فيديو: الكسور والأعداد العشرية

يوضِّح الفيديو خطوات تمثيل الأعداد العشرية على شكل كسور باستخدام الرسم، مع أمثلة توضيحية.

٠٦:٣٤

‏نسخة الفيديو النصية

الكسور والأعداد العشرية.

لو كنا عند محل بائع الفاكهة واخترنا تفاحتين. ورُحنا حطيناهم على الميزان. ولاقينا إن وزنهم الميزان طلّعهولنا خمسة وسبعين من مية من الكيلوجرام. خمسة وسبعين من مية من الكيلوجرام دول يا ترى يكافئوا كسر قدّ إيه من الكيلوجرام؟

هنوجد الحل على تلات خطوات. الخطوة الأولى: إننا هنستخدم الرسم عشان نقدر نمثّل الأجزاء من عشرة، والأجزاء من مية، والأجزاء من ألف؛ عشان نقدر نكتب أي عدد عشري على شكل كسر. هنشوف القيمة المكانية للرقم اللي موجود على أقصى اليمين في العدد العشري. يعني عندنا هنا الخمسة القيمة المكانية ليها هي جزء من مائة. يبقى إحنا محتاجين الرسم بتاعنا يبقى عبارة عن مربّع متقسّم لمية جزء، زي اللي قدامنا ده. هنظلّل من المية مربع اللي قدامنا دول أو للمية جزء اللي متقسمين جوّه المربع الكبير، هنظلل منهم خمسة وسبعين جزء.

الخطوة التانية: هي كتابة العدد العشري على شكل كسر. يعني إحنا عندنا خمسة وسبعين من مية. هنكتبها إزّاي؟ إحنا ظلّلنا خمسة وسبعين جزء من مية جزء؛ يعني خمسة وسبعين على مية. هنكتبها على شكل كسر.

الخطوة التالتة: هي تبسيط الكسر إن أمكن. يعني إحنا وصلنا إن الكسر اللي عندنا هو خمسة وسبعين على مية. بالقسمة على العامل المشترك الأكبر للبسط والمقام اللي هو خمسة وعشرين. هنقدر نبسّطه إن خمسة وسبعين على مية هتبقى بتساوي خمسة وسبعين على خمسة وعشرين، على مية على خمسة وعشرين. يعني هيساوي تلاتة على أربعة. كده بسّطنا الكسر لأبسط صورة؛ تلاتة على أربعة هو ده الكسر المناظر لخمسة وسبعين من المية من الكيلوجرام. يبقى الكمية المناظرة هي تلاتة على أربعة من الكيلوجرام.

هنشوف في صفحة جديدة مثال كمان.

لو مطلوب منّنا نكتب تمنية من عشرة على شكل كسر، ونكتبه في أبسط صورة.

هنتّبع التلات خطوات اللي إحنا لسّه عاملينهم قبل كده. الخطوة الأولى: هنستخدم الرسم عشان نبيّن الجزء اللي محتاجين نظلّله. هنبص الأول على العدد العشري اللي عندنا. وهنبص على العدد اللي على أقصى يمين العلامة. هنشوف القيمة المكانية بتاعته. القيمة المكانية هنا للتمنية هي جزء من عشرة. يبقى إحنا محتاجين شكل متكوّن من عشر أجزاء متساوية زي ده. هنظلل العدد اللي عندنا عبارة عن تمنية من عشرة؛ يعني تمن أجزاء من عشرة. معناها إن إحنا محتاجين نظلّل تمن أجزاء من العشر أجزاء المتساوية اللي قدامنا دول.

الخطوة التانية: هنكتب الكسر المناظر للأجزاء المظلّلة. يعني عدد الأجزاء المظلّلة على عدد الأجزاء الكلية. يعني تمنية من عشرة هتبقى بتساوي تمنية على عشرة؛ عشان إحنا ظلّلنا تمن أجزاء من عشر أجزاء. فيبقى الكسر المناظِر هو تمنية على عشرة.

الخطوة التالتة: التبسيط إن أمكن. يعني عندنا هنشوف تمنية على عشرة هل نقدر نبسّط ولا لأ. هنشوف العامل المشترك الأكبر اللي بين الاتنين، هنلاقي إن فيه عامل مشترك أكبر هو اتنين. يبقى هنقسم على العامل المشترك الأكبر في البسط والمقام. يعني تمنية على اتنين، على عشرة على اتنين. بعد التبسيط هتبقى بتساوي أربعة على خمسة. وبكده يبقى قدرنا نكتب تمنية من عشرة على شكل كسر في أبسط صورة، اللي هو أربعة على خمسة.

في صفحة جديدة هنشوف مثال آخر.

لو مطلوب منّنا نكتب تسعة من ألف على شكل كسر ونبسّطه في أبسط صورة.

أول خطوة: هنشوف العدد اللي على أقصى يمين العلامة العشرية. هنشوف القيمة المكانية بتاعته. هنلاقي إن القيمة المكانية للعدد تسعة هنا هي جزء من الألف. ده معناها إن إحنا عشان نمثّله على نموذج، محتاجين نموذج بيتكوّن من ألف وحدة، زي الشكل ده. دلوقتي هنظلّل على الشكل ده اللي هو عبارة عن شكل متكوّن من ألف جزء متساوي. هنظلّل تسع وحدات. ودي كانت الخطوة الأولى.

الخطوة التانية: نكتب الكسر المناظر. هنلاقي إن تسعة من ألف بتساوي تسعة على ألف. يعني الألف جزء اللي عندنا ظلّلنا منهم تسع أجزاء. فالكسر المناظر هو تسعة على ألف. وما فيش أي عامل مشترك بين البسط والمقام فبالتالي دي أبسط صورة للكسر المطلوب.

وبكده يبقى اتعلّمنا إزّاي نقدر نحوّل أي عدد عشري إلى الكسر المناظر بتلات خطوات. الخطوة الأولى: وهي إننا بنشوف القيمة المكانية للعدد الموجود على أقصى اليمين في العدد العشري. ومنها بنقدر نحدد إحنا محتاجين نموذج بيتكوّن من كام وحدة. ونظلّل الأجزاء … ونظلّل الأجزاء المناظرة للعدد اللي مكتوب ده. والخطوة التانية: إن إحنا بنكتب الكسر اللي بيمثّل عدد الأجزاء اللي ظلّلناها. يعني عدد الأجزاء المظلّلة على عدد الأجزاء الكلية. والخطوة التالتة: إن إحنا بنحاول نبسّط الكسر ده لأبسط صورة إن أمكن. وبكده يبقى عرفنا نحوّل العدد العشري للكسر المناظر في أبسط صورة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.