فيديو: طرح عدد مكون من رقم واحد من عدد مكون من رقمين

يوضح الفيديو كيفية طرح عدد مكوَّن من رقم واحد من عدد مكوَّن من رقمين باستخدام إعادة التجميع، مع التوضيح باستخدام قطع العد، وأمثلةً عليها.

٠٣:٥٥

‏نسخة الفيديو النصية

طرح عدد مكوّن من رقم واحد، من عدد مكوّن من رقمين.

في الفيديو ده، هنتعلم طرح عدد مكوّن من رقم واحد، من عدد مكوّن من رقمين، باستخدام إعادة التجميع. عاوزين نوجد أربعة وتلاتين ناقص ستة، باستخدام قطع العدّ، وإعادة التجميع. أول حاجة، هنكتب السؤال بالشكل ده. بعدين نطرح الآحاد من بعضها. فهيبقى أربعة ناقص ستة. لكن أربعة أصغر من ستة؛ فمش هينفع نطرحها. فهنعمل إيه؟ هنعيد تجميع عشرة واحدة، إلى عشر آحاد، وهنضيفها للأربعة. فالأربعة هتبقى أربعتاشر. والتلاتة هتبقى اتنين.

هنوضح باستخدام قطع العدّ. أول حاجة هنعبّر عن أربعة وتلاتين، باستخدام قطع العدّ، فهتبقى بالشكل ده. بعدين هنعيد تجميع مجموعة قطع عدّ من فئة العشرات، ونفكها لعشر قطع من فئة الآحاد، بالشكل ده. فكده بقى فيه قدامنا أربعتاشر قطعة عدّ من فئة الآحاد، ومجموعتين من قطع العشرات. بعدين نكمّل حلّ. فهيبقى أربعتاشر ناقص ستة، بيساوي تمنية.

بعدين نطرح العشرات. فهنلاقي ما فيش رقم مطروح منها. فنكتب اتنين في ناتج العشرات. وعشان نعبّر عن الطرح بقطع العدّ، هنشطب على ست قطع، بالشكل ده. فهنلاقي اتبقّى قدامنا تمنية وعشرين قطعة عدّ. يبقى أربعة وتلاتين ناقص ستة، هيساوي تمنية وعشرين. نتنقل لصفحة تانية، ونحلّ مثال تاني.

عاوزين نوجد تلاتة وعشرين ناقص خمسة. أول حاجة هنكتب السؤال بالشكل ده. بعدين نطرح الآحاد، فهيبقى تلاتة ناقص خمسة. لكن التلاتة أصغر من خمسة. فهنطرح إزاي؟ برضو هنعيد تجميع واحدة من العشرات، ونفكّها لعشر آحاد. فالتلاتة هتبقى تلتاشر، والاتنين هتبقى واحد.

نوضح باستخدام قطع العدّ. فهنعبّر عن تلاتة وعشرين، باستخدام قطع العدّ، فهتبقى بالشكل ده. بعدين هنعيد تجميع مجموعة قطع عدّ من فئة العشرات، ونفكّها لعشر قطع من فئة الآحاد، بالشكل ده. فهنلاقي إن بقى فيه قدامنا تلتاشر قطعة عدّ من فئة الآحاد، وقطعة واحدة من فئة العشرات.

بعدين نكمّل حلّ. فهيبقى تلتاشر ناقص خمسة، هيساوي تمنية. والعشرات ما فيش رقم مطروح منها، فهنكتب واحد في ناتج العشرات. وعشان نعبر عن الطرح، بقطع العدّ، هنشطب على خمس قطع عدّ، بالشكل ده. فهيتبقّى قدامنا تمنتاشر قطعة عدّ. يبقى تلاتة وعشرين ناقص خمسة، هيساوي تمنتاشر.

وبكده نبقى خلّصنا الفيديو ده. اللي اتعلّمنا فيه طرح عدد مكوّن من رقم واحد، من عدد مكوّن من رقمين، باستخدام إعادة التجميع.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.