فيديو: إيجاد درجة الحرارة المطلقة لغاز

وُجد أن جذر متوسط مربع سرعات جزيئات ثاني أكسيد الكربون في لهب يساوي 1350m/s. أوجد درجة حرارة اللهب. استخدم القيمة 44.0g/mol للكتلة المولية لجزيئات ثاني أكسيد الكربون.

٠٢:٤٢

‏نسخة الفيديو النصية

وُجد أن جذر متوسط مربع سرعات جزيئات ثاني أكسيد الكربون في لهب يساوي ألف وتلتمية وخمسين متر على الثانية. أوجد درجة حرارة اللهب. استخدم القيمة أربعة وأربعين جرام لكل مول للكتلة المُولِيَّة لجزيئات ثاني أكسيد الكربون.

ففي اللهب بنلاقي إن فيه جزيئات ثاني أكسيد الكربون. والجزيئات دي بتبقى بتتحرَّك بسرعات عشوائية. وبرضو اتجاهات السرعات دي بتبقى عشوائية. فلو حبّينا ناخد متوسِّط سرعات الجزيئات دي، هنلاقي إن عشان اتجاهات عشوائية فالاتجاهات دي بتخلِّي المتوسط بصفر. وعشان كده في الغازات بنعبّر عن جذر متوسِّط مربع سرعات الجزيئات، وبنرمز له بِـ 𝑣𝑟𝑚𝑠. وبنجيب القيمة دي عن طريق إن إحنا في الأول بنربع السرعات، وساعتها تأثير الاتجاهات بيختفي. وبعدين ناخد متوسِّط المربعات دي، وبعدها بناخد الجذر التربيعي للمتوسّط ده.

فمعطى عندنا إن جذر متوسّط مربع سرعات جزيئات ثاني أكسيد الكربون بألف تلتمية وخمسين متر على الثانية. ومعطى عندنا برضو إن الكتلة المُولِيَّة لثاني أكسيد الكربون بأربعة وأربعين جرام لكل مول. والمطلوب منّنا إن إحنا نعرف درجة حرارة اللهب بكام.

فجذر متوسِّط مربع سرعات الجزيئات بيعتمد على درجة الحرارة. والعلاقة اللي بتربطه بدرجة الحرارة إن 𝑣𝑟𝑚𝑠 بتساوي الجذر التربيعي لتلاتة في الثابت العام للغازات. واللي بيساوي تمنية وتلتمية وأربعتاشر من الألف جول على مول كيلفن مضروب في درجة الحرارة بالكيلفن مقسومين على، الكتلة المُولِيَّة للجزيئات دي. فعلشان نجيب درجة الحرارة بدلالة السرعة هنربَّع طرفين المعادلة. وده هيدِّينا إن 𝑣𝑟𝑚𝑠 تربيع بتساوي تلاتة 𝑟𝑡 على 𝑚. وبعدين هنضرب طرفين المعادلة في، 𝑚 على تلاتة 𝑟. فده هيدِّينا إن درجة الحرارة بالكيلفن بتساوي الكتلة المُولِيَّة في 𝑣𝑟𝑚𝑠 تربيع مقسومين على، تلاتة في الثابت العام للغازات.

ولمَّا نعوّض بالقيم، هنلاقي إن درجة الحرارة بتساوي الكتلة المُولِيَّة لثاني أكسيد الكربون، واللي بتساوي أربعة وأربعين جرام لكل مول. مضروبة في 𝑟𝑚𝑠 تربيع، اللي هي ألف وتلتمية وخمسين متر على الثانية تربيع. مقسومين على تلاتة في الثابت العام للغازات، واللي بيساوي تمنية وتلتمية وأربعتاشر من الألف جول على مول كيلفن. ونقدر نحوّل الجرام لعشرة أُس سالب تلاتة كيلوجرام. وممكن برضو نختصر الواحد على مول مع واحد على مول. وممكن نعوّض مكان الجول بكيلوجرام متر تربيع على الثانية تربيع. فده هيخلِّينا نعرف نختصر الكيلوجرام مع الكيلوجرام، والمتر تربيع مع المتر تربيع، والواحد على الثانية تربيع مع الواحد على الثانية تربيع. وده هيطلَّع لنا إن درجة الحرارة بتساوي تلاتة واتنين وعشرين من المية في عشرة أُس تلاتة كيلفن.

وبكده نبقى عرفنا إزَّاي نجيب درجة حرارة اللهب بمعرفة جذر متوسّط مربعات سرعات جزيئات الغاز اللي موجودة فيه.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.