فيديو: المجال المغناطيسي داخل ملف لولبي

التيار المار في ملف لولبي يساوي 2.0A. ما عدد اللفات لكل سنتيمتر التي يجب أن تُلف على الملف اللولبي لتصبح كثافة الفيض المغناطيسي داخل الملف ‎2.0 × 10^−3T؟

٠٢:٢٧

‏نسخة الفيديو النصية

التيار المار في ملف لولبي يساوي اتنين أمبير. ما عدد اللفات لكل سنتيمتر التي يجب أن تُلف على الملف اللولبي؛ لتصبح كثافة الفيض المغناطيسي داخل الملف اتنين في عشرة أُس سالب تلاتة تسلا؟

ففي ملف لولبي ماشي فيه تيار بيساوي اتنين أمبير. فلمّا مشي التيار في الملف اللولبي، اتكوّن جواه مجال مغناطيسي. ومطلوب منّنا إن إحنا نعرف عدد اللفات لكل سنتيمتر؛ علشان نخلّي المجال المغناطيسي ده بيساوي اتنين في عشرة أُس سالب تلاتة تسلا.

يعني لو الملف اللولبي ده ليه طول 𝐿، وعدد لفات 𝑁. فإحنا مطلوب منّنا إن إحنا نعرف 𝑁 على 𝐿. فلو ملف لولبي مشي فيه تيار 𝑖، هنلاقي مجال مغناطيسي جواه اتكوّن. ولو زوّدنا التيار 𝑖 ده، هنلاقي إن المجال المغناطيسي جوّه الملف اللولبي زاد. وده معناه إن المجال المغناطيسي بيتناسب طرديًّا مع التيار.

ولو الملف اللولبي ده زوّدنا طوله، هنلاقي إن المجال المغناطيسي جوّه الملف اللولبي قل. وده معناه إن المجال المغناطيسي بيتناسب عكسيًّا مع طول الملف اللولبي.

ولو زوّدنا عدد اللفات اللي جوّه الملف اللولبي، هنلاقي إن المجال المغناطيسي جوّه الملف اللولبي بيزيد. فده معناه إن المجال المغناطيسي بيتناسب طرديًّا مع عدد لفات الملف اللولبي.

فكده نقدر نقول إن المجال المغناطيسي بيساوي ثابت معيّن مضروب في 𝑖 في 𝑁 على 𝐿. والثابت ده في حالتنا هو نفاذية الهوا. ونفاذية الهوا ده رقم ثابت بيساوي أربعة 𝜋 في عشرة أُس سالب سبعة تسلا متر على أمبير. وعلشان نعرف نجيب الــ 𝑁 على 𝐿، هنقسم طرفين المعادلة على نفاذية الهوا، مضروبة في التيار. فنقدر نطلع 𝑁 على 𝐿 بتساوي 𝐵 على نفاذية الهوا في التيار.

فلمّا نعوّض بالقيم المُعطاة عندنا، هنلاقي إن 𝑁 على 𝐿 بتساوي اتنين في عشرة أُس سالب تلاتة تسلا، مقسومة على أربعة 𝜋 في عشرة أُس سالب سبعة تسلا متر على أمبير، في اتنين أمبير. نقدر نختصر الأمبير مع الأمبير، والتسلا مع التسلا. فهنلاقي إن 𝑁 على 𝐿 بتساوي تمنمية في واحد على متر. وده معناه إن إحنا محتاجين تمنمية لفة لكل متر.

ولكن المطلوب منّنا نجيب عدد اللفات لكل سنتيمتر. فهنحول المتر لعشرة أُس اتنين سنتيمتر. وبكده نقدر نطلع إن 𝑁 على 𝐿 بتساوي تمن لفات لكل سنتيمتر. وبكده نبقى عرفنا نجيب عدد اللفات لكل سنتيمتر لملف لولبي، بمعرفة التيار اللي ماشي فيه، والمجال المغناطيسي اللي موجود جواه.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.