تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: ميل المستقيم

أحمد مدحت

يوضح الفيديو مفهوم ميل مستقيم، والقانون المستخدم لإيجاد الميل، مع أمثلة توضيحية.

٠٣:٤٨

‏نسخة الفيديو النصية

هنتكلّم عن ميل المستقيم. في الفيديو ده هنعرف مفهوم الميل، وكمان هنعرف قاعدة الميل أو القانون المستخدم لإيجاد الميل. بالنسبة للميل، فده عبارة عن مصطلح بنستخدمه علشان نوصف مدى انحدار الخط المستقيم عدديًّا. وتعريف الميل هو نسبة التغيّر الرأسي أو الارتفاع إلى التغيّر الأفقي، واللي تُعتبر المسافة الأفقية. وبالتالي الميل يُعتبر معدل تغيُّر. وفي الدوال الخطية علشان نجيب الميل، ما فيش مشكلة في إن إحنا نختار أيّ نقطتين علشان نوجد الميل أو معدل التغيّر. وده لأن معدل التغيّر أو الميل ثابت دايمًا.

أمّا بالنسبة للقانون أو القاعدة اللي بنستخدمها علشان نوجد الميل. فمن خلال تعريف الميل، هنلاقي إن الميل يساوي التغيّر الرأسي، على التغيّر الأفقي. والتغيّر الرأسي بيكون بين أيّ نقطتين عَ الخط المستقيم. والتغيّر الأفقي بيكون بين نفس النقطتين. هيظهر لنا شكل نوضّح بيه أكتر. في الشكل اللي عندنا، هنلاقي السلم ج د بيستند على حائط رأسي، وأرض أفقية. وفيه عندنا حالتين هم أ وَ ب. هنجيب الميل بتاع السلم ج د في كلا الحالتين.

هنبدأ بالحالة أ. بالنسبة للميل، فمن تعريفه هنلاقي الميل بيساوي التغيّر الرأسي، على التغيّر الأفقي. ومن خلال الشكل اللي عندنا، هنلاقي إن التغيّر الرأسي هو اتنين متر، والتغيّر الأفقي هو تلاتة متر. معنى كده إن الميل بتاع السلم ج د في الحالة أ، هيساوي اتنين متر على تلاتة متر. يعني الميل بيساوي اتنين على تلاتة. أمّا في الحالة ب، فهنلاقي التغيّر الرأسي هو تلاتة متر، والتغيّر الأفقي هو اتنين متر. بالتالي الميل بتاع السلم ج د في الحالة ب، هيساوي تلاتة متر على اتنين متر. يعني بيساوي تلاتة على اتنين.

هنلاحظ إن قيمة الميل بتاع السلم ج د في الحالة أ، واللي هو اتنين على تلاتة؛ أقل من قيمة الميل في الحالة ب، واللي هو تلاتة على اتنين. هنلاحظ إن السلم ج د في الحالة أ، أقل انحدارًا من السلم ج د في الحالة ب. وده اللي بتعكسه القيمتين بتوع الميل في الحالة أ، والحالة ب. معنى كده فعلًا إن الميل بيوصف مدى انحدار الخط المستقيم عدديًّا. بكده يبقى إحنا عرفنا تعريف الميل، وكمان عرفنا القانون المستخدم لإيجاد الميل. هنشوف مثال، بس في الصفحة اللي جاية. هنقلب الصفحة، هيظهر لنا المثال.

في المثال اللي عندنا فيه شكل، والشكل ده عبارة عن جبل. عايزين نجيب ميل الجبل ده، إذا كان بينحدر بمقدار خمستاشر متر لكل تغيُّر أفقي مقداره أربعة وعشرين متر. من تعريف الميل، الميل بيساوي التغيّر الرأسي، على التغيّر الأفقي. وبالنسبة للجبل، فهو بينحدر بمقدار خمستاشر متر لكل تغيُّر أفقي مقداره أربعة وعشرين متر. معنى كده إن التغيّر الرأسي هو خمستاشر متر، والتغيّر الأفقي أربعة وعشرين متر. وبالتالي ميل الجبل يساوي خمستاشر متر، على أربعة وعشرين متر. يعني ميل الجبل هيساوي خمسة على تمنية. وهو ده المطلوب.

بكده يبقى إحنا في الفيديو ده عرفنا إن الميل ده عبارة عن مصطلح بيوصف مدى انحدار خط مستقيم عدديًّا. وكمان عرفنا إن تعريف الميل إن هو عبارة عن نسبة التغيّر الرأسي، واللي بتمثّل الارتفاع؛ إلى التغيّر الأفقي، واللي بتمثّل المسافة الأفقية. وكمان عرفنا القانون المستخدم لإيجاد الميل. وهو إن الميل بيساوي التغيّر الرأسي، على التغيّر الأفقي. والتغيّر الرأسي ده بيكون بين أيّ نقطتين عَ الخط المستقيم، والتغيّر الأفقي بيكون ما بين نفس النقطتين.