فيديو: امتحان الفزياء للعام السابق • ٢٠١٨/٢٠١٧ • السؤال السادس

امتحان الفزياء للعام السابق • ٢٠١٨/٢٠١٧ • السؤال السادس

٠٣:٢٢

‏نسخة الفيديو النصية

يمثّل الشكل الموضَّح جزءًا من دائرة كهربية، فرق الجهد بين النقطتين 𝑏 وَ 𝑐 فيه يساوي تلاتة فولت. ما فرق الجهد بين النقطتين 𝑎 وَ 𝑑؟

عندنا جزء من دايرة كهربية بالشكل ده. ومُعطى إن فرق الجهد بين النقطتين 𝑏 وَ 𝑐 يساوي تلاتة فولت. والمطلوب نوجد فرق الجهد بين النقطتين 𝑎 وَ 𝑑.

لو افترضنا إن فيه تيار شدته 𝐼 جاي مِ النقطة 𝑎، مَرّ عبر المقاومة 𝑅 ومنه للنقطة 𝑏. عند النقطة دي التيار هيتقسم ويرجع يتجمّع تاني عند النقطة دي ويمر بالنقطة 𝑐. ومرة تانية ينقسم عند النقطة دي ويتجمع تاني في النقطة دي ويمر بالنقطة 𝑑. باستخدام قانون أوم؛ حيث فرق الجُهد بين نقطتين بيساوي شدّة التيار المارّ بينهم في قيمة المقاومة المكافئة. وبتطبيق قانون أوم بين النقطتين 𝑎 وَ 𝑏، 𝑉 𝑎 𝑏 هتساوي 𝐼 في 𝑅 𝑎 𝑏. وبما إن 𝑅 𝑎 𝑏 هي المقاومة 𝑅، إذن ده 𝑉 𝑎 𝑏 هتساوي 𝐼 𝑅. بتطبيق قانون أوم بين النقطتين 𝑏 وَ 𝑐، إذن 𝑉 𝑏 𝑐 هيساوي 𝐼 في 𝑅 𝑏 𝑐.

بين النقطتين 𝑏 وَ 𝑐. المقاومتين متساويتين ومتصلتين على التوازي. والمقاومة المكافئة لعدَّة مقاومات متساوية ومتصلة على التوازي، بتساوي قيمة المقاومة الواحدة على عدد المقاومات. إذن 𝑅 𝑏 𝑐 هتساوي 𝑅 عَ الاتنين. وبالتعويض عن قيمة 𝑅 𝑏 𝑐، 𝑉 𝑏 𝑐 هتساوي 𝐼 في 𝑅 على الاتنين. بتطبيق قانون أوم بين النقطتين 𝑐 وَ 𝑑، 𝑉 𝑐 𝑑 هتساوي 𝐼 في 𝑅 𝑐 𝑑. بين النقطتين 𝑐 وَ 𝑑 المقاومات متساوية ومتصلة على التوازي. فالمقاومة المكافئة ليهم اللي هي 𝑅 𝑐 𝑑 بتساوي 𝑅 على تلاتة. وبالتعويض عن قيمة 𝑅 𝑐 𝑑، 𝑉 𝑐 𝑑 هتساوي 𝐼 في 𝑅 على تلاتة.

عشان نوجد فرق الجهد بين النقطتين 𝑎 وَ 𝑑 محتاجين الأول نوجد شدّة التيار المار بينهم. فبالتعويض عن قيمة 𝑉 𝑏 𝑐 اللي هي بتساوي تلاتة فولت، هيبقى تلاتة فولت بيساوي 𝐼 في 𝑅 عَ الاتنين. وبضرب طرفَي معادلة في اتنين على 𝑅، 𝐼 هتساوي تلاتة في اتنين على 𝑅؛ يعني 𝐼 هتساوي ستة على 𝑅. ونقدر نستخدمها عشان نوجد قيمة 𝑉 𝑎 𝑏 وَ 𝑉 𝑐 𝑑. 𝑉 𝑎 𝑏 هتساوي ستة على 𝑅 في 𝑅. وباختصار الـ 𝑅 مع الـ 𝑅، 𝑉 𝑎 𝑏 هتساوي ستة فولت. 𝑉 𝑐 𝑑 هتساوي ستة على 𝑅 في 𝑅 على تلاتة. وباختصار الـ 𝑅 مع الـ 𝑅، 𝑉 𝑐 𝑑 هتساوي ستة على تلاتة فولت. يعني هتساوي اتنين فولت.

وبما أن فرق الجهد بين النقطتين 𝑎 وَ 𝑑 بيساوي فرق الجهد بين النقطتين 𝑎 وَ 𝑏، زائد فرق الجهد بين النقطتين 𝑏 وَ 𝑐، زائد فرق الجهد بين النقطتين 𝑐 وَ 𝑑. 𝑉 𝑎 𝑏 إحنا جبنا قيمتها وبتساوي ستة فولت. وَ 𝑉 𝑏 𝑐 معطى إن قيمتها بتساوي تلاتة فولت. وَ 𝑉 𝑐 𝑑 إحنا جِبنا قيمتها وبتساوي اتنين فولت. إذن 𝑉 𝑎 𝑑 هتساوي ستة فولت زائد تلاتة فولت زائد اتنين فولت. إذن 𝑉 𝑎 𝑑 هتساوي حداشر فولت. وبكده يبقى جبنا فرق الجهد بين النقطتين 𝑎 وَ 𝑑.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.