فيديو: استخدام المجسمات لتمثيل الأشياء الحقيقية

أيٌّ المجسمات التالية يمكن استخدامه للحصول على أقرب شكل يماثل حجم علبة الفاصولياء؟ [أ] المخروط [ب] الأسطوانة [ج] الهرم [د] متوازي المستطيلات [ﻫ] الكرة

٠٢:٣٠

‏نسخة الفيديو النصية

أيُّ المجسّمات التالية يمكن استخدامه للحصول على أقرب شكل يماثل حجم علبة الفاصولياء؟ أ: المخروط. ب: الأسطوانة. ج: الهرم. د: متوازي المستطيلات. ﻫ: الكرة.

عاوزين نعرف أيّ اختيار، من الخمس اختيارات اللي قدّامنا دول، هو اللي بيشبه علبة الفاصوليا اللي عندنا.

علبة الفاصوليا اللي عندنا عبارة عن مجسّم له القاعدة الدائرية دي، اللي ظلّلناها، وكمان قاعدة دائرية هنا كده. والقاعدتين الدائريتين دول متطابقتان؛ يعني زيّ بعض بالظبط. فإحنا عاوزين نعرف أيّ شكل من الخمس أشكال، اللي مكتوبين عندنا في الاختيارات، هو اللي شبه علبة الفاصوليا.

أول اختيار عندنا هو المخروط. ده هو شكل المخروط؛ له قاعدة دائرية واحدة مش قاعدتين، وله رأس واحدة. يبقى المخروط مش شبه علبة الفاصوليا؛ فنستبعده.

نيجي لتاني اختيار اللي هو الأسطوانة. الأسطوانة عندنا ليها قاعدة دائرية دي، وكمان قاعدة دائرية؛ اللي هي دي. وفعلًا الأسطوانة شبه علبة الفاصوليا جدًّا؛ لإنها ليها قاعدتين دائريتين متطابقتين. والوجه الجانبي ده زيّ الوجه الجانبي ده. فبنسبة كبيرة الأسطوانة هي الإجابة الصح، ولكن خلّينا نتأكّد ونشوف باقي الاختيارات.

ونيجي للاختيار التالت اللي هو الهرم. ده هو شكل الهرم؛ مالهوش ولا قاعدة دائرية، ومش شبه علبة الفاصوليا، فنستبعده.

بعدين نشوف الاختيار الرابع، واللي هو متوازي المستطيلات. متوازي المستطيلات كل وجه من أوجهه على شكل مستطيل، ومالوش قاعدتين دائريتين؛ فبرضو نستبعده لأنه مش شبه علبة الفاصوليا.

ونشوف آخِر اختيار اللي هو الكرة. الكرة مالهاش لا أوجه، ولا أحرف، ولا رؤوس، ومش شبه علبة الفاصوليا؛ فبرضو نستبعدها.

وبكده نكون اتأكّدنا إن الشكل اللي فعلًا شبه علبة الفاصوليا، وله قاعدتين دائريتين متطابقتين؛ هو: الأسطوانة. وتبقى هي دي الإجابة الصح.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.