فيديو: طرح عددين مُكوَّنين من عدة أرقام

ما المقدار الذي يقل به العدد ٩‎٥٣٧ عن العدد ٩٠‎١٩٦؟

٠٣:٣٩

‏نسخة الفيديو النصية

ما المقدار الذي يقل به العدد تسعة آلاف خمسمية سبعة وتلاتين، عن العدد تسعين ألف مية ستة وتسعين؟

معطى عندنا في السؤال إن العدد تسعة آلاف خمسمية سبعة وتلاتين. بيقل عن العدد تسعين ألف مية ستة وتسعين بمقدار ما. والمطلوب منّنا إن إحنا نوجد المقدار ده. معنى إن العدد الأول ده، بيقلّ عن العدد التاني بمقدار ما. إننا لو جمعنا المقدار ده، على العدد الأول. هيبقى المجموع هو العدد الأكبر، أو العدد التاني. يبقى المقدار اللي مطلوب إيجاده ده، هو نفسه الفرق بين العددين.

يبقى دلوقتي هنجري عملية طرح. هنطرح العدد الصغير، من العدد الكبير. وناتج الطرح اللي إحنا هنوجده، هيبقى هو المقدار اللي بيقل بيه العدد الصغير، عن العدد الأكبر. هنبتدي نجري عملية الطرح اللي عندنا دي رأسيًّا. هنحطّ العددين تحت بعض. وبنبدأ دايمًا بالعدد الأكبر. ونتأكد إن إحنا حاطّين كل رقم من الأرقام اللي بيتكوّن منها العددين، في الخانة المكانية الصحيحة. وبنبدأ الطرح دايمًا من خانة الآحاد.

ستة ناقص سبعة. مش هينفع نطرح سبعة من ستة؛ عشان السبعة أكبر. فكده هنروح للخانة المكانية اللي قبلها، اللي هي العشرات. هنشوف الرقم اللي فيها، اللي هو تسعة. هناخد واحد من التسعة دي، فهتصبح تمنية. والستة اللي في خانة الآحاد، هتصبح ستاشر. عشان إحنا أخدنا واحد من خانة العشرات، يساوي عشرة. فلمّا نحطّه على الستة اللي في خانة الآحاد، هيبقى كده فيه ستاشر في خانة الآحاد.

نبتدي نطرح ستاشر ناقص سبعة، هيبقى الناتج تسعة. بعد كده نروح لخانة العشرات، ونبتدي نطرح الأرقام اللي فيها. تمنية ناقص تلاتة، هيبقى الناتج خمسة. وبعدين نبتدي نطرح الأرقام اللي موجودة في خانة المئات. واحد ناقص خمسة. مش هينفع نطرح الخمسة من الواحد؛ عشان الخمسة أكبر. فهنشوف الخانة المكانية اللي قبلها، اللي هي الألوف.

بس هنلاقي إن فيها الرقم صفر، مش هينفع ناخد منه أيّ رقم. فهنضطر نروح للخانة اللي قبلها هي كمان، اللي هي خانة عشرات الألوف. فيها الرقم تسعة، نقدر ناخد منه واحد، فهيصبح تمنية. الواحد ده لمّا يروح خانة الألوف، هيبقى عشرة. لأنه جاي من خانة عشرات الألوف، فيساوي عشرة من الألوف. وبعدين من العشرة اللي أصبحوا في خانة الألوف، هناخد منهم واحد؛ هتصبح باقي فيها تسعة. والواحد إلى أخدناه لمّا يروح لخانة المئات، هيصبح بعشرة مئات. يعني عشرة.

طب إحنا كان عندنا أصلًا واحد في خانة المئات. لمّا نحطّ عليه العشرة، اللي إحنا أخدناهم من الخانة السابقة، فهيبقى الخانة دي فيها حداشر. دلوقتي نقدر نطرح حداشر ناقص خمسة، هيبقى الناتج ستة. وبعدين نطرح الأرقام اللي في خانة الألوف. تسعة ناقص تسعة هيساوي صفر. دلوقتي هنشوف خانة عشرات الألوف. هنلاقي إن خانة عشرات الألوف فيها تمنية فقط. يبقى التمنية هتنزل زيّ ما هي.

يبقى ناتج عملية الطرح هو تمانين ألف ستمية تسعة وخمسين. وهو ده المقدار اللي بيقلّ بيه العدد الأول، عن العدد التاني. وهو نفسه بيمثّل الفرق بين العددين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.