب، لمّا نطرح منه عدد الركاب اللي نزلوا، هيساوي تمن ركاب. فهيبقى أربعتاشر ناقص ر يساوي تمنية. يعني المعادلة هي: أربعتاشر ناقص ر يساوي تمنية.

كده إحنا أوجدنا المعادلة. بعد كده هنحل المعادلة دي. يعني هنوجد قيمة ر. وده لأن إحنا عايزين نوجد عدد الركاب اللي نزلوا من الحافلة في المحطة. واللي بيمثّله المتغيّر ر. فهنبدأ نحل المعادلة اللي عندنا عقليًّا؛ علشان نوجد قيمة ر.

فهنفكر إيه هو العدد، اللي لمّا نطرحه من أربعتاشر، يكون الناتج تمنية. هنلاقي العدد ده هو ستة. وده لأن أربعتاشر ناقص ستة، يساوي تمنية. بالتالي ر تساوي ستة. وبالنسبة لِـ ر، فهي بتمثّل عدد الركاب اللي نزلوا في المحطة. معنى كده إن نزل ست ركاب من الحافلة في المحطة.

بعد كده هنشوف مثال كمان. عندنا في المثال الرابع، فيه قطع حلوى موجودة في كيس. فإذا أكل شادي منها أربع قطع، واتبقّى في الكيس تمن قطع. عايزين نعرف كام قطعة حلوى كانت في الكيس.

علشان نعرف كام قطعة حلوى كانت في الكيس، فإحنا محتاجين نكتب معادلة. بالتالي هنبدأ نفسّر الجمل المعطاة. فإحنا في الأول كان عندنا قطع حلوى موجودة في كيس. أكل شادي من قطع الحلوى دي، أربع قطع. بالتالي عدد قطع الحلوى اللي موجودة في الكيس، هنطرح منه أربع قطع.

ولمّا أكل شادي أربع قطع، اتبقّى في الكيس تمن قطع. معنى كده إن عدد قطع الحلوى اللي موجودة في الكيس، لمّا هنطرح منها أربع قطع، هيساوي التمن قطع الباقيين. كده إحنا قدرنا نفسّر الجمل المعطاة. بعد كده هنبدأ نحدّد المتغيّر اللي موجود في المعادلة.

فإحنا عايزين نوجد عدد قطع الحلوى، اللي كانت في الكيس. يعني عدد قطع الحلوى، هيبقى هو المجهول. فهنبدأ نديله رمز معيّن، ولْيكُن هـ. معنى كده إن هـ بتمثّل عدد قطع الحلوى اللي كانت في الكيس. كده بعد ما حدّدنا المتغيّر، هنبدأ نكتب المعادلة.

فأول حاجة عندنا عدد قطع الحلوى اللي كانت في الكيس. واللي بيمثّله المتغيّر هـ. فأول حاجة هنكتب هـ. مطروحًا منه أربع قطع، يعني هـ هنطرح منها أربعة. وعدد قطع الحلوى، لمّا هنطرح منه أربع قطع، الباقي هيبقى تمن قطع. يعني هـ ناقص أربعة، يساوي تمنية. بكده المعادلة هي: هـ ناقص أربعة يساوي تمنية.

بعد كده عايزين نوجد عدد قطع الحلوى اللي كانت في الكيس، واللي بيمثّله المتغيّر هـ. بالتالي هنحل المعادلة اللي عندنا عقليًّا، علشان نوجد قيمة هـ. فهنفكر إيه هو العدد، اللي لمّا نطرح منه أربعة، هيكون الناتج تمنية. هنلاقي العدد هو اتناشر. وده لأن اتناشر ناقص أربعة، يساوي تمنية. بالتالي هـ تساوي اتناشر. وبما إن هـ بتمثّل عدد قطع الحلوى اللي كانت في الكيس، معنى كده إن كان في الكيس اتناشر قطعة حلوى.

بكده يبقى إحنا في الفيديو ده، عرفنا إزّاي نكتب معادلات الجمع والطرح. فكُنا أول حاجة بنفسّر الجمل المعطاة عندنا. بعد كده بنحدّد المتغيّر اللي هيكون في المعادلة. بعد كده بنكتب المعادلة. وبعد ما بنكتب المعادلة، بنحلها عقليًّا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.