فيديو: الأعداد الصحيحة وتمثيلها

سوزان فائق

يوضح الفيديو التعبير عن الأعداد الصحيحة السالبة والموجبة، وكيفية تمثيل الأعداد الصحيحة على خط الأعداد.

٠٤:٢٠

‏نسخة الفيديو النصية

هنتكلم في الفيديو ده عن الأعداد الصحيحة وتمثيلها. للتعبير عن الأعداد الصحيحة أقلّ من الصفر، بنستخدم الأعداد السالبة. ودي بنرمز لها بإشارة سالبة، بالشكل ده. الأعداد أكبر من الصفر، بنقول عليها الأعداد الموجبة. ونرمز لها بالرمز موجب العدد.

بنرسم خط الأعداد في الحالة دي بالشكل ده. الصفر في المنتصف. شماله يبقى سالب واحد، سالب اتنين، سالب اتنين، وهكذا … لغاية الآخِر خط الأعداد. وعلى يمين الصفر، هيبقى موجب واحد، موجب اتنين، موجب تلاتة. على شمال الصفر بيبقى الأعداد السالبة. على يمين الصفر الأعداد الموجبة. والصفر ليس سالب أو موجب.

في حاجة عندنا اسمها معكوس الأعداد. يعني العدد تلاتة له معكوس، هو السالب تلاتة. الموجب واحد له معكوس، هو السالب واحد. بنعرفه إزاي؟ هو يبقى نفس المسافة مِ الناحية اليمين، هو نفس المسافة مِ الناحية الشمال. موجب تلاتة نفس المسافة مِ ناحية اليمين، وسالب تلاتة مِ الناحية الشمال.

الأعداد الموجبة، والصفر، والأعداد السالبة بيكوّنوا لنا الأعداد الصحيحة. الأعداد الصحيحة بيتمّ تمثيلها على خط الأعداد، بإن إحنا بنحطّ مكانها نقطة. يعني لو عايز نمثّل موجب اتنين، يبقى هنحطّ عند الموجب اتنين كده، وهنحطّ نقطة، بالشكل ده. عايزين نمثّل السالب واحد، هنروح عند السالب واحد، ونعمل نقطة بالشكل ده.

نقلب الصفحة، وناخد أمثلة عَ الكلام ده. بيقول لنا: اكتب عدد صحيح يعبّر عمّا يأتي. بيقول لنا: منى وفّرت تمنية وأربعين جنيه. معنى كلمة «وفّرت»، يعني زوّدت الفلوس اللي عندها. يبقى معنى كده إن الزيادة دي، يعني معناها إنها حاجة موجبة. يبقى هنعبّر عن التمنية وأربعين اللي وفّرتها منى، بموجب تمنية وأربعين. أو ممكن بس نقول تمنية وأربعين.

بيقول لنا: غطّاس سبح إلى عمق تمنية متر تحت سطح البحر. «إلى عمق تحت سطح البحر»، يبقى معنى كده إن إحنا بنتكلم إن هو نزل تحت. يعني لو اعتبرنا سطح البحر ده الصفر، يبقى التمنية دي هتُعتبر سالب تمنية، اللي هي تحت سطح البحر.

بيقول لنا: ارسم خط الأعداد، ومثّل النقطة سالب سبعة. هنرسم خط الأعداد بالشكل ده. على شمال الصفر الأعداد السالبة. وإحنا عايزين نمثّل النقطة سالب سبعة. هنيجي نشوف مكان السالب سبعة فين. هنلاقيها هنا. هنعمل نقطة كده مكانها.

مش لازم لمّا نيجي نرسم خط الأعداد، تكون اللي على يمين الصفر، هو نفس الأعداد اللي موجودة على شمال الصفر. يعني ممكن هنا عَ اليمين بس لغاية الخمسة. والصفر على شمالها يبقى لغاية سالب تمنية.

بيقول لنا سؤال كمان: اكتب معكوس كل عدد صحيح فيما يأتي. عشان نجيب المعكوس هنعمل إيه؟ هنشوف السالب تمنية دي مكانها فين، هنلاقيها على شمال الصفر. هنروح في الاتجاه المخالف للصفر، اللي هو ناحية الموجب، ونعدّ نفس العدد بالظبط. يعني السالب تمنية، هنعدّ في الناحية الموجبة تمنية. يبقى المعكوس بتاع السالب تمنية، هو التمنية، أو موجب تمنية.

طيب نفس الكلام بالنسبة لسالب تلاتة. السالب تلاتة في الناحية السالبة. يبقى هنروح في الناحية الموجبة، وناخد نفس المسافة بالظبط، اللي هي تلاتة. يبقى كده موجب تلاتة. التسعتاشر في الناحية الموجبة، يبقى هنروح في الناحية السالبة زيّها. يبقى سالب تسعتاشر. الاتنين وأربعين في الناحية الموجبة، يبقى هنروح زيّها في الناحية السالبة. يبقى سالب اتنين وأربعين.

يبقى اتكلمنا في الفيديو ده … إيه هي الأعداد الموجبة. إيه هي الأعداد السالبة. إيه هي الأعداد الصحيحة. إيه هو المعكوس. وإزاي نمثّل الأعداد الصحيحة على خط الأعداد.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.