فيديو: القسمة على ٣

يشرح الفيديو طريقة القسمة على العدد ٣، عن طريق استخدام النماذج، الحقائق المترابطة بعضها ببعض، أو الطرح المتكرر.

٠٥:٢٥

‏نسخة الفيديو النصية

هنتكلّم عن القسمة على تلاتة. هنتعلّم إزّاي نجيب ناتج القسمة على تلاتة باستعمال النماذج، وحقائق الضرب المرتبطة. هبتدي الشرح بالنشاط التالي.

هنشرح في النشاط التلات خطوات الأساسية اللي هنستعملها عشان نعرف نستعمل قِطَع العدّ، ونكوّن نموذج، ونجيب ناتج القسمة. الخطوة الأولى: استعمل عشرين قطعة عدّ، وحُطّ كل خمس قِطَع في عمود. وهنستمر في تكوين الأعمدة لحدّ ما تخلص قِطَع العدّ.

الخطوة اتنين: هننظّم الأعمدة بعضها جنب بعض. يعني العمود الأولاني فيه خمس قِطَع عدّ. العمود التاني فيه خمس قِطَع عدّ. كده أنا استعملت عشر قِطَع. العمود التالت فيه خمس قِطَع عدّ. والعمود الرابع برضو فيه خمس قِطَع عدّ. كده أنا استعملت عشرين قطعة عدّ، وحطّيت الأعمدة بعضها جنب بعض.

الخطوة رقم تلاتة: لمّا هنعدّ قِطَع العدّ في كل صف هنلاقي فيه أربع قِطَع عدّ. وبكده أقدر أقول إنه عشرين على خمسة هيساوي أربعة، أو باستعمال رمز القسمة التاني عشرين على خمسة هيكون الناتج أربعة. هنكمّل في الصفحة اللي جايّة.

مثال: مع محمد، وعلي، وحسن أربعة وعشرين لعبة. إذا كان كلّ منهم معاه نفس العدد من الألعاب اللي مع التاني، فكم لعبة مع كل واحد منهم؟

هنلاحظ إنه في النشاط اللي فات استعملنا قِطَع العدّ لعمل شبكات عشان أمثّل المسألة. ودلوقتي هستعمل قِطَع العدّ عشان أكوّن مجموعات متساوية؛ عشان أجيب ناتج القسمة، عشان أعرف عدد اللعب اللي مع كل واحد. وبكده هقسم أربعة وعشرين لعبة على تلات مجموعات متساوية. العدد الأولاني أربعة وعشرين اسمه المقسوم، والعدد التاني، اللي هو تلاتة، اسمه المقسوم عليه.

دلوقتي هكوّن المجموعات. هبتدي أكوّن أعمدة؛ كل عمود فيه تلات قِطَع عدّ. واحد، اتنين، تلاتة، أربعة، خمسة، ستة. وهكمّل لحدّ امّا أوصل لأربعة وعشرين قطعة. أول ما أكوّن أربعة وعشرين قطعة عدّ هقدر دلوقتي أكوّن مجموعات من الصفوف اللي حصلنا عليها.

من النموذج هلاحظ إني حصلت على تلات صفوف، أو تلات مجموعات؛ في كل صف تمن قِطَع عدّ. يعني أقدر أقول إنه ناتج القسمة هو تمنية. يعني أربعة وعشرين على تلاتة هيساوي تمنية، أو باستعمال رمز القسمة التاني أربعة وعشرين على تلاتة هيساوي تمنية. إذن نصيب كل شخص تمن لعب. هنكمّل في الصفحة اللي جايّة.

مثال: اتقسّمت سلمى وأصدقاءها الأربعتاشر على تلات سيارات للذهاب إلى الشاطئ. كم عدد الأصدقاء في كل سيارة؟

عشان أجيب عدد الأصدقاء في كل سيارة، هجيب ناتج قسمة خمستاشر على تلاتة، أو باستعمال رمز القسمة التاني خمستاشر على تلاتة. هنستعمل حقائق الضرب المرتبطة. هفكّر إزّاي؟ هقول خمستاشر على تلاتة هيساوي كام، إذن هبتدي أفكّر تلاتة في كام هيساوي خمستاشر. يعني إيه العدد اللي هضربه في تلاتة عشان يكون ناتج الضرب هيساوي خمستاشر. هلاحظ إنه ناتج ضرب تلاتة في خمسة هيساوي خمستاشر.

وبكده أقدر أستنتج إنه خمستاشر على تلاتة هيساوي خمسة، أو باستعمال رمز القسمة التاني خمستاشر على تلاتة هيكون الناتج خمسة. يعني خمس أصدقاء في كل سيارة. هنكمّل في الصفحة اللي جايّة.

هنلاحظ كمان إن ممكن نستعمل الطرح المتكرّر عشان نجيب ناتج القسمة. مثال: أوجد ناتج قسمة ستة على تلاتة.

في البداية هستعمل خط الأعداد. هبتدي من العدد ستة، وهرجع كل مرة تلات عدّات. ستة هوصل لتلاتة، وبعد كده من تلاتة هوصل لصفر. باستعمال الطرح المتكرّر هلاحظ إنه ستة ناقص تلاتة هيساوي تلاتة، وبعدين تلاتة ناقص تلاتة هيساوي صفر. يعني هنلاحظ إننا طرحنا تلاتة مرتين.

وبكده أقدر أقول إنه ناتج قسمة ستة على تلاتة هيساوي اتنين، أو باستعمال الرمز التاني للقسمة ستة على تلاتة هيساوي اتنين. يعني الناتج هو: اتنين.

وبكده هنكون اتعلّمنا إزّاي نجيب ناتج القسمة على تلاتة باستعمال النماذج، أو حقائق الضرب المرتبطة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.