تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: معامل النمو للدوال الأُسِّية

أحمد لطفي

يوضح الفيديو معامل النمو المستخدَم في تمثيل دوال النمو الأُسِّي.

٠٢:٤٦

‏نسخة الفيديو النصية

هنتكلم عن معامل النمو للدوال الأسية، وهنعرف إيه هو معامل النمو المستخدَم في تمثيل دوال النمو الأسي.

في البداية هنقول عندنا دالة بالشكل ده، أ ن بتساوي أ في واحد زائد ر الكل أس ن. نقدر نستخدم الدالة دي في تمثيل النمو الأسي بزيادة ثابتة بالنسبة المئوية خلال فترة زمنية محددة؛ يعني بنوجد قيمة أ ن بعد ن فترة زمنية، وأ هي قيمة ابتدائية، ور هي نسبة الزيادة لكل فترة زمنية. وأساس المقدار الأسي اللي هو واحد زائد ر يسمى معامل النمو. وبتُستخدم دالة النمو الأسي عادةً في نماذج الزيادة السكانية. في صفحة جديدة هناخد مثال، لو عندنا مثال بالشكل ده،

إذا كان عدد السكان في دولةٍ ما يساوي تلاتة مليون وتسعمية تسعة وعشرين ألف وميتين وأربعتاشر، والزيادة السكانية تساوي تقريبًا اتنين وتلاتة من مية في المية سنويًّا. الدالة أ ن هتكون بالشكل ده، هنلاحظ إن أ هي قيمة ابتدائية؛ يعني هتساوي تلاتة مليون وتسعمية تسعة وعشرين ألف وميتين وأربعتاشر. والنسبة المئوية اللي هي اتنين وتلاتة من مية في المية هي عبارة عن ر، اللي هي بتمثل نسبة الزيادة لكل فترة زمنية؛ يعني ممكن نكتب ر في صورة ميتين وتلاتة من عشرة آلاف، يبقى أ ن هيساوى تلاتة مليون وتسعمية تسعة وعشرين ألف وميتين وأربعتاشر مضروب في واحد زائد ميتين وتلاتة من عشرة آلاف الكل أس ن؛ يعني هيساوي تلاتة مليون وتسعمية تسعة وعشرين ألف وميتين وأربعتاشر الكل مضروب في واحد وميتين وتلاتة من عشرة آلاف الكل أس ن. لو عايزين نشوف التمثيل البياني للدالة أ ن فهتكون بالشكل ده.

ويبقى في النهاية عرفنا إيه هو معامل النمو، وعرفنا إزاي بنقدر نستخدمه في تمثيل دوال النمو الأسي.