فيديو: الضرب في ۹

غادة عليوة

يوضح الفيديو كيفية إيجاد حاصل الضرب في العدد ۹ باستخدام حقائق الضرب للعدد ۹، أو باستخدام النماذج أو الجمع المتكرر، وكيفية إيجاد عامل الضرب المجهول في جملة الضرب، مع أمثلة توضيحية.

٠٩:١٩

‏نسخة الفيديو النصية

هنتعلّم في الفيديو ده طرق مختلفة نقدر نوجد بيها حاصل ضرب أيّ عدد في العدد تسعة.

في المثال اللي عندنا ده أحد التجار باع تمن صناديق من المربى؛ كل صندوق به تسع عبوات. كم عبوة باع التاجر؟

عشان نقدر نوجد عدد العبوات اللي التاجر باعها، هنضرب عدد الصناديق في عدد العبوات في كل صندوق. يعني عايزين نوجد حاصل ضرب تمنية في تسعة.

نقدر نوجد حاصل الضرب المطلوب ده باستخدام النماذج. هنستخدم تمن مجموعات من النماذج؛ كل مجموعة هنحطّ فيها تسع قِطَع عدّ. ولو عدّينا مجموعة قِطَع العدّ اللي قدّامنا دلوقتي، واللي استخدمناهم، هنلاقي إن هم: اتنين وسبعين قطعة عدّ. يعني قدِرنا نوصل إن حاصل ضرب تمنية في تسعة هيبقى بيساوي اتنين وسبعين. يبقى نقدر نقول إن التاجر ده باع اتنين وسبعين عبوة من المربى.

نقدر نوصل لحاصل الضرب اللي وصلنا له ده باستخدام طريقة تانية زيّ طريقة الجمع المتكرّر. إحنا عندنا تمن صناديق من المربى؛ كل صندوق فيه تسع عبوات. يعني هنكرّر جمع العدد تسعة تمن مرات بالشكل ده. هيصبح الناتج عندنا اتنين وسبعين، وهو نفس الناتج اللي حصلنا عليه باستخدام النماذج.

لو رجعنا لجدول الضرب عشان نستخلص منه حقائق الضرب للعدد تسعة، هنلاحظ حاجة. فيه علاقة معينة بتربط العامل التاني في جملة الضرب، وحاصل الضرب في العدد تسعة. نمط معيّن هيساعدنا على إننا نفتكر حقائق الضرب للعدد تسعة.

لو بصّينا مثلًا لحاصل ضرب تسعة في واحد؛ خانة الآحاد فيها تسعة، والعشرات فيها صفر. هنلاحظ إن العامل اللي تمّ ضربه في تسعة، اللي هو الواحد، حاصل الضرب العشرات بتاعته أقل من العامل ده بواحد. أقل من الواحد بواحد، فبالتالي هو: صفر.

لو بصّينا على حقيقة الضرب التانية، حاصل ضرب التسعة في اتنين. العامل اللي بيتمّ ضربه في التسعة، اللي هو اتنين، وهنشوف علاقته بالعشرات بتاعة حاصل الضرب. هنلاقي حاصل الضرب العشرات بتاعته فيها واحد. العامل اللي بيتمّ ضربه في تسعة هو: اتنين، يبقى العشرات بتاعة حاصل الضرب أقل من العامل اللي بيتمّ ضربه في تسعة بواحد.

هنلاحظ إن العلاقة دي أو النمط ده نقدر نطبّقه على أيّ حقيقة من حقائق الضرب للعدد تسعة. يعني مثلًا لو اخترنا الضرب في سبعة، هنلاحظ إن حاصل الضرب خانة العشرات اللي فيه هي: ستة. يعني أقل بواحد من العامل اللي بيتمّ ضربه في العدد تسعة.

يبقى بصورة عامة نقدر نقول إن الرقم الموجود في خانة العشرات في حاصل الضرب، دايمًا بيقلّ عن العامل المضروب في العدد تسعة بواحد.

فيه علاقة تانية مهمة كمان هتساعدنا على تذكّر حقائق الضرب للعدد تسعة. هنلاحظ لو بصّينا مثلًا لحاصل الضرب [ضرب] تسعة في واحد [اتنين]‎، إن حاصل الضرب الآحاد بتاعته تمنية، والعشرات بتاعته واحد. لو جمعناهم على بعض، هيبقى المجموع بتاعهم تسعة.

لو أخدنا مثلًا حاصل ضرب تسعة في خمسة؛ هنلاقي إن حاصل الضرب الآحاد بتاعته خمسة، والعشرات أربعة. لو جمعناهم على بعض، هنلاقي إن المجموع بتاعهم تسعة. ولو شُفنا حقيقة الضرب، اللي هي تسعة في تمنية. هنلاقي إن حاصل الضرب الآحاد بتاعته اتنين، والعشرات بتاعته سبعة؛ مجموعهم مع بعض بيساوي تسعة.

فهنلاقي دايمًا إن مجموع الأرقام، اللي بيتكوّن منها حاصل الضرب في العدد تسعة، المجموع بتاعها دايمًا بيساوي تسعة.

في المثال اللي عندنا ده بنشوف إن كريم عايز يشتري ست علب ألوان. لو كان سعر العلبة الواحدة تسع جنيهات، فكم جنيهًا سيدفع؟ يعني تكلفة العلب الستة هتبقى كام.

عشان نوجد سعر العلب الستة؛ هنضرب عدد العلب، اللي هو ستة، في سعر العلبة الواحدة، اللي هو تسعة جنيهات. حاصل الضرب هيمثّل لنا السعر الكلي لمجموعة العلب.

هنرجع للأنماط اللي بتساعدنا على تذكّر حقائق الضرب في العدد تسعة. العدد أو العامل اللي بيتمّ ضربه في العدد تسعة هو: ستة. زيّ ما إحنا قلنا كان فيه نمط بيربط خانة العشرات، في حاصل الضرب، مع العامل اللي بيتمّ ضربه في العدد تسعة. وهو إن خانة العشرات أو الرقم اللي موجود في خانة العشرات بيبقى أقل من العامل اللي تمّ ضربه في تسعة؛ أقل منه بواحد. فيبقى في الحالة دي هيبقى أقل من الستة بواحد، فهيبقى خمسة.

وكان فيه علاقة تانية مهمة أو نمط تاني بيساعدنا على استنتاج الرقم اللي موجود في الآحاد في حاصل الضرب. إحنا عرفنا إن دايمًا مجموعهم بيساوي تسعة. يعني دلوقتي فيه رقم لو جمعناه على خمسة، لازم هيبقى المجموع تسعة. هنلاحظ إيه الرقم اللي لو جمعناه على خمسة، يبقى ناتج الجمع تسعة؛ هنلاقي إن الرقم ده هو: أربعة. يبقى كده الرقم اللي في الآحاد هيبقى: أربعة. يبقى حاصل ضرب ستة في تسعة يساوي أربعة وخمسين. كده قدِرنا باستخدام الأنماط نستنتج حاصل الضرب.

في المثال ده مطلوب منّنا نكمّل ونوجد العامل اللي لو تمّ ضربه في العدد تسعة، هيبقى حاصل الضرب بيساوي تمنتاشر.

هنرجع للنمط اللي بيربط الرقم الموجود كعشرات في حاصل الضرب، والعدد أو العامل الآخَر اللي بيتمّ ضربه في العدد تسعة. إحنا عارفين إن في حاصل الضرب الرقم اللي موجود في العشرات بيبقى أقل من العامل اللي بيتمّ ضربه في العدد تسعة؛ أقل منه بواحد. طيّب الرقم اللي في العشرات في حاصل الضرب واحد. معناها إن العدد أو العامل اللي هيتمّ ضربه في تسعة أكبر منه بواحد؛ يعني هيبقى اتنين. يبقى كده قدِرنا نستنتج إن حاصل ضرب تسعة في اتنين يساوي تمنتاشر.

بنفس الطريقة عايزين نكمّل حقيقة الضرب اللي بعد كده. حاصل ضرب تسعة في العامل المجهول ده هيبقى بيساوي خمسة وأربعين.

وزيّ ما عرفنا إن رقم العشرات في الناتج دايمًا بيقلّ عن العامل المضروب في العدد تسعة بواحد. هنشوف العشرات هنا، هي: أربعة، والمفروض دي أقل من العامل اللي هيتمّ ضربه في العدد تسعة بواحد. يعني العدد ده هيبقى أكبر من الأربعة بواحد، فيبقى كده العامل ده هيبقى: خمسة. يبقى حاصل ضرب تسعة في خمسة هيساوي خمسة وأربعين. دلوقتي عايزين نكمّل المثال اللي بعد كده.

حاصل ضرب تسعة في عدد مجهول هيساوي سبعة وعشرين.

المرة دي هنحلّ باستخدام النماذج. هنستخدم سبعة وعشرين قطعة عدّ؛ نوزّعهم بالتساوي على تسع مجموعات، ونشوف كل مجموعة هتحتوي على كام قطعة عدّ. هنبدأ نوزّع السبعة وعشرين قطعة على تسع مجموعات؛ واحدة في كل مجموعة. هنمثّل كل مجموعة بصف من الصفوف دي، فيبقى عندنا كده تسع قِطَع عدّ على تسع صفوف.

ونكمّل توزيع قِطَع العدّ تاني على التسع صفوف أو التسع مجموعات اللي عندنا. هيبقى كده خلّصنا توزيع تمنتاشر قطعة عدّ. هنكمّل توزيع لغاية ما نخلّص السبعة وعشرين قطعة عدّ اللي معانا. هنوزّع بالتساوي قطعة واحدة على كل صف أو على كل مجموعة. خلّصنا توزيع السبعة وعشرين قطعة. كده هيصبح عندنا تسع صفوف أو تسع مجموعات؛ كل مجموعة بتحتوي على تلات قِطَع عدّ. يبقى كده قدِرنا نستنتج إن حاصل ضرب تسعة في تلاتة بيساوي سبعة وعشرين.

اتعلّمنا في الفيديو ده إزّاي نقدر نوجد ناتج الضرب في العدد تسعة. وعرفنا إزّاي إن الأنماط بتساعدنا على إننا نتذكّر حقائق الضرب للعدد تسعة. لأن دايمًا رقم العشرات، في ناتج الضرب، بيقلّ عن العدد اللي مضروب في العدد تسعة بواحد. وكمان الآحاد زائد العشرات، لحاصل الضرب، لو جمعناهم مع بعض؛ هيطلع دايمًا مجموعهم بيساوي تسعة. والعلاقات أو الأنماط دي بتساعدنا على إننا نقدر نستنتج حاصل الضرب للعدد تسعة. وبنقدر كمان نستخدمها لإيجاد العامل المجهول في جملة الضرب في الحقائق اللي بترتبط بالعدد تسعة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.