فيديو: إيجاد القوى المجهولة بين مجموعة قوى في حالة اتزان تؤثِّر في نقطة

تؤثِّر قوى مقاديرها ﻙ نيوتن، ﻕ نيوتن، ١٦ جذر (٣) نيوتن، ٢٤ جذر (٣) نيوتن على النقطة و كما هو موضح بالشكل. إذا كانت القوى في حالة اتزان، فأوجد قيمة كلٍّ من ﻙ، ﻕ.

٠٤:٢٤

‏نسخة الفيديو النصية

تؤثر قوى مقاديرها: ك نيوتن، وَ ق نيوتن، ستاشر جذر تلاتة نيوتن، وأربعة وعشرين جذر تلاتة نيوتن؛ على النقطة و، كما هو موضح بالشكل. إذا كانت القوى في حالة اتزان، فاوجد قيمة كلٍّ من ك وَ ق.

علشان نوجد قيمة الـ ك وَ الـ ق، هنحلّل جميع القوى في اتجاه أفقي واتجاه رأسي، ومحصّلة القوى الأفقية هتساوي صفر، ومحصّلة القوى الرأسية تساوي صفر؛ لأن القوى في حالة اتزان هنحلل القوة ك إلى قوة أفقية، وقوة رأسية؛ القوة الأفقية هتبقى الـ ك في جتا ستين، والقوة الرأسية هتبقى الـ ك جا ستين. وبالنسبة للقوة ق هتبقى فيه مركبة أفقية ومركبة رأسية؛ الأفقية ق جتا ستين، والرأسية ق جا ستين.

هنحلل القوة ستاشر جذر تلاتة لقوة أفقية وقوة رأسية؛ الأفقية هتبقى ستاشر جذر تلاتة جتا تلاتين، والرأسية هتبقى ستاشر جذر تلاتة جا تلاتين. وآخر قوة اللي هي الأربعة وعشرين جذر تلاتة لأفقية ورأسية؛ الأفقية أربعة وعشرين جذر تلاتة جتا تلاتين، والرأسية هتبقى أربعة وعشرين جذر تلاتة جا تلاتين. محصّلة القوى الأفقية هتساوي صفر، يبقى ك جتا ستين زائد أربعة وعشرين جذر تلاتة جتا تلاتين، دول في اتجاه واحد، ناقص اللي في عكس اتجاهها، اللي هي الـ ق جتا ستين ناقص الستاشر جذر تلاتة جتا تلاتين، هيساوي صفر.

هنعوّض بالقيم جتا ستين بنُص، والـ جتا تلاتين بجذر تلاتة عَ الاتنين، يبقى ك على الاتنين، زائد … أربعة وعشرين جذر التلاتة في جذر تلاتة عَ الاتنين، زائد ستة وتلاتين، ناقص ق على الاتنين، ناقص أربعة وعشرين هيساوي صفر. يبقى الـ ك على الاتنين، ناقص الـ ق على الاتنين، هتساوي أربعة وعشرين ناقص ستة وتلاتين؛ يعني هتساوي سالب اتناشر. بضرب طرفَي المعادلة في الاتنين، يبقى الـ ك ناقص الـ ق هتساوي … سالب اتناشر في اتنين، يعني سالب أربعة وعشرين. يبقى دي المعادلة الأوّلانية الناتجة عن محصّلة القوى الأفقية.

هنوجد المعادلة الناتجة عن محصّلة القوى الرأسية، اللي هي هتبقى ك جا ستين زائد ق جا ستين ناقص ستاشر جذر تلاتة جا تلاتين ناقص أربعة وعشرين جذر تلاتة جا تلاتين هيساوي صفر. هنعوّض بالـ جا ستين بجذر تلاتة عَ الاتنين، والـ جا تلاتين بنُص، يبقى المعادلة هتبقى بالشكل ده. بقسمة المعادلة كلها على جذر تلاتة على الاتنين، يبقى الـ ك زائد الـ ق ناقص ستاشر ناقص أربعة وعشرين هيساوي صفر. يبقى الـ ك زائد الـ ق ناقص الأربعين هنودّيها الجهة الأخرى، يبقى بتساوي أربعين، يبقى المعادلة ك زائد ق تساوي أربعين، اللي هي ناتجة عن محصّلة القوى الرأسية.

المعادلة رقم واحد والمعادلة رقم اتنين هنجمعهم على بعض، يبقى الـ ك زائد الـ ك هتبقى اتنين ك، والناقص ق زائد الـ ك هتبقى بصفر، يساوي … سالب أربعة وعشرين زائد أربعين هتساوي ستاشر؛ يبقى الـ ك تساوي تمنية. في التعويض في المعادلة رقم اتنين بالـ ك تساوي تمنية، زائد الـ ق هتساوي أربعين، يبقى الـ ق تساوي اتنين وتلاتين؛ يبقى الـ ك هتساوي تمنية، والـ ق هتساوي اتنين وتلاتين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.