فيديو: حل المسائل الكلامية بتكوين وحل نظام من معادلات خطية تتضمَّن نِسَبًا

أوجد طول وعرض قطعة أرض مستطيلة محيطها ١‎٨٩٦ م، إذا كانت النسبة بينهما ١ : ٢.

٠٢:٤٩

‏نسخة الفيديو النصية

أوجد طول وعرض قطعة أرض مستطيلة محيطها ألف تمنمية ستة وتسعين متر، إذا كانت النسبة بينهما واحد إلى اتنين.

يعني معطى عندنا إن فيه قطعة أرض على شكل مستطيل، ومعطى عندنا إن نسبة الطول إلى العرض هي واحد إلى اتنين. فمعنى كده إن الطول لو بيساوي جزء واحد، فهيبقى العرض بيساوي جزئين. يعني هيبقى عرض المستطيل هو ضعف طول المستطيل.

يعني لو قلنا مثلًا إن طول المستطيل عشرة متر، فهيبقى عرضه عشرين متر، وهكذا. فمعنى كده إن الطول بيساوي جزء واحد. وأمّا العرض ففي الحالة دي هيبقى بيساوي جزئين.

بعد كده معطى عندنا إن المحيط هو ألف تمنمية ستة وتسعين متر. وخلّينا في الأول نفتكر إن محيط المستطيل بيساوي اتنين في، الطول زائد العرض. فبالتالي هيبقى محيط قطعة الأرض اللي عندنا بيساوي اتنين في، الطول زائد العرض.

بعد كده هنعوّض عن الطول بجزء واحد، وهنعوّض عن العرض بجزئين، وأمّا المحيط فهنعوّض عنه بألف تمنمية ستة وتسعين. فهيبقى عندنا ألف تمنمية ستة وتسعين يساوي اتنين في، جزء واحد زائد جزئين.

بعد كده هنجمع جزء واحد زائد جزئين، فهيبقى عندنا ألف تمنمية ستة وتسعين يساوي اتنين في تلات أجزاء. بعد كده هنضرب اتنين في تلاتة، واللي هتساوي ستة. فبالتالي هيبقى ألف تمنمية ستة وتسعين بيساوي ست أجزاء. وعلشان نوجد قيمة الجزء الواحد يبقى هنقسم الطرفين على ستة.

وبالتالي هيبقى قيمة الجزء الواحد بيساوي ألف تمنمية ستة وتسعين على ستة، فلمّا نحسبها هتبقى بتساوي تلتمية وستاشر. وأمّا الوحدة فهتبقى متر؛ لأننا بنوجد طول.

فبكده يبقى إحنا أوجدنا قيمة الجزء الواحد، والمطلوب إننا نوجد طول وعرض قطعة الأرض. فبما إننا فرضنا إن الطول بيساوي جزء واحد، فبالتالي هيبقى الطول بيساوي قيمة الجزء الواحد، واللي هو تلتمية وستاشر متر.

وأمّا العرض فبما إننا فرضنا إن هو بيساوي جزئين، فبالتالي هيبقى العرض بيساوي اتنين في تلتمية وستاشر، اللي هو قيمة الجزء الواحد. فلمّا نحسبها هتبقى بتساوي ستمية اتنين وتلاتين متر.

وبالتالي هيبقى طول قطعة الأرض هو تلتمية وستاشر متر، وعرض قطعة الأرض هو ستمية اتنين وتلاتين متر. وهتبقى هي دي إجابة السؤال.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.