فيديو: إيجاد النسبة بين محيطَيْ مربع ومستطيل

مربع طول ضلعه ٢ سم، ومستطيل طوله ٧ سم، وعرضه ٥ سم. أوجد النسبة بين محيط المربع ومحيط المستطيل لأبسط صورة.

٠٢:٠٢

‏نسخة الفيديو النصية

مربع طول ضلعه اتنين سنتيمتر. ومستطيل طوله سبعة سنتيمتر، وعرضه خمسة سنتيمتر. أوجد النسبة بين محيط المربع ومحيط المستطيل لأبسط صورة.

يعني معطى عندنا إن فيه مربع طول ضلعه اتنين سنتيمتر. ومعطى إن فيه مستطيل طوله سبعة سنتيمتر، وعرضه خمسة سنتيمتر. والمطلوب إننا نوجد النسبة بين محيط المربع ومحيط المستطيل لأبسط صورة. وخلّينا في الأول نفتكر إن محيط المربع بيساوي مجموع أطوال أضلاعه، أو بيساوي أربعة في طول الضلع. وطول الضلع بنرمز له بالرمز ل. بما إن معطى عندنا طول ضلع المربع اتنين سنتيمتر، فبالتالي هيبقى محيط المربع بيساوي أربعة في اتنين. واللي بتساوي تمنية سنتيمتر. فبكده يبقى قدرنا نوجد محيط المربع.

بعد كده عايزين نوجد محيط المستطيل. وخلّينا في الأول نفتكر إن محيط المستطيل بيساوي اتنين في، الطول زائد العرض. وبما إن معطى عندنا طول المستطيل سبعة سنتيمتر، وعرضه خمسة سنتيمتر. فبالتالي هيبقى محيط المستطيل بيساوي اتنين في، سبعة زائد خمسة. فلمّا نحسب المقدار ده هيبقى بيساوي أربعة وعشرين. وبالتالي هيبقى محيط المستطيل هو أربعة وعشرين سنتيمتر.

فبالتالي هتبقى النسبة بين محيط المربع ومحيط المستطيل هي تمنية إلى أربعة وعشرين. لكن المطلوب مننا إننا نوجد النسبة لأبسط صورة. فبالتالي علشان نبسّط النسبة تمنية إلى أربعة وعشرين، يبقى هنقسم الطرفين على تمنية. فلمّا نقسم تمنية على تمنية هتبقى بتساوي واحد. ولمّا نقسم أربعة وعشرين على تمنية هتبقى بتساوي تلاتة.

فبالتالي هتبقى النسبة عندنا واحد إلى تلاتة. وكتبناها في أبسط صورة. فبالتالي هتبقى هي دي النسبة بين محيط المربع ومحيط المستطيل.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.