فيديو: تفسير وحساب عملية القسمة بالتجزئة لعدد صحيح على كسر

مساحة شاشة تليفون عادل ٤٨ سم^٢، وهي تساوي أربعة أثلاث مساحة شاشة تليفون باسم. ما مساحة شاشة تليفون باسم؟

٠٢:٥٥

‏نسخة الفيديو النصية

مساحة شاشة تليفون عادل تمنية وأربعين سنتيمتر مربع. وهي تساوي أربعة أثلاث مساحة شاشة تليفون باسم. ما مساحة شاشة تليفون باسم؟

معطى عندنا في السؤال مساحة شاشة تليفون عادل، اللي هي تمنية وأربعين سنتيمتر مربع. في نفس الوقت مُعطى إن المساحة بتاعة شاشة تليفون عادل بتمثّل أربعة أثلاث مساحة شاشة تليفون باسم. يعني لو افترضنا إن مساحة شاشة تليفون باسم هي س؛ لأن هي دي المطلوب نوجدها. نقدر نكتب العلاقة بين المساحتين على شكل معادلة بالطريقة دي. زيّ ما معطى عندنا في السؤال إن مساحة شاشة عادل بتمثّل أربعة على تلاتة من مساحة شاشة باسم. وده معناه إننا لو عوّضنا بمساحة شاشة تليفون عادل اللي هي تمنية وأربعين سنتيمتر مربع. هتبقى بتساوي أربعة على تلاتة في مساحة شاشة تليفون باسم، اللي هي عبّرنا عنها بالمتغير س.

دلوقتي عايزين نوجد قيمة المتغير س. المتغير س عشان نقدر نوجد قيمته عايزينه يبقى في أحد أطراف المعادلة لوحده. طب إحنا دلوقتي عندنا عملية ضرب في الكسر ده. عشان نقدر نتخلّص من الكسر ده، ونخلي المتغير س لوحده. يبقى هنعمل العملية العكسية للضرب. يعني هنقسم طرفَي المعادلة على الكسر اللي تَمّ ضربه في س، اللي هو أربعة على تلاتة. بس ما ننساش، لازم نقسم طرفين المعادلة عشان ما يتغيرش قيمة المعادلة.

لمّا بنقسم على كسر، معناها إن إحنا بنضرب في المعكوس الضربي بتاعه. عندنا تمنية وأربعين على أربعة على تلاتة. هتبقى بتساوي تمنية وأربعين في المعكوس الضربي للكسر اللي هو بنقلبه، تلاتة على أربعة. يعني حوّلنا علامة القسمة إلى ضرب، وبعدين بنضرب في المعكوس الضربي للكسر.

بعد كده هنحط علامة التساوي. في الطرف الأيسر هيبقى عندنا أربعة على تلاتة في س، وزي ما قلنا عملية القسمة هي عملية ضرب في المعكوس الضربي، فهنضرب هنحوّل القسمة لضرب. وهنضرب في المعكوس الضربي اللي هو مقلوب الكسر اللي عندنا.

نبتدي بقى نختصر. تمنية وأربعين على أربعة هتساوي اتناشر. وبعدين اتناشر في تلاتة هتساوي ستة وتلاتين. هنحط علامة التساوي، وبعدين على الطرف الأيسر من المعادلة نقدر نختصر أربعة على أربعة تساوي واحد، وتلاتة على تلاتة يساوي واحد. فكده الطرف الأيسر هيتبقى فيه المتغير س.

وكده قدرنا نوجد قيمة المتغير س اللي هي طلعت ستة وتلاتين. والمتغير س زي ما إحنا افترضنا إن هو بيعبّر عن مساحة شاشة تليفون باسم. يبقى كده قدرنا نستنتج مساحة شاشة تليفون باسم، اللي هي هتطلع ستة وتلاتين سنتيمتر مربع.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.