فيديو: جمع الأعداد المكوَّنة من رقمين

يوضِّح الفيديو طريقة جمع الأعداد المكوَّنة من رقمين بإعادة تجميع الآحاد.

٠٥:٤٥

‏نسخة الفيديو النصية

هنتكلّم عن جمع الأعداد المكوّنة من رقمين. هنتعلّم إزّاي نعيد تجميع الآحاد لجمع عددين كلٍّ منهم مكوّن من رقمين. هبتدي الشرح بالمثال التالي.

أوجد ناتج: تمنية وعشرين زائد سبعة.

الخطوة الأولى: هستعمل النماذج لتمثيل تمنية وعشرين زائد سبعة. هرسم في الآحاد تمن قِطَع، وسبع قِطَع؛ لتمثيل الآحاد كلها. وفي العشرات هرسم نموذجين؛ كل نموذج عبارة عن عشر وحدات.

بعد كده الخطوة التانية: هجمع الآحاد كلها على بعض، هلاقيهم خمستاشر قطعة. وبعد كده هعيد تجميع الآحاد إلى عشر آحاد في عشرة واحدة. يعني هاخد العشر آحاد وأكوّن بيهم نموذج من عشر وحدات، وأحطّه في خانة العشرات. يعني هيكون الناتج في الحالة دي خمس آحاد، وتلات عشرات؛ يعني خمسة وتلاتين.

وبكده هنلاحظ إنه هنحتاج أحيانًا إلى إعادة التجميع إذا كان ناتج جمع آحاد العددين أكتر من تسعة. هنكمّل في الصفحة اللي جايّة، هناخد مثال على إعادة التجميع.

عند حسين أربعة وعشرين قصة، وعند محمد تمن قصص. فكم قصة عندهم هم الاتنين؟

هنجيب ناتج جمع العددين: أربعة وعشرين، وتمنية. في البداية هستعمل التقدير؛ هقرّب أربعة وعشرين إلى عشرين، وتمنية إلى عشرة. وبعدين هجمع عشرين زائد عشرة، هيكون الناتج تلاتين.

دلوقتي هنجمع بإعادة التجميع. الخطوة الأولى: هجمع الآحاد، أربعة زائد تمنية؛ يعني أربع آحاد زائد تمن آحاد هيساوي اتناشر آحاد. الاتناشر آحاد هعيد تجميعهم إلى اتنين آحاد، وواحد عشرات؛ إذن هكتب اتنين تحت الآحاد، وواحد في خانة العشرات.

الخطوة رقم اتنين: هجمع العشرات. عندي اتنين موجودة في الآحاد زيّ ما هي في الناتج، هجمع دلوقتي العشرات. واحد عشرات زائد اتنين عشرات هيساوي تلاتة عشرات. إذن ناتج الجمع هو: اتنين وتلاتين. وبكده أقدر أقول إنه أربعة وعشرين زائد تمنية هيساوي اتنين وتلاتين.

هنلاحظ إن اتنين وتلاتين قريبة جدًّا من ناتج التقدير، اللي هو تلاتين، وبكده الجواب صحيح. هنكمّل في الصفحة اللي جايّة. هنلاحظ إنه خاصية التجميع لعملية الجمع بتبيّن إن الطرق اللي بنجمع بيها الأعداد ما بتغيّرش الناتج. هناخد دلوقتي مثال على طرق الجمع.

بتحتوي حديقة على ستة وعشرين شجرة تفاح، وسبعتاشر شجرة برتقال. ما العدد الكلي للأشجار في الحديقة؟

بالتالي محتاجة أجمع العددين: ستة وعشرين، وسبعتاشر. هنستعمل طريقتين؛ الطريقة الأولى: المجاميع الجزئية.

في البداية هجمع الآحاد؛ ستة زائد سبعة هيساوي تلتاشر. وبعدين هجمع العشرات، اتنين عشرات زائد واحد عشرات هيساوي تلات عشرات؛ يعني تلاتين. يعني الناتج هيكون تلتاشر زائد تلاتين. هجمع المجاميع الجزئية اللي حصلت عليها، فهيكون الناتج: تلاتة وأربعين. إذن ناتج جمع ستة وعشرين زائد سبعتاشر، هو: تلاتة وأربعين.

الطريقة التانية: هنستعمل تحليل الأعداد؛ هنحلّل الأعداد إلى مكوّناتها عشان نجيب المجموع.

ستة وعشرين هحلّلها إلى عشرين زائد ستة، زائد … سبعتاشر هحلّلها إلى عشرة زائد سبعة. بعد كده هعيد ترتيب الأعداد عشان يكون جمعها أسهل. يعني هيساوي عشرين زائد عشرة زائد سبعة زائد ستة؛ هيساوي تلاتة وأربعين. إذن ناتج جمع العددين ستة وعشرين وسبعتاشر، هو: تلاتة وأربعين. نفس الناتج اللي حصلت عليه بالطريقة الأولى. هنكمّل في الصفحة اللي جايّة، هناخد مثال على جمع بدون إعادة تجميع.

أوجد ناتج جمع: واحد وخمسين زائد تلاتة وعشرين.

هكتب العددين واحد وخمسين زائد تلاتة وعشرين. بعدين هجمع الآحاد؛ واحد آحاد زائد تلات آحاد هيساوي أربع آحاد، هكتب أربعة. وبعدين هجمع العشرات؛ خمس عشرات زائد اتنين عشرات هيساوي سبع عشرات. وبكده أقدر أقول إن واحد وخمسين زائد تلاتة وعشرين هيساوي أربعة وسبعين.

وبكده هنكون اتعلّمنا إزّاي نجمع الأعداد المكوّنة من رقمين. ولاحظنا إنه أحيانًا بنحتاج إلى إعادة التجميع لو كان ناتج جمع آحاد العددين أكتر من تسعة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.