فيديو: وحدات الكتلة

يوضح الفيديو تعريف الكتلة، ووحدات قياسها المختلفة، وكيفية التحويل بينها، مع أمثلة تطبيقية.

٠٤:٢٦

‏نسخة الفيديو النصية

وحدات الكتلة.

هنتعرّف في الدرس ده على تعريف الكتلة، ووحدات قياسها المختلفة، وإزاي بنحوّل بين الوحدات دي. أول حاجة تعريف الكتلة. إيه هي الكتلة؟ الكتلة هي قياس كمية المادة الموجودة في الجسم. والوحدات اللي بنستخدمها لقياسها في النظام المتري، هي: الملليجرام، والجرام، والكيلوجرام. دلوقتي الواحد جرام بيساوي ألف ملليجرام. والواحد كيلوجرام بيساوي ألف جرام. والطن بيساوي ألف كيلوجرام. لمّا بنيجي نحوّل بشكل عام من وحدات أكبر لوحدات أصغر، هنضرب. ولو جينا نحوّل من وحدات أصغر لوحدات أكبر، هنقسم. هنشوف في صفحة جديدة مثال.

لو عرفنا إن كتلة أكبر نيزك وصل إلى الأرض كانت مية ستة وتلاتين كيلوجرام. مطلوب منّنا نوجد الكتلة بتاعة الجسم ده بالجرامات. يعني إحنا عندنا مية ستة تلاتين كيلوجرام، عايزين نعرف بتكافئ كام بالجرامات. دلوقتي إحنا بنحوّل من وحدة أكبر، اللي هي الكيلوجرام؛ لوحده أصغر، هي الجرامات. يعني هنستخدم عملية الضرب. إحنا عارفين إن الواحد كيلوجرام بيساوي ألف جرام، يعني هنضرب في ألف. يبقى نقدر نقول المية ستة وتلاتين في ألف هتساوي مية ستة وتلاتين ألف جرام. يبقى كده قدرنا نجيب كتلة الجسم بالجرامات، اللي هي مية ستة وتلاتين ألف جرام.

لو عندنا مثال تاني. عرفنا إن سعاد خبزت قطعًا من البسكويت، كتلة كلٍّ منها ألفين ملليجرام. مطلوب منّنا نجيب كتلة القطعة الواحدة بالجرامات. إحنا عارفين إنها خبزت قطعًا من البسكويت، كتلة القطعة الواحدة ألفين ملليجرام. مطلوب منّنا نعرف وزن بقى القطعة، بس بالجرامات. إحنا دلوقتي بنحوّل من الملليجرام للجرام، يعني من وحدة أصغر لوحدة أكبر. يبقى هنستخدم عملية القسمة. عارفين كمان إن الألف ملليجرام بيساووا واحد جرام، يبقى هنقسم على ألف. يبقى ألفين على ألف، هتساوي اتنين جرام. يبقى كده قدرنا نجيب كتلة القطعة الواحدة بالجرامات. في صفحة جديدة، هنشوف مثال آخر.

دلوقتي عندنا شركة نقل، بتحمّل بضاعة كتلتها أربعة آلاف وتلتمية كيلوجرام. لو عرفنا إن الحد الأقصى المسموح بحمله هو خمسة أطنان، يا ترى هل يمكن للشاحنة تحميل البضاعة؟ دلوقتي إحنا عندنا كتلة البضاعة بالكيلوجرامات، والحد الأقصى اللي عندنا وحدة قياسه الطن. عشان نقدر نقارن الكميتين، محتاجين نحوّل من الطن للكيلوجرام.

عندنا الحد الأقصى المسموح بيه هو خمسة طن، عايزين نشوف هو كام كيلوجرام. لو حوّلنا من الطن للكيلوجرام، يعني من وحدة أكبر لوحدة أصغر، يبقى هنستخدم عملية الضرب. إحنا عارفين إن الواحد طن بيساوي ألف كيلوجرام، يعني هنضرب في ألف. يعني نقدر نقول إن خمسة في ألف، يعني خمسة آلاف كيلوجرام. ده الحد الأقصى اللي ممكن للشاحنة إنها تشيله. وبما أن الكتلة اللي المفروض إن العربية تشيلها أربعة آلاف وتلتمية كيلوجرام. وأربعة آلاف وتلتمية كيلوجرام دي، أصغر من الخمسة آلاف كيلوجرام اللي هم الحد الأقصى للحمولة. يبقى نقدر نقول إن الشاحنة تقدر تحمل هذه البضاعة.

اتعلّمنا في الدرس ده إيه تعريف الكتلة، وإيه الوحدات المستخدمة لقياسها، وإزاي نقدر نحوّل بين الوحدات دي.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.