فيديو: إيجاد الكسر الذي يحقِّق شرط القسمة

أيٌّ مما يلي يُعطي نتيجة أقل من ٢/١ عند القسمة على ٢/١؟ [أ] ٤/١ [ب] ١٧/١٥ [ج] ٢/١ [د] ١٧/٤ [ﻫ] ٨/٥

٠٤:١٩

‏نسخة الفيديو النصية

أيّ مما يأتي يُعطي نتيجة أقل من واحد على اتنين، عند القسمة على واحد على اتنين؟ أ: واحد على أربعة. ب: خمستاشر على سبعتاشر. ج: واحد على اتنين. د: أربعة على سبعتاشر. هـ: خمسة على تمنية.

هنبدأ أول حاجة بإننا نقسم الاختيار أ، وهو واحد على أربعة، على واحد على اتنين. ونشوف ناتج القسمة؛ هل أقل من واحد على اتنين، ولّا لأ. يبقى واحد على أربعة، على واحد على اتنين. بعد كده هنغيّر علامة القسمة، إلى علامة ضرب. وبالتالي المقسوم عليه، هنوجد المعكوس الضربي ليه. يبقى واحد على اتنين هتصبح اتنين على واحد. بنقسم البسط على اتنين. فاتنين على اتنين، الناتج بيكون بواحد. والمقام أربعة على اتنين، الناتج بيكون اتنين. وبالتالي يبقى ناتج القسمة هيكون عبارة عن واحد على اتنين. ولأن واحد على اتنين ليست أقل من واحد على اتنين، يبقى الاختيار أ اختيار خاطئ.

بنشوف الاختيار ب: يبقى خمستاشر على سبعتاشر، على واحد على اتنين. بنكتب الناتج عبارة عن خمستاشر على سبعتاشر. علامة القسمة هتتغيّر إلى ضرب. واحد على اتنين، المعكوس الضربي ليها عبارة عن اتنين على واحد. يبقى الناتج هيساوي خمستاشر في اتنين بتلاتين، على سبعتاشر. تلاتين على سبعتاشر هي كسر غير فعلي، أكبر من واحد. وبالتالي أكبر من واحد على اتنين. يبقى الاختيار ب اختيار خاطئ.

الاختيار ج: واحد على اتنين، على واحد على اتنين؛ يساوي واحد على اتنين، في اتنين على واحد. بنقسم البسط والمقام على اتنين. يبقى اتنين على اتنين، الناتج بواحد. واتنين على اتنين، الناتج بواحد. يبقى الناتج هيكون بواحد. الواحد أكبر من واحد على اتنين. وبالتالي الاختيار ج اختيار خاطئ.

الاختيار د: أربعة على سبعتاشر، على واحد على اتنين؛ هتساوي أربعة على سبعتاشر، في اتنين على واحد. تساوي … أربعة في اتنين بتمنية، على … سبعتاشر في واحد بسبعتاشر. لازم نعرف إذا كانت تمنية على سبعتاشر، أقلّ من واحد على اتنين ولّا لأ. عشان نقرّر إذا كانت الإجابة د اختيار صحيح أم لا. يبقى محتاجين نعرف إذا كان سبعة على تمنتاشر، أقل من واحد على اتنين ولّا لأ.

عشان نقدر نقارن بين الكسرين، محتاجين نوجد المقام المشترك الأصغر؛ لتوحيد المقامات. بعد كده نقدر نقارن بسطَي الكسرين. والمقام المشترك الأصغر بين الكسرين هنا، هيكون عبارة عن حاصل ضرب مقامَي الكسرين. لعدم وجود عوامل مشتركة بين مقامَي الكسرين. يبقى تمنية على سبعتاشر هيتمّ ضرب البسط في اتنين، والمقام في اتنين. وبنسأل: هل أقل من واحد على اتنين؟ هيتمّ ضرب البسط في سبعتاشر، والمقام في سبعتاشر.

يبقى الطرف اليمين تمنية في اتنين بستاشر، على … سبعتاشر في اتنين بأربعة وتلاتين. هل ستاشر على أربعة وتلاتين، أقل من … واحد في سبعتاشر بسبعتاشر، على … اتنين في سبعتاشر بأربعة وتلاتين؟ بما إن المقامين متوحّدين دلوقتي، نقدر نقارن بسطَي الكسرين. فبنلاقي إن ستاشر أقل من سبعتاشر. وبالتالي يبقى ستاشر على أربعة وتلاتين، أقل من سبعتاشر على أربعة وتلاتين.

وبالتالي يبقى تمنية على سبعتاشر، أقل من واحد على اتنين. والاختيار د هو الاختيار الصحيح. لأن لمّا نقسم أربعة على سبعتاشر، على واحد على اتنين. بنلاقي فعلًا إن النتيجة أقل من واحد على اتنين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.