فيديو: العامل المشترك الأكبر

أوجد العامل المشترك الأكبر للأعداد ١١٠، ٤٠، ١٢٠.

٠٢:٤٦

‏نسخة الفيديو النصية

أوجد العامل المشترك الأكبر للأعداد: مية وعشرة، وأربعين، ومية وعشرين.

في الأول خلينا نفتكر إن العامل المشترك الأكبر للأعداد هو أكبر عدد بيقسم في نفس الوقت الأعداد بدون أي باقي قسمة. فعشان نوجد العامل المشترك الأكبر للأعداد: مية وعشرة، وأربعين، ومية وعشرين؛ يبقى هنحلّل كل عدد فيهم إلى عوامله الأوّلية. وهنبدأ في الأول نحلّل العدد مية وعشرة إلى عوامله الأوّلية.

ففي الأول هنلاحظ إن العدد مية وعشرة هو عبارة عن حاصل ضرب اتنين في خمسة وخمسين، فهنلاحظ إن اتنين هنا هي عدد أوّلي، وأمّا خمسة وخمسين فهي حاصل ضرب خمسة في حداشر، وأمّا الاتنين عشان عدد أوّلي فمش هنحلّلها تاني، فتنزل زي ما هي. فهنلاحظ إن الأعداد اتنين وخمسة وحداشر هم التلاتة أعداد أوّلية، وبالتالي يبقى إحنا كده حلّلنا العدد مية وعشرة إلى عوامله الأوّلية.

بعد كده هنحلّل العدد أربعين إلى عوامله الأوّلية، فهنلاحظ إن أربعين هي حاصل ضرب أربعة في عشرة. بعد كده هنلاحظ إن أربعة هي حاصل ضرب اتنين في اتنين، وأمّا عشرة فهي حاصل ضرب اتنين في خمسة، فكده بقى عندنا كل الأعداد أعداد أوّلية؛ وبالتالي يبقى إحنا كده حلّلنا العدد أربعين إلى عوامله الأوّلية.

وآخر حاجة هنحلّل العدد مية وعشرين إلى عوامله الأوّلية، ففي الأول هنلاحظ إن مية وعشرين هي حاصل ضرب اتنين في ستين. وبما إن اتنين عدد أوّلي، فهتنزل زي ما هي. وبعد كده هنحلّل العدد ستين، وهنلاحظ إنه حاصل ضرب ستة في عشرة، لكن العدد ستة والعدد عشرة مش أعداد أوّلية، فبالتالي لسه نقدر نحوّلهم إلى عواملهم الأوّلية. والعدد اتنين بما إن هو عدد أوّلي، فهينزل زي ما هو، فهيبقى عندنا اتنين في … وهنحلّل ستة إلى اتنين في تلاتة، وبنفس الطريقة هنحلّل عشرة إلى اتنين في خمسة؛ فكده بقى كل الأعداد اللي عندنا أعداد أوّلية، فهيبقى كده حلّلنا العدد مية وعشرين إلى عوامله الأوّلية.

وبعد ما حلّلنا التلات أعداد، هنبدأ نشوف العوامل المشتركة بينهم. فهنلاحظ عندنا إن العدد اتنين هو عامل مشترك بين عوامل التلات أعداد، وهنلاحظ برضو إن عندنا العدد خمسة هو عامل مشترك أيضًا؛ وبالتالي هيبقى العامل المشترك الأكبر هيبقى بيساوي حاصل ضرب العاملين المشتركين، يعني هيساوي حاصل ضرب اتنين في خمسة، واللي هيساوي عشرة؛ وبالتالي هيبقى العامل المشترك الأكبر للأعداد: مية وعشرة، وأربعين، ومية وعشرين؛ هو: عشرة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.