فيديو: حل المسائل الكلامية التي تتضمَّن قسمة الأعداد حتى ١٠٠

جمعت مجموعة من الأطفال عددًا من الكرات. مع كل طفل ٦ كرات، وكان معهم جميعًا ١٢ كرة. ما عدد الأطفال؟

٠١:٤٩

‏نسخة الفيديو النصية

جمعت مجموعة من الأطفال عددًا من الكرات. مع كل طفل ست كرات، وكان معهم جميعًا اتناشر كرة. ما عدد الأطفال؟

معطى عندنا في السؤال إن الكور الموجودة كلها اتناشر كرة. والمطلوب مننا نعرف لو كل طفل معاه ست كرات، هيبقى فيه كام طفل؟ يعني محتاجين نشوف الاتناشر كورة دول لو اتقسّموا إلى مجموعات متساوية، كل مجموعة فيها ست كرات، هيبقى فيه كام مجموعة.

هنلاقي إننا ممكن نقسّمهم بالتساوي لمجموعتين كل مجموعة منهم فيها ست كرات؛ عشان ستة زائد ستة هيساوي اتناشر. وبما إننا بنستخدم الضرب بدل الجمع المتكرّر، فنقدر نكتبها بالشكل ده: ستة في اتنين يساوي اتناشر. يعني لو عندنا مجموعتين كل مجموعة فيها ست كور، فإجمالي عدد الكور اللي عندنا هيبقى اتناشر.

طب إحنا عارفين إن عملية القسمة هي عكس عملية الضرب. يعني لو ابتدينا بالناتج اللي هو اتناشر، اللي هو عدد الكرات الكلي، وقسمناه على عدد الكرات في كل مجموعة، هنحصل على عدد المجموعات. اللي هو بيمثّل عدد الأطفال. كل مجموعة بتمثّل طفل، فكل طفل هيبقى معاه ست كرات. وبالتالي هيبقى فيه طفلين. هم دول معاهم اتناشر كرة.

يبقى كده عدد الأطفال هيساوي اتنين. قسمنا عدد الكرات، اللي هو اتناشر، على عدد الكرات اللي مع كل الطفل، اللي هو ستة. وحصلنا كده على عدد الأطفال، اللي هو اتنين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.