فيديو: إيجاد مربع الأعداد‎

يوضح الفيديو مربع العدد، وكيفية حسابه، وكيفية التعبير عنة باستخدام الكلمات، والربط بين مساحة المربع ومربع العدد.

٠٣:٤٣

‏نسخة الفيديو النصية

إيجاد مربع العدد.

هنتعلّم في الفيديو ده يعني إيه مربع العدد، وإزّاي بنحسبه. لمّا بنضرب عدد في نفسه، مثلًا خمسة، بنكتبه بالصورة: خمسة في خمسة. أو لو هنكتبه بصورة أساس وأُسّ، فده هيساوي خمسة أُس اتنين. وبنقرؤه: القوة الثانية للعدد خمسة، أو خمسة تربيع.

حاصل ضرب خمسة في خمسة، أو خمسة تربيع، بيساوي خمسة وعشرين. وفي الحالة دي بنسمّي العدد خمسة وعشرين، اللي هو حاصل ضرب العدد خمسة في نفسه، مربع العدد خمسة. يبقى مربع العدد، هو حاصل ضرب العدد في نفسه.

نحل مثال. أوجد مربع العدد تمنية وعشرين. مربع العدد تمنية وعشرين، هو تمنية وعشرين في تمنية وعشرين. فنكتب السؤال بشكل رأسي، ونحلّ. فهنلاقي بعد الحل، إن هو هيساوي سبعمية وأربعة وتمانين. يبقى مربع العدد تمنية وعشرين، هو العدد سبعمية أربعة وتمانين.

مثال تاني. اكتب المقدار التالي بالكلمات. بالكلمات هنوصف المقدار بإنه: القوة التانية للعدد تمنية. أو تمنية مرفوعة إلى القوة التانية. أو تمنية تربيع. وهنلاحظ إن تمنية تربيع هيساوي تمنية في تمنية. يعني هيساوي أربعة وستين. وبنقول على العدد أربعة وستين، مربع العدد تمنية.

نحل مثال تطبيقي. ما الفرق بين مساحتَي مربعين. طول ضلع أحدهما اتنين سنتيمتر، وطول ضلع الآخر يزيد على طول ضلعه، بمقدار أربعة سنتيمتر. عشان نقدر نعرف الفرق بين المساحتين، هنحسب مساحة كل مربع منهم الأول. قانون مساحة المربع بيساوي طول الضلع في نفسه. يعني هيساوي مربع طول الضلع. يبقى مساحة المربع الأول هتساوي اتنين في اتنين. أو هتساوي اتنين تربيع. وده هيساوي أربعة سنتيمتر مربع.

طول ضلع المربع التاني بيساوي … يعني هيساوي اتنين زائد أربعة. اللي هو هيساوي ستة سنتيمتر. يبقى مساحة المربع التاني هتساوي ستة في ستة. أو بتساوي ستة تربيع. وده هيساوي ستة وتلاتين سنتيمتر مربع. يبقى الفرق بين المساحتين هيساوي مساحة المربع التاني، اللي هي ستة وتلاتين سنتيمتر مربع. ناقص مساحة المربع الأول، اللي هي بتساوي أربعة سنتيمتر مربع. وده هيساوي اتنين وتلاتين سنتيمتر مربع.

يبقى في الفيديو ده عرفنا إيه هو مربع العدد. وإزّاي بنحسبه. وإزّاي بنعبّر عنه باستخدام الكلمات. وربطنا بين مربع العدد، ومساحة المربع.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.