فيديو: تحويل النسبة المئوية إلى عدد عشري والعكس

سوزان فائق

يوضح الفيديو كيفية تحويل النسبة المئوية إلي عدد عشري والعكس.

٠٧:١٠

‏نسخة الفيديو النصية

في الفيديو ده هنتكلّم على تحويل النسبة المئوية إلى عدد عشري والعكس. هنعرف إزّاي نحوّل النسبة المئوية زي مثلًا سبعة في المية إلى عدد عشري. وإزّاي أحوّل العدد العشري زي أربعة من عشرة، وهنخليه نسبة مئوية.

بيمكن كتابة النسب المئوية في صورة كسور عشرية أو عدد عشري. ولكتابتها في تلك الصورة، بنكتب النسبة المئوية في صورة كسر مقامه مية. يعني مثلًا لو عندي النسبة المئوية خمسة في المية، بنكتبها على صورة كسر مقامه مية. وبعد كده بنكتب الكسر في صورة عدد عشري أو كسر عشري. يعني بنحط العلامة العشرية وبعدين نكتب الرقم. لو كان مثلًا ده خمسة في المية، يبقى خمسة على مية. وبعدين بنحوّله لعدد عشري، هيبقى خمسة من مية. المية دي بتخلّي العلامة العشرية تتحرك خانتين. دي الخانة الأولى، والخانة التانية.

ناخد مثال. في المثال: اكتب سبعة في المية في صورة عدد عشري.

فيه طريقتين للحل؛ الطريقة الأولى: بإن إحنا نكتب سبعة في المية على صورة كسر. يعني كسر مقامه مية. يبقى سبعة على المية. وبعدين المية تحرّك العلامة العشرية خانتين. يبقى سبعة من مية بالشكل ده.

الطريقة التانية: إن إحنا نقول إن علامة في المية دي بتتسبّب إن العدد يتقسم على مية. ودي بنسميها الطريقة العقلية. يعني باستخدام العقل بس، نفكر بيها. وهنا هيبقى السبعة في المية، نشيل المية ونحط مكانها عدد مقسوم على المية. يعني سبعة من مية. يبقى كده النسبة المئوية اللي هي سبعة في المية، ده صورة العدد العشري لها.

ناخد كمان مثال: تمثّل ألاسكا ستاشر وواحد على عشرة في المية من مساحة أرض الولايات المتحدة الامريكية. اكتب هذه القيمة في صورة عدد عشري.

يعني عايزين نكتب ستاشر وواحد على عشرة في المية، على صورة عدد عشري. أول حاجة هنكتب الواحد على عشرة دي، بتساوي واحد من عشرة. يبقى القيمة عندنا هتبقى ستاشر وواحد من عشرة في المية؛ لأن كتبنا الواحد على عشرة اللي هو الكسر على صورة عدد عشري. هنشيل علامة في المية، ونقسم العدد على مية. يبقى كده العلامة العشرية هتتحرك خانتين. يبقى العدد عندنا هيبقى مية واحد وستين من ألف. وده شكل العدد العشري اللي بيمثّل ستاشر وواحد على عشرة في المية.

كده عرفنا إزّاي نحوّل النسبة المئوية لعدد عشري؛ بإن إحنا بنشيل علامة في المائة، ونقسم العدد على مية، نحرك العلامة العشرية خانتين. هنشوف إزّاي هنحوّل العدد العشري إلى نسبة مئوية، اللي هو عكس اللي إحنا عملناه.

في تحويل العدد العشري إلى نسبة مئوية، بنعكس اللي عملناه، إن إحنا بناخد العدد العشري هنرجعه تاني لكسر، وبعدين نحوّله لنسبة مئوية.

يعني مثلًا في المثال ده بيقول: اكتب أربعة من عشرة على صورة نسبة مئوية.

الأربعة من عشرة ده عدد عشري، بنحوّله لكسر. يعني بيبقى الأربعة على العشرة. بعد كده بنخلي المقام ده مية؛ علشان دي اللي بتعبر على علامة النسبة المئوية. فهنضرب البسط في عشرة، والمقام في عشرة؛ علشان يبقى النتيجة أربعين على مية. المية دي علامة في المية اللي كتبناها قبل كده، اللي هي هتساوي أربعين في المية. اللي هي بيبقى معناها أربعين من مية.

ممكن نحل بطريقة تانية كمان، وبنسميها طريقة عقلية. اللي هي بالضرب في مية، ونضيف علامة في المية. يعني الأربعة من عشرة هنضربها في المية. والأربعة من عشرة دي هي هياها أربعين من مية؛ يعني لمّا هنضرب في المية هتبقى أربعين. وهنحط علامة في المية. يبقى هي دي النسبة المئوية اللي بتعبّر عن الأربعة من عشرة.

ناخد كمان مثال من حياتنا العملية: يمشي أحمد وكلبه ستمية خمسة وعشرين من ألف كيلومتر يوميًّا. اوجد النسبة المئوية من الكيلومترات التي يمشونها.

يعني عايز يحوّل ستمية خمسة وعشرين من ألف إلى نسبة مئوية. هنضرب في مية. يبقى العدد عندنا هيبقى اتنين وستين ونص. وبعد كده نضيف العلامة بتاعة في المائة. يبقى اتنين وستين ونص في المية. يبقى النسبة المئوية اللي بتعبّر عن ستمية خمسة وعشرين من ألف، هي اتنين وستين ونص في المية.

اتكلمنا في الفيديو ده عن تحويل النسبة المئوية إلى عدد عشري. وده بيبقى عن طريق قسمة النسبة على مية، وإزالة العلامة المئوية. يعني لو عايزين نحوّل خمسة وعشرين في المية إلى عدد عشري، يبقى هنقسم العدد ده على مية، هيبقى خمسة وعشرين من مية. وبعد كده نشيل العلامة العشرية. وعرفنا كمان تحويل العدد العشري إلى نسبة مئوية. يعني لو عندنا تمنية وخمسين من مية، عايزين نحوّلها لنسبة مئوية، هنضرب العدد العشري في مية، ونضيف العلامة المئوية. يعني لمّا هنضرب التمنية وخمسين بالمية في المية، هنضربها هتبقى تمنية وخمسين، وبعد كده نضيف العلامة المئوية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.