فيديو: تقريب الأعداد لأقرب عشرة آلاف

قرّب ٣٤٦٩٩ لأقرب عشرة ألوف.

٠٤:١٤

‏نسخة الفيديو النصية

قرّب أربعة وتلاتين ألف ستمية تسعة وتسعين لأقرب عشرة ألوف.

عاوزين نقرّب أربعة وتلاتين ألف ستمية تسعة وتسعين لأقرب عشرة ألوف. فهنكتب العدد بتاعنا أربعة وتلاتين ألف ستمية تسعة وتسعين. وندور على خانة عشرات الألوف، اللي إحنا عاوزين نقرب ليها. فنبدأ نقول: آحاد، عشرات، مئات، ألوف، عشرات الألوف. يبقى هي دي عشرات الألوف، واللي إحنا هنبدأ نقرب ليها.

طيب علشان نقرب بنعمل إيه؟ إحنا دلوقتي حددنا الرقم اللي إحنا واقفين عنده، اللي هو التلاتة. بنبدأ نبُص على يمين الرقم ده. هنلاقي عندنا في إيه على يمينه؟ أربعة. فنسأل نفسنا: هل الأربعة دي هتدي التلاتة واحد وتزودها تخليها أربعة، ولا هتسيبها زي ما هي تلاتة؟ علشان نعرف نجاوب على السؤال ده، هوريكم هنعمل إيه. هنتخيل إن الجبل اللي قدامنا ده هو جبل الأعداد. ومرصوص عليه الأعداد بالشكل ده: صفر، واحد، اتنين، تلاتة، أربعة، خمسة، ستة، سبعة، تمنية، تسعة. والرقم اللي إحنا محتارين نزوده ولّا لأ اللي هو التلاتة موجود هنا، تلاتة. وفي حالة إنه زاد هيبقى أربعة، فتبقي الأربعة هنا.

ونبدأ نشوف، مين الرقم اللي موجود على يمين التلاتة؟ قلنا الأربعة دي هي اللي موجودة على يمين التلاتة. طيب هي موجودة فين في الجبل؟ هنلاقيها موجودة هنا، على الجبل. طيب لو اتخيلنا فيه واحد واقف عند الأربعة كده، الواحد ده أقرب له ينزل الحتة دي ويوصل للتلاتة، ولا يمشي الحتة دي كلها لحد ما يوصل للأربعة؟ هنلاقي إن هو أقرب له يفضل عند التلاتة.

فمعنى كده إن الأربعة مش من الأعداد اللي بتزوّد التلاتة. فده معناه إن الأربعة هتخلّي التلاتة زي ما هي. فهنيجي تحت التلاتة ونكتبها. طيب كده إحنا خلاص عرفنا موقف التلاتة إن هي هتفضل زي ما هي ومش هتزيد. الأربعة دي بقى إيه اللي هيحصل فيها؟ والستة؟ والتسعة؟ والتسعة؟ كلهم هيتحولوا لأصفار. أربعة هينزل مكانها صفر هنا. والستة مكانها صفر هنا. والتسعة. والتسعة.

ويبقى هو ده ناتج التقريب بتاعنا. تلاتين آلف. ده ناتج التقريب لأقرب عشرة آلاف.

يبقى إحنا باختصار خدنا التلاتة. وشُفنا العدد اللي موجود على يمينها، لقيناه أربعة. رُحنا على جبل الأعداد، لقينا إن الأربعة موجودة ضمن الأعداد اللي مش بتزود التلاتة. طيب هي إيه الأعداد اللي بتزود التلاتة؟ عندنا مثلًا الخمسة. لو هو واقف هنا أسهل له وأسرع له إنه يكمل طريقه لحد ما يوصل للأربعة. فمعنى كده إن الخمسة بتزود واحد. وزيها الستة، والسبعة، والتمنية، والتسعة.

لكن الأعداد الصغيرة زي الواحد، والاتنين، والتلاتة، والأربعة. لو واقفين عندها هنتزحلق ونقع ونرجع أسرع للتلاتة، فمش هنزيد واحد. وكمان طبعًا معاهم الصفر. ويبقى ناتج تقريب أربعة وتلاتين ألف ستمية تسعة وتسعين، هو تلاتين آلف، وتبقى هي دي الإجابة الصح.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.