فيديو: طرح الأعداد المكوَّنة من ثلاثة أرقام بإعادة التسمية وحل المسائل الكلامية

سوزان فائق

يوضح الفيديو طريقة طرح الأعداد المكونة من ثلاثة أرقام بإعادة التسمية، وحل مسائل كلامية عليها.

٠٨:١٥

‏نسخة الفيديو النصية

في الفيديو ده هنتكلّم عن طرح الأعداد المكوّنة من ثلاثة أرقام، باستخدام طريقة إعادة التسمية. وهنحلّ مسائل كلامية عليها. في طرح الأعداد المكوّنة من ثلاثة أرقام، اللي بيبقى فيها تلات خانات، اللي هو الآحاد والعشرات والمئات؛ بنستخدم تلات خطوات. لكل خانة خطوة. أول حاجة بنطرح الآحاد. وتاني خطوة بنطرح العشرات. تالت خطوة بنطرح المئات. وعلشان نعرف نطرح بالشكل ده، لازم نرتّب العددين فوق بعض. بحيث إن كل خانة، تحتها الخانة اللي زيّها بالظبط.

لو مطلوب ناتج طرح مثلًا، تلتمية اتنين وأربعين ناقص ميتين وعشرة، بيساوي كام. هنرتّب العددين فوق بعض؛ بحيث إن كل خانة تحتها الخانة اللي زيها بالظبط. يعني تلتمية اتنين وأربعين، الاتنين في الآحاد. يبقى العدد التاني، فيه الصفر في الآحاد. والواحد في العشرات. والاتنين في المئات. وبعد كده نطرح.

أول خطوة طرح الآحاد؛ يعني الاتنين ناقص الصفر، هتبقى اتنين. وبعدين طرح العشرات؛ يعني الأربعة ناقص الواحد، تبقى تلاتة. وبعد كده طرح المئات؛ يبقى تلاتة ناقص اتنين، بواحد. يبقى ناتج الطرح يساوي مية اتنين وتلاتين. ودايمًا ناخد بالنا، إن العدد اللي فوق ده، بيبقى أكبر من اللي تحت.

في بعض الأحيان، بيبقى العدد الكبير اللي فوق ده، فيه أرقام في خاناته بتبقى أصغر من العدد اللي تحت. يعني مثلًا لو كانت الأربعة دي صفر، وهنا تحت في العدد التاني واحد. بنضطر إن إحنا نستخدم طريقة إعادة التسمية. مثلًا لو عايزين نطرح تلتمية واتنين ناقص الميتين والعشرة. أول خطوة، هنطرح الآحاد؛ يبقى الاتنين ناقص الصفر، باتنين.

وبعد كده الصفر ناقص الواحد، ما ينفعش؛ لأن الصفر أصغر من الواحد. يبقى هنستلف من الخانة اللي بعد الصفر، اللي هي فيها التلاتة، هنستلف منها واحد، فالتلاتة هتبقى اتنين. والواحد بتاعة التلاتة، اللي هي في خانة المئات، بتروح بقيمة العشرة في خانة العشرات. يعني الصفر هيبقى قيمته عشرة، لمّا هنضيف عليه الواحد اللي جاي من خانة المئات. يبقى بعد كده هنطرح العشرة ناقص الواحد، يبقى تسعة. وبعد كده نشوف خانة المئات، فيها اتنين دلوقتي. يبقى الاتنين ناقص الاتنين، بقت صفر. يبقى ناتج الطرح تلتمية واتنين ناقص ميتين وعشرة، هيساوي اتنين وتسعين. والطريقة دي بنسميها إعادة التسمية.

عايزين نحسب ناتج طرح تسعمية ستة وستين ناقص ربعمية تمنية وسبعين. هنرتّب العددين فوق بعض؛ بحيث إن كل خانة تحتيها الخانة اللي زيها. يعني تسعمية ستة وستين، هتبقى التمنية في خانة الآحاد، تحت الستة. والسبعة تحت الستة التانية في خانة العشرات. وبعد كده الأربعة في خانة المئات. وهنطرحهم من بعض.

أول خطوة هي طرح الآحاد. الستة ناقص التمنية، ما ينفعش؛ لأن الستة أصغر من التمنية. هنضطر إن إحنا نستلف من الستة اللي بعدها، اللي هي الخانة اللي بعدها؛ العشرات. فالستة اللي بعدها هتنقص واحد، تبقى خمسة. والواحد اللي هناخدها مِ الستة في خانة العشرات، هتبقى الستة اللي في خانة الآحاد، تبقى اسمها ستاشر. ونطرح الستاشر ناقص التمنية، هتبقى تمنية.

تاني خطوة هنطرح العشرات. دلوقتي الستة بقت خمسة. يبقى هنطرح خمسة ناقص سبعة، ما ينفعش. يبقى الخمسة … لأنها أصغر. هنستلف للخمسة من الخانة اللي بعدها، واحد. يعني التسعة تبقى تمنية. والخمسة هتتغير تبقى خمستاشر. خمستاشر ناقص السبعة، يبقى تمنية. وبعد كده خانة المئات. هتبقى تمنية ناقص أربعة، بأربعة. يبقى ناتج الطرح ربعمية تمنية وتمانين.

نشوف أمثلة من حياتنا العملية. يملك رجل تمنمية جنيه. أنفق ستمية وخمسين جنيه للأعمال الخيرية. كم تبقّى معه؟ يعني هنطرح الستمية وخمسين، من التمنمية. يبقى تمنمية ناقص الستمية وخمسين. مرتّبين كل خانة تحت الخانة اللي زيها. هنطرح الآحاد ناقص الآحاد. يعني الصفر ناقص الصفر، يبقى صفر.

وبعد كده خانة العشرات. صفر ناقص الخمسة، ما ينفعش؛ لأن الصفر أصغر من الخمسة. هنستلف من التمنية واحد، تبقى سبعة. والواحد اللي هناخده من التمنية، هيبقى عشرة في خانة العشرات. يعني الصفر هتبقى عشرة. ونطرح عشرة ناقص الخمسة، تبقى خمسة. وبعد كده خانة المئات. سبعة ناقص ستة، تبقى واحد. إذن تبقّى مية وخمسين جنيه مع الرجل.

مثال كمان. مدرسة بها ربعمية وستين طالبًا. دفع ميتين اتنين وتمانين طالبًا رسوم رحلة مدرسية إلى حديقة الحيوان. كم عدد الطلاب غير المسجَّلين في الرحلة؟ هنطرح ميتين اتنين وتمانين، من ربعمية وستين. يبقى هنرتّب العددين؛ الكبير الأول اللي هو ربعمية وستين، تحتيه العدد التاني. كل خانة تحت الخانة اللي زيها. وبعدين نطرح.

أول خطوة الآحاد ناقص الآحاد. الصفر ناقص الاتنين، ما ينفعش. هنستلف من الستة واحد، تبقى خمسة. وبالتالي هنعيد تسمية الصفر؛ بدل ما هو كان صفر، هيبقى عشرة. يبقى عشرة ناقص الاتنين، هيبقى تمنية. وبعدين نطرح خانة العشرات. بقى فيها خمسة. الخمسة ناقص التمنية، ما ينفعش. يبقى هنستلف من اللي بعدها واحد، هتبقى تلاتة. والخمسة هتبقى خمستاشر. خمستاشر ناقص التمنية، يبقى سبعة. تلاتة ناقص اتنين في خانة المئات، هتبقى واحد. إذن عدد الطلاب غير المسجَّلين في الرحلة، هو مية تمنية وسبعين طالبًا.

اتكلمنا في الفيديو ده عن طرح الأعداد المكوّنة من تلات أرقام، اللي فيها آحاد عشرات مئات، باستخدام طريقة إعادة التسمية. وإزّاي نحل المسائل الكلامية عليها. وعرفنا تلات خطوات في الحل. أول خطوة طرح الآحاد، وبعدين طرح العشرات، وبعدين طرح المئات. وعرفنا إن العدد اللي فوق، دايمًا بيبقى أكبر من اللي تحت.

لكن لمّا تكون الخانات، فيها أرقام أصغر من اللي تحتها. فبناخد من الخانة اللي بعدها، يعني بنستلف منها، وبنعيد تسمية الخانة اللي إحنا واقفين فيها. يعني لمّا بناخد من العشرات للآحاد، فالواحد اللي بناخده من العشرات، بيبقى عشرة في الآحاد. والواحد اللي بناخده من المئات، بيبقى عشرة في العشرات. وبعدين نكمّل عملية الطرح.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.