فيديو: ترتيب الأعداد المُكوَّنة من عدة أرقام ترتيبًا تنازليًّا

رتِّب الأعداد الموجودة على البطاقات ترتيبًا تنازليًّا.

٠٣:٤٦

‏نسخة الفيديو النصية

رتب الأعداد الموجودة على البطاقات ترتيبًا تنازليًّا.

الترتيب التنازلي معناها إن إحنا بنبتدي من الأكبر للأصغر. عشان نقدر نقارن الأعداد الموجودة على البطاقات ونرتبهم من الكبير للصغير، هنستخدم جدول القيم المكانية. هنبتدي بأول عدد موجود على أول بطاقة، ونبتدي نحط الأرقام اللي بيتكوّن منها في جدول القيم المكانية. بنبدأ دايمًا من الرقم اللي على اليمين بيبقى في خانة الآحاد، اللي بعده بيبقى في خانة العشرات، واللي بعده بيبقى في خانة الميّات، اللي بعده بيبقى في خانة الألوف، واللي بعده بيبقى في خانة عشرات الألوف.

بنفس الطريقة هنتحرك للعدد التاني، ونبتدي نحط أول رقم فيه في خانة الآحاد من اليمين، اللي بعده في خانة العشرات، واللي بعده في خانة المئات، واللي بعده في خانة الألوف، واللي بعده في خانة عشرات الألوف.

تالت عدد عندنا فيه صفر في خانة الآحاد، سبعة في خانة العشرات، ستة في خانة المئات، سبعة في خانة الألوف، تلاتة في خانة عشرات الألوف.

نتحرك للعدد اللي بعده، نحط كل رقم من الأرقام بتاعته في جدول القيم المكانية، وبنفس الطريقة برضو هنحط الأرقام اللي بيتكون منها آخر عدد موجود على آخر بطاقة.

دلوقتي عايزين نقارن الأعداد اللي عندنا دي عشان نقدر نرتبها. دايمًا بنبتدي المقارنة من الخانة المكانية الأكبر، يعني أكبر خانة مكانية عندنا هنا هي خانة عشرات الألوف، نبتدي نشوف الأرقام اللي فيها ونقارن من أول هنا. إحنا عايزين نرتب ترتيب تنازلي، يعني عايزين نبتدي بأكبر عدد في الأعداد اللي عندنا، يبقى هنشوف أكبر رقم في خانة عشرات الألوف. لو بصينا هنلاقي إن أكبر رقم عندنا هنا هو الستة، يبقى هنبدأ الترتيب بتاعنا بأكبر عدد من الأعداد اللي على البطاقة، اللي هو تسعة وستين ألف ربعمية أربعة وعشرين.

نكمل مقارنة بقية الأرقام اللي موجودة في خانة عشرات الألوف، هنلاحظ إن تاني أكبر رقم موجود متكرر مرتين، اللي هو خمسة وخمسة. عشان نعرف بقى العدد ده اللي أكبر ولا العدد ده، هننتقل للخانة المكانية الأقل، ونقارن في العددين دول بالأرقام اللي موجودة في خانة الألوف، هنلاحظ إن العدد التاني فيه أربعة في خانة الألوف، أما الأول ففيه صفر؛ ده معناها إن العدد التاني هو الأكبر، يبقى تاني عدد في الترتيب اللي عندنا هيبقى أربعة وخمسين ألف مية تمنية وستين، يليهم مباشرةً العدد اللي فيه صفر في خانة الألوف، عشان هو كمان كان بادي بخمسة في خانة عشرات الألوف، يبقى هو اللي عليه الدور في الترتيب بتاعنا، يبقى تالت عدد عندنا في الترتيب هو خمسين ألف ستمية واتنين.

نكمل مقارنة الأعداد اللي باقية عن طريق مقارنة الأرقام اللي موجودة في خانة عشرات الألوف، باقي عندنا تلاتة وأربعة، طبعًا أربعة أكبر، هنلاقي إن أربعة طبعًا أكبر، يبقى العدد اللي عليه الدور في الترتيب بتاعنا هيبقى سبعة وأربعين ألف ربعمية اتنين وعشرين. كده ما عادش متبقي غير عدد واحد بس، اللي هو فيه الرقم تلاتة في خانة عشرات الألوف، اللي هو سبعة وتلاتين ألف ستمية وسبعين، واللي هيبقى آخر عدد في الترتيب التنازلي اللي عندنا، عشان هو أصغر عدد في مجموعة الأعداد اللي عَ البطاقات اللي قدامنا.

وكده يبقى قدرنا نرتب مجموعة الأعداد اللي على البطاقات ترتيبًا تنازليًّا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.