فيديو: استخدام أُطُر العشرة لطرح مضاعفات العدد ١٠

يستخدم ماجد أُطُر العشرة للعد القفزي تنازليًّا بمقدار ١٠. يقول ماجد: «سبع عشرات مطروحًا منه خمس عشرات يساوي ثلاث عشرات» هل هو على صواب؟

٠٤:١٦

‏نسخة الفيديو النصية

يستخدم ماجد أُطُر العشرة للعد القفزي تنازليًّا بمقدار عشرة. يقول ماجد: سبع عشرات مطروحًا منه خمس عشرات يساوي ثلاث عشرات. هل هو على صواب؟

فيه ولد اسمه ماجد. ماجد كان بيستخدم أُطُر العشرة. الحاجات اللي قدامنا دي اسمها أُطُر العشرة. يعني إيه؟ يعني كل عشر دواير، موجودين في شكل مستطيل، أو إطار. طيّب بيستخدمهم ليه؟ علشان يطرح، أو يعدّ عدّ تنازلي عشرة بعشرة. عارفين كده لمّا نيجي نعدّ: عشرة، عشرين، تلاتين، أربعين، خمسين، ستين، سبعين، وهكذا؛ ده كده اسمه عدّ قفزي بمقدار عشرة.

طيّب لو إحنا بنعمل عدّ قفزي بمقدار عشرة تنازليًّا، يعني إيه تنازليًّا؟ يعني من الكبير للصغير. عارفين يعني نقول إيه؟ يعني نقول: تسعين، تمانين، سبعين، ستين، خمسين، أربعين، تلاتين، عشرين، عشرة، صفر. ده كده العدّ القفزي تنازليًّا بمقدار عشرة. كل مرّة نقلّل إيه؟ عشرة. دي الطريقة اللي ماجد بيستخدمها عشان يطرح بيها.

طيّب هو ماجد بقى جِه قال لنا إيه؟ يقول ماجد: سبع عشرات، سبع عشرات اللي هم سبعين؛ مطروحًا منه خمس عشرات، اللي هم خمسين؛ يساوي ثلاث عشرات، اللي هم تلاتين. ده اللي ماجد قاله، واللي حاول يمثّله في الصورة اللي قدّامنا.

مش إحنا قلنا المستطيل الواحد بعشرة؟ طب إحنا عندنا كام مستطيل، أو كام إطار؟ واحد، اتنين، تلاتة، أربعة، خمسة، ستة، سبعة. عندنا سبع أُطُر، جميل جدًّا. السبعة دول اللي هو قايل عليهم هنا أهو، سبع عشرات. مطروحًا منه كام؟ خمس عشرات. يعني هو قال هيشيل من السبعة خمسة. طب وهو عامل إكس، أو شاطب على كام واحد؟ واحد، اتنين، تلاتة، أربعة. واتبقّى له كام؟ واحد، اتنين، تلاتة. يبقى هو شطب على أربعة، مش خمسة، واتبقّى له تلاتة.

طب نعرف بقى نردّ على السؤال دلوقتي؟ هو السؤال بيقول لنا إيه؟ «هل هو على صواب؟»، هل اللي ماجد عمله ده صح؟ لأ طبعًا مش صح. فنردّ نقول: لا، مش صح اللي هو عمله. طب ليه لا؟ لأنه هو هنا طرح أربعة بس، مش خمسة. علشان كده جاوبنا وقلنا: لا.

طيب نجاوب على الجزء التاني من السؤال: «ما الخطأ الذي وقع فيه؟». إحنا كده عرفنا إن هو عمل حاجة غلط. عاوزين بقى نحلّ السؤال، ونقول إيه الغلط اللي هو عمله، «ما الخطأ الذي وقع فيه؟»، وعندنا تلات اختيارات. أول اختيار: طرح ثلاث عشرات فقط. طرح أربعة آحاد فقط. طرح أربعة عشرات فقط.

إحنا قلنا الغلط اللي ماجد عمله إن هو إيه؟ طيب إحنا قلنا الغلط اللي ماجد وقع فيه هو إيه؟ ماجد كان عاوز يطرح خمس عشرات، لكن هو اتلخبط، وغلط، وطرح أربعة بس؛ عشان كده الناتج بقى تلاتة. يبقى معنى كده إن الغلط اللي ماجد وقع فيه هو إنه طرح أربع عشرات فقط، لأنه ما طرحش أربعة آحاد، ولا طرح تلات عشرات.

الغلط اللي وقع فيه إن هو طرح أربع عشرات، فبقى الناتج تلات عشرات مش اتنين. لأنه لو كان طرح خمس عشرات، زيّ ما كان هو عاوز، كان هيبقى الناتج عشرتين. يبقى كده إحنا حلّينا جزئين السؤال. أول جزء إجابته لا؛ لأنه هو ما كانش على صواب. وتاني جزء الغلط اللي وقع فيه إن هو طرح أربع عشرات فقط.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.