فيديو: الأشكال المتعددة الأضلاع: المضلعات

سوزان فائق

يوضح الفيديو مفهوم المضلعات، وتعريف الأشكال البسيطة، وتقسيم المضلعات على حسب عدد الأضلاع، ومفهوم المضلع المنتظم، وكيفية إيجاد قيم زواياه.

٠٥:٠١

‏نسخة الفيديو النصية

في الفيديو ده هنتكلم عن الأشكال متعددة الأضلاع، اللي بنطلق عليها المضلع. المضلع هو شكل مغلق بسيط، مكوّن من تلات خطوط مستقيمة أو أكتر. يعني إيه بسيط؟ يعني ما فيهوش خطوط متقاطعة.

الأشكال التالية لا تمثّل أشكال متعددة الأضلاع، أو مضلع. الشكل الأول عبارة عن دايرة، يعني ما فيهاش خطوط مستقيمة؛ فبالتالي لا تمثّل مضلع. تاني شكل فيه تقاطع هنا موجود، يبقى معناها إن هو ليس شكل بسيط. رغم إنه هو بيتكوّن من أربع أضلاع، بس برضو ما ينفعش يبقى مضلع. تالت شكل عندنا هو شكل مفتوح من تحت، يبقى مش شكل مغلق؛ يبقى هو كمان ليس مضلع.

الأشكال التالية تمثّل مضلع. الشكل الأول فيه تلات خطوط مستقيمة، وبسيط ما فيش تقاطُعات، ومغلق. تاني شكل فيه: واحد، اتنين، تلاتة، أربعة، خمسة؛ خمس خطوط مستقيمة. وما فيش تقاطُعات، ومغلق. يبقى فعلًا ده مضلع.

الأشكال متعددة الأضلاع، فيها الخطين بيتقابلوا في نقطة كده، هنا دي، بنسمّيها زاوية. وده رأس الزاوية. يعني خط واحد وخمسة ده، متقابلين هنا في نقطة. دي بنسميها رأس الزاوية، ودي بنسميها الزاوية. نقلب الصفحة ونتكلم على تقسيمة الأشكال متعددة الأضلاع.

يتمّ تقسيم المضلعات على حسب الأضلاع فيها. والأضلاع دي بنقصد بيها الخطوط المستقيمة المكوِّنة للشكل. يعني لو عندنا مضلعات بالأشكال الآتية. أول شكل عندنا، هنعدّ عدد الخطوط المستقيمة. هنلاقيهم خمسة، يبقى هنسمي الشكل ده خُماسي. والخطوط المستقيمة دي بنسميها ضلع.

تاني شكل، عندنا ست أضلُع، يبقى هيبقى سُداسي. تالت شكل، هنعدّهم هنلاقيهم سبعة، هنقول سُباعي. رابع شكل، هنعدّهم هنلاقيهم سبعة، يبقى هنقول سُباعي. لو زادت عدد الأضلُع، يعني كانوا تمنية، هيبقى ثُماني. تسعة هيبقى تُساعي. عشرة هيبقى عُشاري. نقلب الصفحة ونتكلم على نوع مميز من المضلعات؛ هو المضلع المنتظم.

المضلع المنتظم بيبقى فيه جميع أضلاعه متساوية، وزواياه متساوية. عندنا مثلًا المثلثات متساوية الأضلاع، دي بنقول عليها مضلع منتظم. المربعات عشان الأضلاع بتاعتها كلها متساوية، وزوياها كلها تسعين درجة، يبقى ده بنسميه مضلع منتظم.

إزاي نعرف نجيب قيمة زوايا المضلع؟ لو عندنا شكل بالشكل ده. ده خُماسي، فيه خمس أضلُع. عايزين نعرف قيمة الزوايا الداخلية بتاعته. يعني عايزين نشوف مجموع الزوايا دي كام. هنقسّم الشكل، لشكل سهل نكون عارفين قيم الزوايا بتاعته. أسهل حاجة بالنسبة لنا، هتبقى المثلث. المثلث إحنا عارفين قيم الزوايا بتاعته، هي مية وتمانين درجة.

فلو خدنا مثلث هنا واحد. هيبقى باقي لنا الجزء التاني ده، هناخد مثلًا مثلث كمان هنا اتنين. وهنا المثلث التالت. الزوايا الداخلية للمثلث، بتساوي مية وتمانين درجة. الشكل الخماسي قدرنا نقسمه لتلات مثلثات. يبقى معنى كده، إن قيم الزوايا الداخلية للشكل الخماسي، هتساوي مية وتمانين درجة، في تلاتة. يبقى زوايا الشكل الخماسي هتساوي مية وتمانين درجة، في تلاتة. يعني هتساوي خمسمية وأربعين درجة.

طيب لو اتكلمنا عن الشكل الخماسي المنتظم. الشكل الخماسي المنتظم يبقى الزوايا الداخلية بتاعته كلها، تساوي خمسمية وأربعين درجة. يعني لو قلنا إن كل زاوية قيمتها س، هنضربها في خمسة عدد الزوايا، هتساوي خمسمية وأربعين درجة. يبقى معنى كده إن إحنا نقدر نجيب قيمة الـ س بكام؟

نقسم على خمسة في الطرفين، يبقى خمسمية وأربعين على خمسة، تساوي مية وتمنية درجة. يبقى معنى كده إن زوايا الشكل الخماسي، كل واحدة فيهم تساوي مية وتمنية درجة، لو كان شكل منتظم.

الفيديو ده اتكلمنا فيه عن الأشكال متعددة الأضلاع؛ اللي هي المضلعات. إزاي بنعرفها. إيه هي المميزات بتاعتها. إيه هي التقسيمة بتاعتها. إيه هو المضلع المنتظم، اللي هو جميع أضلاعه متساوية، وجميع زواياه متساوية. لو عندنا شكل، قلنا عليه إن هو مضلع منتظم، يبقى معنى كده إن إحنا نقدر نجيب قياس الزوايا بتاعته. ممكن نقسّم المضلع لمثلثات، ونعرف مجموع الزوايا الداخلية بتاعته. وبالتالي نقدر نحدّد قيمة كل زاوية بكام.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.