فيديو: الطرح من الأعداد ١٠ و١١ و١٢

يوضح الفيديو طرق الطرح من الأعداد ١٠ و١١ و١٢ باستخدام المكعبات.

٠٥:٤٩

‏نسخة الفيديو النصية

الطرح من الأعداد عشرة وحداشر واتناشر.

هنتعلّم في الدرس ده إزاي نقدر نطرح أيّ عدد من الأعداد عشرة أو حداشر أو اتناشر. لو عندنا عشر مكعبات، عايزين نطرح منهم اتنين. يعني العشر مكعبات دول هنشيل منهم أو هننقّص منهم اتنين. عشان نقدر نجيب ناتج الطرح، يبقى هنعدّ المكعبات اللي باقية عندنا: واحد، اتنين، تلاتة، أربعة، خمسة، ستة، سبعة، تمنية. يبقى عشرة ناقص اتنين، الناتج هيبقى تمنية.

طب لو عندنا عشر مكعبات، وعايزين نطرح منهم أربع مكعبات، يعني نشيل أو ننقّص منهم أربع مكعبات. واحد، اتنين، تلاتة، أربعة. عشان نعرف ناتج عملية الطرح، هنعدّ المكعبات اللي باقية عندنا: واحد، اتنين، تلاتة، أربعة، خمسة، ستة. يبقى كده باقي عندنا ست مكعبات. يبقى عشرة ناقص أربعة، هيبقى الناتج ستة.

هنجيب صفحة جديدة. ونشوف عمليات الطرح من العدد حداشر. لو عايزين نطرح أربعة من حداشر. ده معناها إن لو عندنا حداشر مكعب، وعايزين نشيل منهم أربعة. كده شِلنا أربع مكعبات. عشان نعرف الباقي هنعدّ المكعبات اللي متبقِّية عندنا: واحد، اتنين، تلاتة، أربعة، خمسة، ستة، سبعة. هنلاقي إن متبقّي عندنا سبع مكعبات. ده معناها إن حداشر ناقص أربعة، هيبقى الناتج بيساوي سبعة.

لو عايزين نطرح حداشر ناقص تسعة، ده معناه إن لو عندنا حداشر مكعب، عايزين نشيل منهم تسع مكعبات، ونشوف الناتج أو عدد المكعبات الباقية هيبقى كام. دلوقتي عايزين نشيل من الحداشر تسع مكعبات. آدي واحد، اتنين، تلاتة، أربعة، خمسة، ستة، سبعة، تمنية، تسعة. كده هنشيل تسع مكعبات. ونعدّ المكعبات الباقية، هنلاقي إن باقي عندنا مكعبين اتنين. يبقى ناتج عملية الطرح هنا … حداشر ناقص تسعة هيساوي اتنين.

هنجيب صفحة جديدة، ونشوف الطرح من العدد اتناشر. لو عايزين نجيب ناتج عملية الطرح: اتناشر ناقص سبعة، معناها إن لو عندنا اتناشر مكعب، فإحنا عايزين ننقَّص أو نشيل منهم سبعة. واحد، اتنين، تلاتة، أربعة، خمسة، ستة، سبعة. كده هنشيل سبع مكعبات، ونعدّ المكعبات المتبقّية. وهي دي هتبقى ناتج عملية الطرح: واحد، اتنين، تلاتة، أربعة، خمسة. يبقى كده باقي عندنا خمس مكعبات. ده معناه إن اتناشر ناقص سبعة هيبقى الناتج يساوي خمسة.

لو عايزين نعمل عملية الطرح: اتناشر ناقص تلاتة. ده معناه إن لو عندنا اتناشر مكعب، عايزين نشيل منهم تلاتة أو ننقّص منهم تلاتة: واحد، اتنين، تلاتة. دلوقتي هنعدّ المكعبات الباقية؛ عشان نعرف ناتج عملية الطرح. واحد، اتنين، تلاتة، أربعة، خمسة، ستة، سبعة، تمنية، تسعة. دلوقتي اتبقَّى عندنا تسع مكعبات. ده معناه إن ناتج عملية الطرح هيبقى تسعة. يبقى اتناشر ناقص تلاتة هيبقى الناتج يساوي تسعة.

هنجيب صفحة جديدة، ونشوف مثال. مطلوب مننا نستخدم المكعبات عشان نمثّل جملة الطرح. أول مثال: مطلوب مننا نمثّل جملة الطرح: عشرة ناقص خمسة بتساوي خمسة، باستخدام المكعبات أو النماذج.

هنستخدم عشر مكعبات. هنحذف أو هننقّص منهم خمسة: واحد، اتنين، تلاتة، أربعة، خمسة. وهنعدّ المكعبات المتبقّية، هنلاقي إن المكعبات المتبقّية اللي عندنا خمس مكعبات. كده مثّلنا جملة الطرح دي باستخدام المكعبات.

تاني مثال عندنا: مطلوب مننا نمثّل جملة الطرح دي: اتناشر ناقص أربعة تساوي تمنية. ده معناها إن إحنا محتاجين نستخدم اتناشر مكعب، وهنحذف أو ننقّص منهم أربعة، ونتأكد إن الباقي تمنية. عندنا دلوقتي اتناشر مكعب. هنبتدي نشيل منهم أربعة: واحد، اتنين، تلاتة، أربعة. ونعدّ عدد المكعبات المتبقّية: واحد، اتنين، تلاتة، أربعة، خمسة، ستة، سبعة، تمنية. بالفعل اتأكّدنا إن المكعبات المتبقّية عندنا هي تمن مكعبات. وكده قدرنا نمثّل عملية الطرح أو جملة الطرح اللي قدامنا دي باستخدام المكعبات.

عرفنا في الدرس ده إزاي نقدر نطرح من الأعداد عشرة أو حداشر أو اتناشر. وقدرنا نستخدم المكعبات؛ عشان نمثّل جمل الطرح المختلفة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.